АР-м и ЛIышъхьэу ­КъумпIыл Мурат кIэщакIо зэрэфэхъугъэм тетэу илъэсыкIэ шIу­шIэ Iофтхьабзэхэр ­Адыгеим щызэхащэх.

Республикэм икIэлэеджа­кIохэу ублэпIэ классхэм арысхэм илъэсыкIэ шIухьафтынхэмрэ республикэм и ЛIышъхьэ зыщафэгушIорэ тхыгъэмрэ аратыщтых. Псау­ныгъэ пытэ яIэнэу, еджэнми, нэмыкI лъэныкъохэми гъэхъагъэхэр ащашIынэу Къум­пIыл Мурат ахэм кIэлэцIыкIухэм щафэлъэIуагъ.
ШIухьафтын 26000-рэ фэдиз агъэхьазырыгъ. Респуб­ликэм игурыт еджапIэхэм яа 1 — 4-рэ классхэм арысхэм аратынэу мы охътэ благъэм республикэм иму­ниципалитетхэм ахэр аIэкIагъэхьащтых. Краснодар краим икъуаджэхэм якIэлэеджа­кIохэм апайи шIухьафтын 730-рэ агъэхьазырыгъ. Джащ фэдэу кIэлэцIыкIухэм апае Адыгеим щагъэхьазырыгъэ IэшIу-IушIу Iалъмэкъ 10200-рэ Херсон хэкум арагъэщагъ.
Адыгеим и ЛIышъхьэ ишIу­шIэ Iофтхьабзэхэу тыгъэгъа­зэм и 22-м къыщегъэжьагъэу и 29-м нэс АР-м и Театральнэ зэхахьэрэ АР-м и Концерт зэхахьэрэ ащыкIощтхэм кIэлэцIыкIу мини 10 фэдиз къа­рагъэблэгъагъ. Ахэр пшысэхэу «Золушка», «По щучьему велению» зыфиIохэрэм яплъы­щтых.
Iофтхьабзэу «ШIоигъоныгъэхэм яилъэсыкIэ чъыг» зыфиIорэми кIэлэцIыкIухэм гушIогъуабэ къыщяжэ. 2018-рэ илъэсым къыщегъэжьа­гъэу зэрэ Урысыеу мыщ фэдэ Iофтхьабзэр щызэхащэ. Щы­Iэныгъэм чIыпIэ къин ригъэу­цогъэ кIэлэцIыкIу мин пчъагъэмэ яшIоигъоныгъэхэр афэзыгъэцакIэ зышIоигъо нэбгырэ мин пчъа­гъэ ахэм зэрапхы.
ИлъэсыкIэ зэнэкъокъухэр республикэм зэрэщылъагъэ­кIотэщтхэр, «Лъэпкъ нэшанэ зиIэ илъэсыкIэ джэгуалъ» зыфиIохэрэм афэдэхэр зэ­рэзэхащэщтхэр Адыгеим и ЛIышъхьэ агу къыгъэкIыжьыгъ. БэмышIэу мыщ фэдэ зэнэкъокъум икIэуххэр зэфахьысыжьыгъэх. КIэлэеджэкIо 15-мэ ащ текIоныгъэ къыщыдахыгъ. Ахэм яIэпэщысэх илъэсыкIэ чъыг шъхьаIэу Адыгеим и Правительствэ зычIэт унэм щагъэуцугъэр къагъэкIэрэкIагъ.
«ИлъэсыкIэ шIушIэ Iофтхьабзэхэм язэхэщэн хэбзэшIу тфэхъугъ. Зы кIэлэцIыкIуи тымыгъэгушIоу къэдгъэнэщтэп. Анахьэу тынаIэ зытедгъэтыщтхэр щыIэныгъэм чIыпIэ къин ригъэуцогъэ кIэлэцIыкIухэр, хэушъхьафыкIыгъэ дзэ операцием хэлажьэхэрэмрэ иветеранхэмрэ яунагъохэм арысхэр ары. ТикIэлэцIыкIухэм ящыIакIэ гушIуагъор щыхъоинымкIэ, ахэм амалэу яIэхэм зыкъызэIуарагъэхын алъэкIынымкIэ тфэлъэкIыщтыр зэкIэ тшIэщт», — къыIуагъ КъумпIыл Мурат.