Ахъщэ къолъхьэ тын-Iыхыным пэшIуекIогъэным иIофыгъо­хэм афэгъэхьыгъэ зэхэсыгъо Адыгэ Республикэм ипро­куратурэ щыкIуагъ.

Ащ хэлэжьагъэх ахъщэ къолъхьэ тын-Iыхыным пэшIуекIогъэнымкIэ хэбзэгъэуцугъэр гъэцэкIагъэ зэрэхъурэм лъыплъэгъэнымкIэ мы къулыкъум иIэпыIэгъоу Максим Новоселецкэр, прокуратурэм иIофышIэхэу Евгений Базаровыр ыкIи Кирилл Осокиныр.
Максим Новоселецкэм къызэриIуагъэм­кIэ, 2025-рэ илъэсым къолъхьэ тын-Iыхыным пэшIуекIогъэнымкIэ, бзэджашIэхэм апэуцужьыгъэнымкIэ къэгъэлъэгъон дэ­гъухэр яI. Мыщ фэдэ нэшанэ зиIэ бзэджэшIэгъи 100-м ехъу зэрахьагъэу агъэунэфыгъ, ахэм ащыщых лъэныкъо зэфэшъхьафхэмкIэ бюджет ахъщэр атыгъугъэу, ащ нэмыкIэу лъыплъэкIо ыкIи хэбзэ къулыкъушIэхэм, хэбзэухъума­кIохэм къуалъхьэ аштагъэу.
Кирилл Осокиным къызэриIуагъэмкIэ, къолъхьэ тын-Iыхын нэшанэ зиIэ бзэджэшIэгъи 102-у республикэм щагъэунэфыгъэм щыщэу 63-р къуалъхьэ зэрашта­гъэм, 30-р гъэпцIагъэ зэрэзэрахьагъэм, 7-р сатыу ашIынымкIэ къуалъхьэ зэратыгъэм ыкIи 2-р яIэнатIэ къызфагъэфедэзэ бзэджэшIагъэ зэрэзэрахьагъэм афэгъэхьыгъ.
Мэхьанэшхо зэратыгъэ бзэджэшIа­гъэ­хэм ащыщ Росгвардием и ГъэIоры­шIапIэу Адыгэ Республикэм щыIэм или­цензион­нэ-Iизын Гупчэ ипащэ игуа­дзэ къуалъ­хьэ аритыгъэу къызэраубытыгъэр.
Мыекъуапэ ипрокуратурэ иунашъокIэ 2025-рэ илъэсым жъоныгъуакIэм и 23-м пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэм ипащэ игуа­дзэ сомэ миллион фэдиз тазырэу тыралъхьагъ Росгвардием и ГъэIорышIапIэу Адыгеим щыIэм илицензионнэ-Iизын Гупчэ ипащэ игуадзэ къуалъхьэу сомэ мин 14 зэрэритыгъэм фэшI. 2025-рэ илъэсым бэдзэогъум и 21-м тазырыр юридическэ цIыфым къыпщыныжьыгъ, хьыкумым иунашъокIэ зэхэфынхэр окIофэ IэнатIэ зиIэр агъэтIысыгъ.
Мы илъэсым ахъщэ къолъхьэ тын-Iыхын нэшанэ зиIэ бзэджэшIагъэу зэрахьагъэхэм алъэныкъокIэ къызэIуахыгъэ уголовнэ Iоф 30-м следствиер хэплъагъ.
Гъогум къыщыхъугъэ хъугъэ-шIагъэхэр аварийнэ комиссархэм хэбзэнчъэу зэраIэкIагъахьэщтыгъэхэм ыкIи ащкIэ къуалъхьэ къазэраIахыщтыгъэм епхы­гъэу мы илъэсым гъогу-патруль къулыкъум иинспектори 6 агъэмысагъ. Джащ фэдэу Тэхъутэмыкъое район администрацием архитектурэмкIэ, къэлэгъэпсынымкIэ ыкIи муниципальнэ чIыгум лъыплъэ­гъэнымкIэ иотдел ипащэ тфэгъогогъо къуалъхьэ къаIихыгъэу агъэунэфыгъ.
Евгений Базаровым къызэриIуагъэмкIэ, къэралыгъо ыкIи муниципальнэ къулыкъушIэхэм яхэбзэ пшъэрылъхэр зэрагъэцакIэхэрэм анаIэ тырагъэтыгъ. Мы лъэныкъомкIэ уплъэкIунэу ашIыгъэ­хэм къызэрагъэлъэгъуагъэмкIэ, къолъхьэ тын-Iыхын нэшанэ зиIэ бзэджэшIэгъи 122-рэ зэрахьагъ, IэнатIэ зыIыгъ нэбгыри 7-мэ цыхьэ афамышIыжьэу IофшIапIэхэм аIуагъэкIыгъэх.
Къолъхьэ тын-Iыхыным ылъэныкъокIэ зэрахьэгъэ бзэджэшIагъэхэм къахьыгъэ зэрарэу сомэ миллион 80-м ехъум икъегъэгъэзэжьынкIэ прокурорхэм ядэуи 10-мэ хьыкумыр ахэплъагъ.
Прокурорхэм къызэраIуагъэмкIэ, ахъщэ къолъхьэ тын-Iыхыным пэшIуекIогъэнымкIэ хэбзэухъумэкIо къулыкъухэм яIофшIэн шIуагъэ къытэу зэхащэным лъэкIэу яIэр зэкIэ рахьылIэныр, обществэмкIэ щынагъо къэзытырэ бзэджэшIагъэхэр нахь макIэ шIыгъэныр прокуратурэм иIофышIэхэм пшъэрылъэу зыфагъэуцужьыхэрэм ащыщ.
КIАРЭ Фатим.