КIэлэцIыкIу-ныбжьыкIэ движениеу «Щынэгъончъэ еджапIэр» зыфиIорэм хэтхэр зыхэлэжьэгъэхэ республикэ зэнэкъокъухэр Теуцожь районым ит къуаджэу Пэнэжьыкъуае игурыт еджапIэу
N 1-м щыкIуагъэх.

КъыткIэхъухьэрэ лIэужхэм шIэ­ныгъэу ыкIи физическэ ухьазырыныгъэу аIэкIэлъыр ушэтыгъэным дакIоу, щынэгъончъэным ишапхъэхэр зэрагъэцакIэхэрэр ауплъэкIугъ. Iофтхьабзэм шъо­лъырым ит гурыт еджэпIэ зэфэшъхьафхэм якомандэхэр хэлэ­жьагъэх. Куп пэпчъ нэбгырих хэтыгъ, илъэс 13 — 14, 15 — 17 зыныбжьхэр ары зэнэкъокъу­гъэхэр.
НахьыкIэхэм якуп щытекIуагъ кIэлэцIыкIухэм гъэсэныгъэ тедзэ зыщарагъэгъотырэ республикэ гупчэм икомандэ. Мыекъопэ гимназиеу N 22-р къэзыгъэлъэгъогъэ «Вершина 22-м» ятIонэрэ чIыпIэр къыдихыгъ, Пэнэжьыкъое гурыт еджапIэу N 1-м икомандэу «Бжъэдыгъур» ящэнэр.
Нахьыжъхэм якуп пэрытныгъэр щиубытыгъ Мыекъуапэ къэзыгъэлъэгъогъэ «Навигаторы Детства» зыфиIорэм, тыжьын ыкIи джэрз медальхэр афагъэ­шъошагъэх бысым командэхэу «Апчасымрэ» «Чэчэнаимрэ».
ТекIоныгъэр ыкIи хагъэунэ­фыкIырэ чIыпIэхэр къыдэзыхы­гъэхэм АР-м гъэсэныгъэмрэ шIэныгъэмрэкIэ и Министерствэ идипломхэмрэ ишIухьаф­тынхэмрэ афагъэшъошагъэх.