ГандболымкIэ Урысыем и Кубок икъыдэхын фэ­гъэхьыгъэ зэнэкъокъум и 1/8 финалыр къы­зэринэкIыгъ Мыекъопэ «АГУ-Адыифым».

Адыгэ къэралыгъо универси­тетым иордэунэу Кобл Якъубэ ыцIэ зыхьырэм щызэIукIагъэх республикэм икомандэрэ Ижевскэ къэзыгъэлъэгъорэ «Университетымрэ».
Апэрэ такъикъхэм къащегъэ­жьагъэу бысымхэр нахь лъэшэу джэгугъэх, зэкIэлъыкIоу къэлап­чъэм Iэгоуи 5 дадзагъ. Нэужым хьакIэхэм яешIакIэ рагъэхъугъ, ау бэп къадэхъугъэр. ЯтIонэрэ таймым типшъашъэхэр бэрэ ыпэ­кIэ илъыгъэх, пчъагъэр 34:27-у текIоныгъэр къыдахыгъ ыкIи зэнэкъокъум изичэзыу едзыгъо щешIэнхэу фитыныгъэ къыдахыгъ. Тикомандэ аужырэу мыщ фэдэ гъэхъагъэ зишIыгъэр 2020-рэ илъэсыр ары.