«Лъэпкъ нэшанэ зиIэ илъэсыкIэ джэгуалъ» зыфиIорэ шъолъыр зэнэкъокъур ыкIэм фэкIуагъ.

ТекIоныгъэ къыдэзыхыгъэ нэбгырэ 20-мэ ягъэшIон фэгъэхьыгъэ Iофтхьабзэр, зэрэхабзэу, Правительствэм и Унэ щы­кIуагъ. Ащ хэлэжьагъ АР-м культурэмкIэ иминистрэу Аулъэ Юрэ. ЗиIофшIагъэхэр анахь дэгъоу къыхагъэщыгъэ кIэлэцIыкIухэм Адыгеим иIэпэIэсэ цIэрыIохэм яIэшIагъэхэмрэ дипломхэмрэ афагъэшъо­шагъэх ыкIи яджэгуалъэхэм АР-м и Правительствэ и ИлъэсыкIэ чъыг шъхьаIэ джы къагъэдахэ.
— Ахэр Урысыемрэ Адыгеимрэ якъэ­ралыгъо тамыгъэхэр зытешIыхьэгъэ джэгуалъэхэу дышъэидагъэкIэ гъэдэхагъэхэр, пхъэкIычхэр, пхъэ цуакъэхэр, матрешкэхэр, ритоныр, лъэпкъ тхыпхъэ­хэр зыхэлъэу, илъэсым итамыгъэу шыр. Джы ахэр теубытагъэу «лъэпкъ художественнэ IэшIагъэх» пIон плъэкIыщт ыкIи шъолъырым и Правительствэ и Унэ ичъыг шъхьаIэ къагъэдахэ, — къащи­Iуагъ АР-м и ЛIышъхьэ ихъытыу нэ­кIубгъохэм.
Джэгуалъэхэу зэнэкъокъум къыра­хьылIагъэхэр дышъэидэкIэ шIыгъэх, цым, пхъэм, тхылъыпIэм ахэшIыкIыгъэх. ЯинагъэкIэ сантиметрэ 15-м шъхьадэкI­хэрэп. Лъэпкъ нэшанэр къызэрагъэлъэ­гъуагъэр, илъэсыкIэ мэфэкIым итеплъэ зэрэдиштэрэр, остыгъаем пыплъэнымкIэ зэрэIэрыфэгъур, ямышIыкIэу, гъэшIэгъо­нэу зэрэшIыгъэр — мы лъэныкъо пстэури къыдалъытэзэ IофшIагъэхэм уасэ афашIыгъ. Шъугу къэдгъэкIыжьын, шэ­кIогъум и 15-м къыщегъэжьагъэу тыгъэ­гъазэм и 10-м нэс зэнэкъокъур кIуагъэ. Республикэм икIэлэеджакIохэу а 1 — 11-рэ классхэм арысхэр ащ хэлэжьа­гъэх. АР-м культурэмкIэ и Министерствэ иIэпыIэгъоу Адыгеим иIэпэIасэхэм язэхахьэ Iофтхьабзэм кIэщакIо фэхъугъ. Лъэпкъ шэн-хабзэхэр къэухъумэгъэнхэр ыкIи зягъэужьыжьыгъэныр, сэнаущыгъэ зыхэлъ ныбжьыкIэхэр къыхэ­гъэщыгъэнхэр ыкIи лIэужыкIэхэр пIу­гъэнхэр зэнэкъокъум ипшъэрылъ шъхьа­Iэхэм ащыщых.
Анцокъо Ирин.