Полицием икъулыкъушIэ къуалъхьэ зэрэратыгъэм епхыгъэ уголовнэ Iофыр Адыгэ Республикэм ихэбзэухъумэкIо къулыкъухэм зэхафыгъ.

ЗэрагъэунэфыгъэмкIэ, Кощхьэблэ районым щыпсэурэм IэкIыб къэралым къикIыгъэу Урысые Федерацием инэ­мыкI шъолъыр щыпсэурэр хэбзэнчъэу иунэ ритхагъ. Мы хъугъэ-шIагъэмкIэ хъулъфыгъэм уголовнэ Iоф къыфызэIуахыгъ, IэкIыб къэралым щыщым ылъэныкъокIэ административнэ пшъэдэкIыжь тыралъхьагъ.
Мы илъэсым чъэпыогъум ыкIэхэм адэжь IэкIыб къэралым щыщым административнэ Iоф къыфызэIуамыхыным кIэлъэIузэ, ащ иIахьыл кIалэу игъуса­гъэм полицием икъулыкъушIэ къуалъхьэу сомэ мин 15 ритын гухэлъ иIагъ.
Урысыем хэгъэгу кIоцI IофхэмкIэ и Министерствэ экономикэ щынэгъончъэ­нымкIэ ыкIи къолъхьэ тын-Iыхыным пэшIуекIогъэнымкIэ иподразделениеу «Кошехабльский» зыфиIорэм икъулыкъу­шIэхэм къуалъхьэ зытын гухэлъ зиIа­гъэу IэкIыб къэралым щыщыр къаубытыгъ.
Мы хъугъэ-шIагъэмкIэ Урысыем и Следственнэ комитет иследственнэ ГъэIорышIапIэу АР-м щыIэм и Джэджэ межрайон следственнэ отдел уголовнэ Iоф къызэIуихыгъ.
Мы уахътэм ехъулIэу зэхэфынхэр ыкIэм фэкIуагъэх, прокуратурэм зэхифыгъэ уголовнэ Iофыр хьыкумым фагъэ­хьыгъ.