Адыгэ Республикэм икъэралыгъо ансамблэ цIэрыIохэу «Налмэсымрэ» «Ислъамыемрэ» зэдагъэуцугъэ проектым иапэрэ пычыгъоу «Уахътэр къэсыгъ» зыфиIорэр Мыекъуапэ къыщатыгъ.

Адыгэ лъэпкъ орэдымрэ къа­шъомрэ зы программэм зэдыхэт­хэу къагъэлъэгъуагъ. ТикIэсэ мэ­­къамэхэм нэмыкI гъэпсыкIэ яIэу къэIугъэх. Джырэ уахътэм диштэу къашъохэр агъэпсыгъэх. Купхэр IофышIум зэрэпылъхэм имыза­къоу лъэпкъым ыпашъхьэ пшъэдэкIыжь зэрахьырэр къагурыIозэ зэгъусэхэу лъэныкъуабэмэ адэлэжьагъэх.
Концертым ирежиссерыр «Налмэсым» ихудожественнэ пащэу, УФ-м, Пшызэ шъолъырым, Абхъаз Республикэм язаслуженнэ, АР-м инароднэ артистэу Хъоджэе Ас­лъан къыIуагъ:
— Уахътэр къэси «Налмэсым­рэ» «Ислъамыемрэ» проектышхоу зэ­дэдгъэцэкIагъэм иапэрэ пычыгъо къэдгъэлъэгъуагъ. Адыгэ къэ­шъожъхэр шъошакIэм илъхэу къэт­шIыгъэх. ЛъэныкъуакIэхэм яхьатыркIэ ахэм непэ ятIонэрэ щы­Iэныгъэ агъотыжьыгъ. «Налмэсым» икъашъохэмрэ «Ислъамыем» иорэдхэмрэ зэкIужьэу къызэдэттыгъэх. ТапэкIэ къыхэзгъахъомэ сшIоигъу, «Налмэсым» концертыкIэу «Новые грани алмаза» зыфиIорэр егъэхьазыры. Ащ фэдизэу икупкI къисхы сшIоигъоп, ау сценэр чэрэгъузэ къэшъо гъэшIэгъонхэр къызэрэтшIыщтхэр къэс­Iощт. Ащ нэмыкIэу шъошакIэхэри ядгъэдыгъэх. Концертыр гъэшIэгъоныщт, титворчествэ зыгу рихьхэрэр щылэ мазэм и 4-м къетэгъэблагъэх.
Лъэпкъ искусствэр лъагэу зы­Iэтыхэу, къэзыухъумэхэу ыкIи лъы­зыгъэкIуатэхэрэ ансамблитIур лъэпкъ кIэным ешIушIэх, тапэ­кIэ къэкIощт лIэужхэм лъэпкъым ибаиныгъэ арагъашIэ.
— «Налмэсымрэ» «Ислъамыемрэ» япроектэу «Уахътэр къэсыгъ» зыфиIорэр шэпхъэшIухэм адиштэу зэдэдгъэцэкIагъ. Лъэпкъ къашъохэмрэ орэдхэмрэ къызэ­кIухэу сценэшхом щызэIукIагъэх, — къыIуагъ «Ислъамыем» ихудо­жественнэ пащэу, АР-м искусст­вэхэмкIэ изаслуженнэ Iофы­шIэшхоу Нэхэе Азэмат.
Лъэпкъ культурэм иIахьышIухэу къашъомрэ орэдымрэ сыдигъуи цIыфыбэ зэращалIэ. Мы концертри ащ ишыхьат. Къэгъэ­лъэгъон хьалэмэтыр адыгэ лъэпкъ культурэм изы Iахьышхо хъугъэ.
Лъэпшъыкъо Фатим.