Сэнэхьат ухьазырыныгъэмкIэ шъолъыр программэу «Адыгеим и ЛIыхъужъхэр» зыфиIорэм хэлэжьэнэу къы­ха­хыгъэ апэрэ купэу нэбгырэ 18 хъурэм яеджэн иятIонэрэ едзыгъоу «Экономикэмрэ ­финансхэмрэ» зыцIэм па­дзэжьыгъ.

Ащ фэгъэхьыгъэ зэIукIэу МКъТУ-м щыкIуагъэм хэлэжьагъэх АР-м и ЛIы­шъхьэрэ министрэхэм я Кабинетрэ я Администрацие ипащэу Владимир Свеженец, Къэралыгъо Советым — Хасэм и Тхьаматэ игуадзэу, Урысыем и ЛIы­хъужъэу Цэй Эдуард, программэм ипхырыщын дэлэжьэрэ къулыкъухэм ыкIи гъэсэныгъэм иучреждениехэм, къэралыгъо гъэIорышIэнымкIэ апшъэрэ еджапIэу РАНХиГС-м ялIыкIохэр.
Шъугу къэдгъэкIыжьын, хэушъхьафыкIыгъэ дзэ операцием хэлэжьагъэхэр нэужкIэ къэралыгъо ыкIи муниципальнэ хэбзэ къулыкъухэм, къэралыгъо ком­паниехэм IэпэIэсэныгъэ, къулайныгъэ ахэлъэу Iоф ащашIэным фэгъэхьазырыгъэнхэм программэр тегъэпсыхьагъ. Ар едзыгъуиплIэу зэтеутыгъ. Апэрэр шышъхьэIум и 25-м къыщегъэжьагъэу Iоныгъом и 4-м нэс рекIокIыгъ. Нэужым лIыхъужъхэм IофшIапIэхэм мэзищырэ ащыIагъэх.
Апшъэрэ еджапIэм программэу ­«Адыгеим и ЛIыхъужъхэр» гъэцэкIагъэ щыхъуным фэгъэзэгъэ научнэ IофшIэнымкIэ ыкIи инновационнэ хэхъоны­гъэхэмкIэ ипроректорэу Татьяна Овсянниковам шIуфэс гущыIэхэмкIэ закъы­фигъэзагъ.
— Непэ лIыхъужъхэм яегъэджэн программэ иятIонэрэ едзыгъо етэгъэ­жьэжьы, ар электроннэ платформэм пэIудзыгъэ шIыкIэм тетэу щызэхэщэ­гъэщт. Программэм ипхырыщын зэрэ Урысыеуи, тэркIи кIэу щыт. Ащ елъытыгъэу, егъэджэн IофшIэнхэр зэрэзэхэщэгъэщтымкIэ РАНХиГС-р тиупчIэжьэгъу ыкIи лекциехэм ямызакъоу, лъэныкъохэр къызэдедгъэубытыхэзэ, культурнэ, спортивнэ ыкIи команднэ Iофтхьабзэхэр хэдгъэхьагъэх. Къыхэзгъэщымэ сшIоигъу, программэм иапэрэ едзыгъо зэрифэшъуашэу тилIыхъужъхэм акIугъ, процент 80-м нэсэу кIэух дэгъухэр къагъэлъэ­гъуагъ. Федеральнэ программэу «ЛIы­хъужъхэм яуахът» зыфиIорэм иэкспертнэ совет уасэ къызэрэфишIыгъэмкIэ, егъэджэнымкIэ анахь шэпхъэшIухэм адиштэрэ Урысыем ишъолъыр 35-мэ Адыгеир ахэхьагъ. Тэгугъэ адрэ едзыгъохэмкIи ащ фэдэ къэгъэлъэгъонышIу­хэр тиIэнхэу, — хигъэунэфыкIыгъ Татьяна Овсянниковам.
Владимир Свеженец программэм мэхьанэ зэриIэр къыхигъэщыгъ.
— ТилIыхъужъхэм къэралыгъо ыкIи муниципальнэ хэбзэ къулыкъухэм, къэралыгъо компаниехэм IэпэIэсэныгъэ, къулайныгъэ ахэлъэу Iоф ащашIэныр къадэзыгъэхъурэ амалэу мыр щыт. АщкIэ лъэныкъо зэфэшъхьафхэм ащыIэхэу яIэпэIэсэныгъэ хагъэхъуагъ. Джы къыкIэлъыкIощт еджэгъум ахэр финанс ыкIи бюджет Iофхэм ащагъэгъозэщтых, — къыIуагъ ащ.
— Программэу «Адыгеим и ЛIы­хъужъхэр» — анахь IофшIэкIо дэгъухэм яIэпэIэсэныгъэкIэ къадэгощэнхэм, рес­публикэм иIэпэчIэгъэнэ IофышIэхэм ащыщ хъунхэмкIэ шIэныгъэ икъу агъотыным изы амал, — къыIуагъ Цэй Эдуард.
УФ-м и Президентэу Владимир Путиным къахилъхьэгъэ федеральнэ программэу «ЛIыхъужъхэм яуахътэ» къыдыхэлъытагъэу АР-м и ЛIышъхьэу Къум­пIыл Мурат иунашъокIэ шъолъыр программэу «Адыгеим и ЛIыхъужъхэр» зыфиIорэм ипхырыщын лъэкIуатэ.
Iэшъынэ Сусан.