Адыгэ Республикэм хэгъэгу кIоцI IофхэмкIэ и Министерствэ изэфэхьысыжьхэм къызэрагъэлъагъоу, мафэ къэс тишъолъыр гъэпцIагъэ зыхэгъ бзэджэшIэгъэ пчъагъэ щызэрахьэ. Ахэм апкъ къикIэу цIыфхэм зэрарэу ашIырэр сомэ мин заулэм щегъэжьагъэу миллион пчъагъэхэм анэсы. Ар къызхэкIырэр амышIэрэ цIыфхэм егъэлыягъэу цыхьэ зэрафашIырэр ары.

Сомэ миллионитфыр…
Мы мафэхэм гъэпцIэгъэ бзэджэшIагъэ къыдызэрахьагъэу Мыекъуапэ иполицие зыкъыфигъэзагъ илъэс 66-рэ зыныбжь бзылъфыгъэу тикъалэ щыпсэурэм. Ащ къызэриIотагъэмкIэ, мэфэ заулэкIэ узэкIэIэбэжьымэ, ымышIэрэ горэ ителефон къытеуагъ ыкIи банкым иIофышIэу къыриIуагъ. Джащ лъыпытэу къыдэгущыIэрэм ащ къыфиIотагъ инэкIубгъоу банкым иприложение щыриIэр акъутагъэу ыкIи ар бзэджашIэхэм джы агъэфедэн алъэкIыщтэу.
Мы Iофыгъом хэкIыпIэу фэхъун ылъэ­кIыщтыри бзэджашIэхэм къы­пагъэхъо­жьыгъ — бзылъфыгъэм банкым къыщызэIуихыгъэ счетхэм арылъ ахъщэр зэкIэ джащ лъыпытэу хэушъхьафыкIыгъэу къыфа­гъэхьа­зырыгъэ «щынэгъончъэ» счетхэм аригъэхьан фаеу.
Хъугъэ шъыпкъэр зэхифыным ычIыпIэкIэ бзылъфыгъэм, гуIэм хэтэу, ымышIэрэ цIыфхэм къыраIуагъэр ышIошъ хъугъэ ыкIи банкым исчетэу къыфагъэнэфагъэм иахъщэу сомэ миллионитфыр ригъэхьагъ.
Ар зыдэгущыIагъэхэм нэужым телефоныр къаIэтыжьыгъэп ыкIи ежьхэри бзылъфыгъэм къыфытеожьыгъэхэп.
Джы мы хъугъэ-шIагъэм епхыгъэу Урысые Федерацием и Уголовнэ Кодекс ия 159-рэ статья ия 4-рэ Iахь къызэрэдилъытэу уголовнэ Iоф следствием къызэIуихыгъ. Оперативнэ ыкIи лъыхъон Iофыгъохэр полицием иIофышIэхэм зэхащагъэх.
Сакъыныгъэм ишапхъэхэр
Адыгэ Республикэм хэгъэгу кIоцI IофхэмкIэ и Министерствэ джыри зэ шъолъырым щыпсэухэрэм за­къыфегъазэ: телефонымкIэ къытеохэу е Интернетым иамалхэр жъугъэфедэхэзэ щэн-щэфын Iофхэм шъуахэт хъумэ, узэрыгъозэн фэе шапхъэхэр зыщышъумыгъэгъупшэх.
Банкым икартэ, паспортым дэт тхыгъэхэр ыкIи нэмыкI къэбарэу цIыфым ежь ышъхьэ пылъхэр шъумышIэхэрэм аIэкIэхьанхэу щытэп.
СVV-код зыфаIорэр (банкым икартэ ыкIыбкIэ тетхэгъэ цифрищыр) гъэбылъыгъэу пIыгъын фае. СМС- къэбархэр, код е пароль зэфэшъхьафхэр, электроннэ почтэм иадрес зимыщыкIагъэхэм яшъумыIу.
ШъуимыщыкIагъэу шъулъытэрэ СМС-къэбар телефоным къакIомэ, ар къызэIушъумых ыкIи зыми фэшъумыгъэхь. СМС-къэбарыр къызфагъэфедэзэ къагъэ­хьыгъэ программэхэр телефоным тешъумыгъэуцох, ар щынэгъончъэп.
БзэджэшIагъэм ыпкъ къикIэу зэрар къышъуахыгъэмэ, джащ лъыпытэу банкым макъэ ежъугъэIу (телефоныр банкым икартэу жъугъэфедэрэм ыкIыб тетхагъ) е полицием телефонхэу 02-м е мобильнэмкIэ 102-м шъуфытеу.
Гъомлэшк Байзэт.