Урысыем итхакIохэм я Союз изимычэзыу я XVIII-рэ зэфэс Москва щыкIуагъ. Ащ иIофшIэн хэлэжьагъ Урысыем IофшIэнымкIэ и ЛIыхъужъэу, АР-м итхакIохэм я Союз итхьаматэу МэщбэшIэ Исхьакъ. Мыгъэ Урысыем итха­кIохэм язэфэс изещэн ащ къыфагъэшъошагъ.

СыхьатитIурэ кIогъэ зэIукIэгъум Iоф­тхьэбзэ зэфэшъхьафхэм ащытегущы­Iагъэх. Джащ фэдэу Урысыем итхакIохэм я Союз игъэцэкIэкIо куп хэтыгъэу, хэушъхьафыкIыгъэ дзэ операциер зыщыкIорэм къэбарынчъэу щыкIодыгъэу ыкIи хэкIодагъэкIэ алъытэгъэ Алексей Полуботэ ЛIыхъужъныгъэм иорденэу къыфагъэшъошагъэр янэрэ ыкъохэмрэ тхакIохэм я Союз ипащэу Владимир Мединскэм аритыжьыгъ.
Непэрэ мафэхэм итхэкIо-фронтовик къэралыгъо тын къыфэгъэшъошэгъэным фэгъэхьыгъэ Указым Владимир Путиныр джырэблагъэ кIэтхэжьыгъ.
МэщбэшIэ Исхьакъ къызэриIуагъэмкIэ, IофыгъуитIу зэфэсым зыщыхэплъагъэхэр: къэралыгъом литературнэ сооб­ществэ зэфэшъхьафэу итхэр Урысыем итхакIохэм я Союз къыхэгъэхьажьы­гъэнхэр зэрэлъыкIуатэрэр ыкIи Союзым и Устав ищыкIэгъэ зэхъокIыныгъэхэр фэшIыгъэнхэр.
— Советскэ Союзым илъэхъан тха­кIохэм я Союз иягъэу, епхыгъэу щытыгъэ унэхэу, литературнэ Iофхэм ­япхыгъэ IофшIэпIэ чIыпIэхэу, зыгъэпсэфыпIэхэу аIахыжьыгъагъэхэм къара­гъэгъэзэжьынэу, Союзым къыратыжьынхэу къэралыгъом ипащэ унашъо ышIыгъ. Тэри къытэупчIыгъэх, ау ащ фэдэу зыгорэ тIахыгъэу щытыгъэп, ти СоюзкIэ къытэнэсыгъэхэп, — хигъэунэфыкIыгъ МэщбэшIэ Исхьакъ.

Ау Урысыем итхакIохэм я Союз зып­штэкIэ, илъэсныкъом литераторхэм я Унэ Гупчэ, РСФСР-м итхакIохэм я Союз иунэ (джы зэрэщытэу), Ростов дэс тхакIохэм я Унэ, тхакIохэм япсэупIэу «Переделкино» зыфаIорэр, Кузнецкэ лъэмыджым тет тхылъ щапIэр Союзым къыратыжьыгъэх, тхылътедзапIэу «Художественнэ литературэр» 2026-рэ илъэсым иублэгъум Союзым ыIэ къыралъхьажьыщт.
Джащ фэдэу МэщбэшIэ Исхьакъ къы­зэриIотагъэмкIэ, Урысыем итхэкIо цIэ­рыIохэу Сергей Михалковым, Юрий Бондаревым, Михаил Шолоховым яшIэжь кабинетхэр Урысыем итхакIохэм я Союз и Унэ шъхьаIэ къызэрэщызэIуахыщтхэр Владимир Мединскэм зэфэсым къы­щиIуагъ.
Урысыем итхакIохэм я Союз икъутамэхэу шъолъыр зэфэшъхьафхэм арыт­хэм яIофшIэн нахь зыкъыра-
гъэIэтыжьыным, Сыбыр фэдэу, шъолъыр чыжьэхэми тхакIохэм союзхэр яIэ ­хъунхэм гъэцэкIэкIо купым хэтхэм анаIэ тетыщт.
— Зэфэсым къызэрэщаIуагъэмкIэ, — хигъэунэфыкIыгъ МэщбэшIэ Исхьакъ, — Санкт-Петербург, Нижний Новгород, Башкортостан, Карелием ялитературнэ сообществэхэр ясоюзхэм къахэхьажьхи зыкI тхэкIо организациехэр яIэ хъугъэ. А IофшIэныр джыри лъыкIотэщт. Зэ­фэсым упчIэ къыщатыгъагъ: урысые тхакIохэм я Союз (Союз российских писателей) щыщэу Союз шъхьаIэм ­нэбгырэ тхьапша къыхэхьажьыгъэр? Санкт-Петербург, Ярославль, Красно­ярскэ, Тулэ ятхакIохэр Союз шъхьаIэм къыхэхьажьыгъэх. Ау ащи екIолIэкIэ гъэнэфагъэ ищыкIагъ, пылъ шапхъэхэр бгъэцэкIэнхэ фае. Урысыем итхакIохэм я Союз ипащэ игуадзэу Николай Ивановым Союзым и Устав зэхъокIыныгъэу фэшIыгъэн фаехэр зэфэсым къыхилъхьагъэх. Къэралыгъом ипащэ тхакIохэм я Союз къыфигъэуцурэ пшъэ­рылъхэр нахь дэгъоу гъэцэкIагъэ хъунхэм пае уахътэм къыгъэнэфэрэ зэ­хъокIыныгъэхэм екIолIакIэхэр, шIыкIэ-­амалыкIэхэр къафэгъотыгъэнхэ фае, а зэхъокIыныгъэхэр Уставым хэтынхэу щыт.
Джащ фэдэу Уставым хагъэхьагъэхэм ащыщых концертнэ-просветительскэ, тхылътедзэ IофшIэнхэр Союзым зэшIуи­хынхэ ылъэкIыныр, тхылъеджапIэхэм, хъарзынэщхэм Iоф аригъэшIэныр, музейхэр Союзым иIэпыIэгъухэу литературэм итарихъ нахь зэлъарагъэшIэныр, мылъкоу Союзым къыфырагъэгъэзэ­жьыгъэр унэе шапхъэхэмкIэ ыгъэ­псэо­лъэн ылъэкIыныр.
Урысыем итхакIохэм я Союз Iоф­шIэнышхоу къыпыщылъыр шъолъыркъутамэхэри къыдеIэхэзэ агъэцэкIэным щэгугъых. Къэралыгъом ипащэ къафигъэуцугъэ пшъэрылъхэм язэшIохын лъыкIотэщт.
Тэу Замир.