Урысые Федерацием и Конституцие и Мафэ тефэу Урысые Федерациемрэ Адыгэ Республикэмрэ якъэралыгъо тынхэр аIэкIэгъэхьажьыгъэнхэм фэгъэхьыгъэ Iофтхьабзэ республикэ филармонием щыкIуагъ. ИлъэсыкIэм ехъулIэу щытхъу тхылъхэмкIэ, нэпэеплъ тамыгъэхэмкIэ, рэзэныгъэ тхылъхэмкIэ республикэм щыпсэухэрэм ащыщхэу IофшIэнэу зыфэгъэзагъэхэмрэ общественнэ Iофтхьабзэхэу зэшIуахыхэрэмрэ гъэхъэгъэ инхэр ащызышIыгъэхэр къыхагъэщыгъэх.

Iофтхьабзэм хэлэжьагъэх Адыгеим и ЛIышъхьэу КъумпIыл Мурат, АР-м и Къэралыгъо Совет — Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, АР-м иминистрэхэм я Кабинет хэтхэр, депутатхэм, общественнэ движениехэм ыкIи организациехэм ялIыкIохэр.
«Сызэрэшъуфэразэр къэсэIо Iоф­шIэнэу жъугъэцакIэрэм, зэкIэми зэдытиIофым шъуиIа­хьышхо зэрэхэшъушIыхьэрэм апае. Адыгеим щыпсэурэ нэбгырэ ыкIи унагъо пэпчъ тэрэзэу псэуным, неущрэ мафэм яцыхьэ телъыным ренэу тынаIэ тетэгъэты», — къыIуагъ КъумпIыл Мурат къэзэрэугъо­игъэхэм закъыфи­гъазэзэ.
Рэзэныгъэ гущыIэхэмкIэ зафигъэзагъ Росгвардием и ГъэIорышIапIэу Адыгэ Республикэм щыIэм иIофышIэхэм — хэушъхьафыкIыгъэ дзэ операцием хэла­жьэхэрэм. Ащ дакIоу республикэм и ЛIышъхьэ къызэрэхигъэщыгъэмкIэ, Ады­геим исоциальнэ-экономикэ зытет мафэ къэс зыгъэпытэрэ нэбгырэ пэпчъ лъы­тэныгъэ къылэжьыгъ.

Илъэсыбэ хъугъэу гуетыныгъэ фыряIэу Iоф зэришIэрэм пае щытхъуцIэу «УФ-м псауныгъэм икъэухъумэнкIэ изаслуженнэ IофышI» зыфиIорэр фагъэшъошагъ гъэпсэфыпIэу «Звезднэм» ипащэу Жэнэ Адам, республикэм имедицинэ илъэс 40-м ехъурэ фэлэжьагъэм. Урысыем ихэдзын системэ хэхъоныгъэ ышIыным зиIахь хэзышIыхьэгъэ Гъурыжъ Заремэ — Кощхьэблэ районымкIэ чIыпIэ хэдзэ­кIо комиссием итхьаматэ — щытхъуцIэу «УФ-м хэдзынхэмкIэ изаслуженнэ IофышI» зыфиIорэр къыфагъэшъошагъ. Мэкъумэщ артелэу «КъохьапIэм» имеханизаторэу Александр Данилиным щытхъуцIэу «УФ-м мэкъу-мэщымкIэ изаслуженнэ IофышI» зыфиIорэр къыра­тыжьыгъ. Урысыем и Президент ыцIэкIэ рэзэныгъэ тхылъ къыратыгъ Александр Стрикицэ — пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Картонтарэм» ислесарь — илъэсыбэ хъугъэу гуетыныгъэ фыриIэу Iоф зэришIэрэм пае.
КъумпIыл Мурат къыхигъэщыгъ шIухьаф­тынхэр зэратыгъэ нэбгырэ пэпчъ Адыгеим ихэхъоныгъэ иIахьышхо зэрэхишIыхьэрэр. АР-м и ЛIышъхьэ и УказкIэ медалэу «Адыгеим и Щытхъузехь» зыфиIорэр фагъэшъошагъ обществэу «Комплекс-Агро» зыфиIорэм ипащэу Александр Денисовым. КъызэрэхагъэщыгъэмкIэ, ащ пэщэныгъэ зыдызэрихьэрэ предприятием экономикэм ихэхъоныгъэ иIахьышхо хешIыхьэ.
Адыгеим и ЛIышъхьэ анахьэу къыхигъэщыгъэхэм ащыщых еджапIэхэм якIэ­лэегъаджэхэр, тренерхэр, псауныгъэм икъэухъумэн, культурэм, транспортым, псэупIэ-коммунальнэ хъызмэтым, псэолъэшIыным яIофышIэхэр. Ащ къыIуагъ муниципальнэ ыкIи къэралыгъо къулыкъушIэхэм, ведомствэхэм япащэхэм лъэныкъо зэфэшъхьафхэмкIэ Адыгеим хэхъоныгъэ ышIыным яIахьышхо зэрэхашIыхьэрэр.
Республикэм и ЛIышъхьэ рэзэныгъэ гущыIэхэмкIэ зафигъэзагъ общественнэ IофышIэхэм, волонтерхэм, предпринимательхэм — зэкIэ IэпыIэгъу зищыкIагъэхэм анаIэ атезыгъэтыхэрэм. КъумпIыл Мурат къызэрэхигъэщыгъэмкIэ, ащ фэдэ IэпыIэгъур Iофтхьэбзэ гъэнэфагъэхэм къахэщы, хэушъхьафыкIыгъэ дзэ операцием щыIэхэм япхыгъэ шIушIэ IэпыIэгъум изэхэщэни ар къегъэнафэ.
«Гуетыныгъэ зыхэлъ IофшIэнэу цIыф жъугъэхэм зэшIуахырэм обществэр нахь егъэпытэ ыкIи тизыкIыныгъэ зынэсырэр къе­гъэлъагъо» — къыIуагъ Адыгеим ипащэ.
Тынхэр зыфагъэшъошагъэхэр зэкIэ мыщ ишъулъэгъощт:

АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.