Урысыем и Следственнэ комитет Адыгэ РеспубликэмкIэ иследственнэ ГъэIорышIапIэ иотделэу мэхьанэшхо зиIэ Iофхэр зэхэзыфырэм пшъэдэ­кIыжьэу ыхьырэмкIэ гъунэпкъэ гъэ­нэфагъэ зиIэ обществэу «ЭкоЦент­рэм» Адыгэ РеспубликэмкIэ икъутамэ икоммерческэ отдел ипащэ къы­фызэIуахыгъэ уголовнэ Iофым ихэплъэн ыухыгъ.

Урысые Федерацием и Уголовнэ кодекс ия 204-рэ статья ия 7-рэ Iахь ипунктэу «б-м», ия 204-рэ статья ия 8-рэ Iахь зигугъу къашIырэ бзэджэшIагъэхэр зэрихьагъэкIэ хъулъфыгъэр агъэмысэ.
Урысыем щынэгъончъэнымкIэ и Федеральнэ къулыкъу ишъолъыр гъэIорышIапIэрэ Адыгэ Республикэм хэ­гъэгу кIоцI IофхэмкIэ и Мнинистерствэ экономикэ щынэгъончъагъэмкIэ ыкIи къолъ­хьэ тын-Iыхыным пэуцужьыгъэнымкIэ игъэIорышIапIэрэ яIофышIэхэм къагъэхьазырыгъэ материалхэр IэубытыпIэ къызыфашIыхэзэ, уголовнэ Iофыр къызэIуахыгъ.
Следствием зэригъэунэфыгъэмкIэ, 2023-рэ илъэсым иIоныгъо къыщегъэ­жьагъэу 2025-рэ илъэсым имэкъуогъу нэс отделым ипащэ IэпыIэгъу къафэ­хъузэ, бэджэндэу аритырэ итранспорткIэ хэкIыр Адыгэ Республикэм къыращэным фэгъэхьыгъэ зэзэгъыныгъэхэр предпринимателымрэ «ЭкоЦентрэмрэ» зэдашIыгъэх. ХэкI машинэ Iуащы къэс организацием сомэ мин 13-м ехъу предпринимателым ритыщтыгъ, агъэмысэрэм сомэ мин къыIэкIахьэщтыгъ.
А уахътэм къыкIоцI препринимателым гъогогъу 1225-рэ хэкIыр Iуищыгъ, сомэ миллионрэ мин 225-рэ агъэмысэрэм иджыбэ къихьагъ.
Отделым ипащэ ифитыныгъэхэр къызфигъэфедэзэ, хэкIыр зэрэдащырэмкIэ зэзэгъыныгъэм къыщыдэлъытэгъэ уасэм шъхьадэкIэу унэе предпринимателым къыIихыщтыгъ. Хъардж бащэ рамыгъэшIыным пае предпринимателым сомэ мин 15 агъэмысэрэм ритыгъ.
Уголовнэ Iофыр хьыкумым IэкIа­гъэхьагъ.
ЩынэгъончъэнымкIэ федеральнэ къулыкъум и ГъэIорышIапIэу АР-м щыIэм ипресс-къулыкъу.