ХэушъхьафыкIыгъэ дзэ операцием иветеранэу Александр Будко IэкIэ агъэIорышIэрэ автомобилэу «Москвичым» иIункIыбзэхэр мэфэкI шIыкIэм тетэу фондэу «Хэгъэгум иухъумакIохэр» зыфиIорэм ишъолъыр къутамэ щыратыжьыгъ.

Iофтхьабзэм хэлэжьагъэх АР-м иминистрэхэм я Кабинет и Тхьаматэ игуа­дзэу — финансхэмкIэ министрэу Виктор Орловыр, шъолъыр фондым ипащэу ПIатIыкъо Аслъан, ащ иIофышIэхэр, ветераным иунагъу.
УФ-м зыкъэухъумэжьынымкIэ иминистрэ игуадзэу, къэралыгъо фондэу «Хэгъэгум иухъумакIохэм» итхьаматэу Анна Цивилевам игукъэкIэу хэушъхьафыкIыгъэ дзэ операцием иветеранхэм автомобильхэр къафэщэфыгъэнхэм Президентэу Владимир Путиным дыригъэштагъ. Джащ тетэу АР-м и ЛIышъхьэу КъумпIыл Мурат иунашъокIэ хэушъхьафыкIыгъэ адаптивнэ автомобилитIу мэкъуогъу мазэм шъолъыр фондым ветеранитIумэ къафищэфыгъэх. Джы мы машинэр ящэнэр, зэолIхэм анаIэ зэратетым, зэрафэгумэкIыхэрэм, IэпыIэгъу зэрафэхъухэрэм ар ишыхьат.
— Непэ Адыгэ Республикэм хэушъхьафыкIыгъэ дзэ операцием хэла­жьэхэрэм IэпыIэгъу афэхъугъэнымкIэ шIуагъэ къэзытырэ шIыкIэ гъэ­нэфагъэ щызэхэщагъ. Ветеранхэм яIофыгъохэр зэшIохыгъэнхэм, ящыкIэгъэ IэпыIэгъур ягъэгъотыгъэным АР-м и ЛIышъхьэу КъумпIыл Мурат лъэшэу ынаIэ зытыригъэтырэ лъэныкъохэм ащыщ. ХэушъхьафыкIыгъэ дзэ операцием хэлэжьагъэхэу сэкъатныгъэ хэзыхыгъэхэм автомобильхэр ятыгъэнхэр щыIэныгъэм хэгъозэжьынхэмкIэ зы амалэу щыт. Мы лъэныкъомкIэ IофшIэныр джыри лъыдгъэкIотэщт, ащ фэдэ щыкIагъэ зиIэу зыкъытфэзыгъазэхэрэм ялъэIухэр афэдгъэцэкIэщт, — хигъэу­нэфыкIыгъ Виктор Орловым.
Шъолъыр фондым ипащэ къызэрэхигъэщыгъэмкIэ, дзэ операцием хэлэжьагъэхэм ыкIи ахэм яунагъохэм арысхэм лъэныкъо зэфэшъхьафхэмкIэ IэпыIэгъу афэхъух.
— Мыщ ыпэкIэ тиветеранитIумэ автомобилыкIэхэр ядгъэгъотыгъ, мыр ящэнэрэ хъугъэ. Джы ахэр Iэрыфэгъоу, къин амылъэгъоу зе­кIонхэмкIэ амалышIу яIэщт. ЗэкIэ Iофтхьабзэу фондым зэрихьэхэрэр хэушъхьафыкIыгъэ дзэ операцием иветеранхэм лъытэныгъэ зэрафэтшIырэм, тызэрафэгумэкIырэм фэIорышIэх, — къыIуагъ фондэу «Хэ­гъум иухъумакIохэр» зыфиIорэм ишъолъыр къутамэ ипащэу ПIатIыкъо Аслъан.
Александр Будко Мыекъуапэ щыщ. ЫныбжьыкIэ къытефэрэ дзэ къулыкъур 1999-рэ илъэсым ригъэжьагъ, мэзих тешIагъэу зэзэгъыныгъэкIэ къулыкъур лъигъэкIотагъ. Илъэс 20-м ехъурэ дзэ Iофым ищыIэныгъэ фигъэхьыгъ, къылэ­жьыгъэ пенсием кIуагъэ. Нэужым 2023-рэ илъэсым ежь ишIоигъоныгъэкIэ зэзэгъыныгъэм кIатхи, шхончэо взводым икомандир игуадзэу къулыкъур хэушъхьафыкIыгъэ дзэ операцием щихьынэу ригъэжьагъ. Лагъымэр къызэом къытырищэгъэ уIагъэхэм апкъ къикIыкIэ лъэ­къуитIур имыIэжьэу къэнагъ, ащ апэрэ купым хэхьэрэ сэкъатныгъэ къыратыгъ. Джы Александр протезхэм атетэу икIэрыкIэу щыIэныгъэм иамалхэм зарегъэсэжьы. ЛIыгъэу зэрихьагъэм фэшI бгъэхалхьэхэу Суворовым ыцIэ зыхьырэр ыкIи «За участие в СВО» къыфагъэшъошагъэх.
— ИкIыгъэ илъэсым ижъоныгъокIэ мазэ къыщегъэжьагъэу шъолъыр фондым ынаIэ къыстет. ИшIогъабэ къысигъэкIыгъ, ащкIэ лъэшэу сыфэраз. Къысатыгъэ автомобилыр зес­фэшъуным пае шъолъыр ДОСАФ-м сагъакIуи сырагъэджэжьыгъ. Лъэшэу сэгушIо, машинэр сиунагъокIи IэпыIэгъушIу зэрэтфэхъущтым щэч хэлъэп. ЗепфэнымкIэ Iэрыфэгъу. Анахь шъхьаIэр шъхьэм, Iэхэм тэрэзэу Iоф ашIэныр ары. Сэ мыщ ыпэкIи автомобилыр зесфэщтыгъ, арышъ, шапхъэхэм сащыгъуаз, — хигъэунэфыкIыгъ Александр Будко.
Ветераным зынаIэ тетыр социальнэ координаторэу Ирина Щекоткинар ары.
— Пшъэрылъэу тиIэм тетэу ищыкIэгъэ IэпыIэгъур хэушъхьафыкIыгъэ дзэ операцием иветеранхэм ятэгъэгъоты. Александр Будко икIыгъэ илъэсым ижъоныгъуакIэ къыщегъэ­жьагъэу сэ къысэпхыгъ. А уахътэм ыпкIэ хэмылъэу юридическэ Iэпы­Iэгъу, щыIэныгъэм зэрэхэгъозэ­жьыщт пкъыгъохэр, адаптивнэ шъуа­шэхэр едгъэгъотыгъэх, ахъщэ тын къыратыжьынымкIэ тхылъхэр фэдгъэпсыгъэх. Патриотическэ ыкIи культурнэ Iофтхьабзэу фондым зэхищэхэрэм Будкохэм яунагъо чанэу ахэлажьэ. Александр ипсауныгъэ зыпкъ иуцожьыным емызэщы­жьэу ыуж ит, щыIэныгъэм зэрэфаблэрэр, пытагъэу хэлъыр нэмыкI­хэмкIи щысэтехыпI, — къыIуагъ Ирина Щекоткинам.
КъэIогъэн фае, IэкIэ агъэIорышIэрэ автомобильхэр ятыгъэныр ветеранхэм ясоциальнэ ыкIи ятехническэ реабилитациекIэ едзыгъо шъхьаIэ зэрэхъугъэр. Хэгъэгум иухъумакIохэм ящыIэныгъэ изытет нахьышIу хъуным, ежьхэр яза­къоу зекIонхэм мы IэпыIэгъур тегъэпсыхьагъ.
Iэшъынэ Сусан.