Креативнэ индустрием фэгъэхьыгъэ Дунэе шIэныгъэ-практическэ конференцие мы мафэхэм Мыекъопэ къэралыгъо технологическэ университетым щыкIуагъ. Адыгеим имызакъоу хэгъэгу зэфэшъхьафхэм ащыщхэри пэIудзыгъэ шIыкIэм тетэу ащ къыхэлэжьагъэх.

— Дизайныр нахь игъэкIотыгъэу зэбгъэшIэнымкIэ, креативнэ индустрием епхыгъэ Iофыгъохэм, гухэлъыкIэхэм уатегущыIэнымкIэ мы Iофтхьабзэм мэхьанэшхо иI. Белоруссием, Москва, Санкт-Петербург щыщхэу мы лъэныкъомкIэ гъэхъагъэ зиIэхэр къыхэлажьэх. Сэнаущыгъэ зыхэлъ студентхэм яшIэны­гъэхэм ахагъэхъоным фэшI къед­гъэблэгъагъэх. Мы лъэныкъомкIэ дизайнерхэм, музейхэм, гъэсэныгъэ учреждениехэм зэпхыныгъэ зэдыряIэу Iоф зэрашIэрэр къыщагъэлъэгъуагъ. Джащ фэдэу Мадина Саральп модэмкIэ иунэ фэгъэхьыгъэ къэбархэр къафаIотагъэх. АдыгеимкIэ дизайнер ныбжьыкIэу, тиапшъэрэ еджапIэ къэзыухыгъэу, джырэкIэ магистратурэм щеджэрэ Пэрэныкъо Рузанэ иIоф­шIагъэхэм афэгъэхьыгъэ лъэте­гъэуцо къышIыгъ, — къыIуагъ Iоф­тхьабзэм икIэщакIоу, искусствоведениемкIэ кандидатэу, Мыекъопэ къэралыгъо технологическэ университетым идоцентэу КIэдэкIое Нэфсэт.

Iофтхьабзэм къыдыхэлъытагъэу Санкт-Петербург промышленнэ технологиемкIэ ыкIи дизайнымкIэ икъэралыгъо университет культурологиемкIэ идокторэу, тарихъымкIэ ыкIи искусствэмкIэ ипрофессорэу Наталья Калашниковам модэм фэгъэхьыгъэ лъэныкъохэр гъэсэныгъэ ыкIи музей Iофым зэращыпхырыщыгъэр къыIотагъ. Витебскэ къэралыгъо технологическэ университетым къикIыгъэ Вера Довыденковам IэрышI акъылыр модэм ылъэныкъокIэ гъэфедэгъэным гумэ­кIыгъоу къыздихьыхэ­рэм къатегущы­Iагъ. Налщык культурнэ кIэнымкIэ ыкIи хэхъоныгъэхэмкIэ и Институт илIыкIоу Шэ­уджэн Жан­нэ «Зы шъуашэ фэгъэ­хьы­гъэ тарихъ» зыфиIорэ ви­део-лъэтегъэуцо къы­шIыгъ.
Пленарнэ зэхэсыгъом ыуж тIо гощыгъэхэу Iоф ашIэнэу аублагъ, дизайн- гъэсэныгъэм фэгъэ­хьыгъэ шIыкIакIэхэм, лъэпкъ тхыпхъэхэр гъэфедэгъэнхэм, промышленность псынкIэм хэхъоныгъэ егъэшIыгъэнымкIэ шIэныгъэ-технологическэ лъэныкъом ыкIи нэмыкIхэм атегущыIагъэх.
МэфитIурэ конференциер кIуагъэ. Ащ къыдыхэлъытагъэу Мыекъопэ къэралыгъо технологическэ университетым, промышленнэ технологиемкIэ ыкIи дизайнымIэ Санкт-Петербург икъэралыгъо университет, Урысые къэралыгъо университетэу А.Н. Косыгиным ыцIэ зыхьырэм, Пшызэ къэралыгъо университетым, Москва иполитехническэ университет и Ивантеевскэ къутамэ, искусствэмкIэ Адыгэ республикэ колледжэу Тхьабысымэ Умарэ ыцIэ зыхьырэм ыкIи Адыгэ кIэлэегъэджэ колледжэу Андырхъое Хъусенэ ыцIэ зыхьырэм ялIыкIохэм докладхэр къашIыгъ.
ДЕЛЭКЪО Анет.