Урысыем и ЛIыхъужъэу, хэушъхьафыкIыгъэ дзэ операцием щыфэхыгъэ майорэу Вадим Лемеш имыжъосын къызэIухыгъэным, ащ ыцIэ гурыт еджапIэм фэусыгъэным атегъэпсыхьэгъэ Iофтхьабзэр Мыекъуапэ игурыт еджапIэу N 2-м щыкIуагъ.

Iофтхьабзэм хэлэжьагъэх Адыгеим и ЛIышъхьэу КъумпIыл Мурат, АР-м и Къэралыгъо Совет – Хасэм и Тхьаматэу Вдадимир Нарожнэмрэ ащ игуадзэу Цэй Эдуардрэ, федеральнэ инспектор шъхьа­Iэу Сергей Дрокиныр, Урысыем и ЛIыхъужъ ишъхьэгъусэу Елена Бронниковамрэ икIалэхэмрэ, хэушъхьафыкIыгъэ дзэ операцием щыфэхыгъэхэм яIахьыл­хэр, АР-м иминистрэхэм я Кабинет хэтхэр, депутатхэр, Мыекъуапэ имэрие, Фондэу «Хэгъэгум иухъумакIохэр» зыфиIорэм икъутамэ япащэхэр, гурыт еджапIэм икIэлэегъаджэхэмрэ иеджа­кIохэмрэ, юнармейцэхэр.
Iофтхьабзэм хэлажьэхэрэм шIуфэс къарихи, Хэгъэгум и ЛIыхъужъхэм я Мафэ къыдыхэлъытагъэу ТекIоныгъэм ия 80-рэ илъэс зэхащэрэ Iофтхьабзэм мэхьанэшхо зэриIэр Адыгеим и ЛIышъхьэ къыхигъэщыгъ.
«Тэ пшъэрылъэу тиIэр лIы­хъужъхэм яшIэжь дгъэлъэпIэныр, ахэм яIахьылхэм IэпыIэгъу тафэхъуныр ары. ТиныбжьыкIэхэм щысэтехыпIэхэр яIэнхэмкIэ, тихэгъэгу зэрыгушхорэ шIуагъэхэр кIэлэцIыкIухэм ашIэнхэмкIэ, тарихъ шIэжьым икъэухъумэнкIэ, къыт­кIэхъухьэрэ ныбжьыкIэхэм япIункIэ а пстэуми мэхьанэшхо яI», — къыIуагъ КъумпIыл Мурат, гурыт еджапIэм иеджа­кIохэм зафигъазэзэ.
Адыгеим и ЛIышъхьэ къызэрэхигъэщыгъэмкIэ, майорэу Вадим Лемеш дзэкIолI, хэгъэгум ипатриот шъыпкъэу щытыгъ. Урысыем и Президентэу Владимир Путиным и УказкIэ лIыхъужъныгъэрэ псэемыблэжьныгъэрэ къызэрэзхигъэфагъэхэм фэшI дзэкъулыкъушIэм Урысые Федерацием и ЛIыхъужъыцIэ къыфаусыгъ.

Вадим Лемеш Новосибирскэ апшъэрэ команднэ училищыр къыухыгъ, Темыр- Кавказ, Къыблэ дзэ койхэм пэщэ IэнэтIэ зэфэшъхьафхэр ащиIыгъыгъэх, дзэ подразделениехэм пэщэныгъэ адызэрихьагъ. 2020-рэ илъэсым Сирием, 2022-рэ илъэсым къыщегъэжьагъэу Донбасс, хэушъхьафыкIыгъэ дзэ операциер зыщыкIорэ чIыпIэм къулыкъу ащихьыгъ. Марьинкэ дэжь щыкIогъэ заом щыфэхыгъ. Ипшъэрылъхэр гъэхъагъэ хэлъэу зэригъэцэкIагъэхэм фэшI Урысыем и ЛIыхъужъыцIэ къыфаусыгъ. Ащ ишъхьэгъусэрэ икIэлитIурэ Мыекъуапэ щэпсэух, янэрэ ышрэ Новосибирскэ дэсых. ИлъэситIукIэ узэкIэIэбэжьмэ, КъумпIыл Мурат офицерым янэу Татьяна Лемеш (Боярских) Урысыем и ЛIы­хъужъ ижъуагъо, ишъхьэгъусэу Еленэ Бронниковамрэ икIэлэцIыкIухэмрэ ЛIы­хъужъныгъэм иорденрэ медалэу «За отвагу» зыфиIорэмрэ аритыжьыгъагъэх.
ХэушъхьафыкIыгъэ дзэ операцием хэлэжьэрэ тичIыпIэгъухэм къатегущыIэзэ, Адыгэ Республикэм и ЛIышъхьэ къыхигъэщыгъ нэбгырэ миниплIым ехъу­мэ къэралыгъо тынхэр, нэбгырэ 500-м ехъумэ ЛIыхъужъныгъэм иорден, нэбгыри 4-мэ ядунай захъожь нэуж Урысыем и ЛIыхъужъыцIэ къазэрафагъэ­шъошагъэр. Ахэм лIыхъужъныгъэу зэрахьагъэм фэгъэхьыгъэу гурыт еджапIэхэм ащыкIорэ урокхэм къащаIуатэ, ахэм ацIэхэр урамхэм ахьы, ЛIыхъужъхэм япартэхэмрэ мыжъобгъухэмрэ къафызэIуахых. Мыекъопэ гурыт еджапIэу N 1-мрэ Яблоновскэ гурыт еджапIэу N 28-мрэ тичIыпIэгъухэу, Урысыем и ЛIыхъужъхэу Роман Тороховымрэ Валерий Заволянскэмрэ ацIэхэр ахьы.
КъумпIыл Мурат еджапIэу N 2-м икIэлэеджакIохэм дэгъоу еджэнхэу, гушхоу, зафэу, ныбджэгъу дэгъоу щытынхэу, лIыхъужъхэр зыкIи зыщамыгъэ­гъупшэнхэу афэлъэIуагъ.
АР-м и Къэралыгъо Совет — Хасэм и Тхьаматэу Владимир Нарожнэри Iоф­тхьабзэм къыщыгущыIагъ. Хэгъэгум иухъумэкIо лIыхъужъхэм яшIэжь гъэлъэ­пIэгъэн, хэушъхьафыкIыгъэ дзэ операцием хэлажьэхэрэм ыкIи иветеранхэм яунагъохэм, заом хэкIодэгъэ дзэкIолI­хэм яунагъохэм IэпыIэгъу ягъэгъотыгъэн зэрэфаер ащ хигъэунэфыкIыгъ.
Урысыем и ЛIыхъужъ ишъхьэгъусэ Вадим Лемеш, хэушъхьафыкIыгъэ дзэ операцием щыфэхыгъэ дзэкIолIхэм яшIэжь гъэлъэпIэгъэным тегъэпсыхьэгъэ Iофтхьабзэм хэлэжьэгъэ пстэуми зэрафэразэр унагъомрэ Iахьылхэмрэ ацIэкIэ къыIуагъ.
Республикэм и ЛIышъхьэу КъумпIыл Муратрэ Iофтхьабзэм хэлэжьагъэхэмрэ Урысыем и ЛIыхъужъ имыжъосынэу гурыт еджапIэм къыщызэIуахыгъэм къэ­гъагъэхэр кIэлъыралъхьагъэх. ЕтIанэ республикэм ипащэ дзэ щытхъум изал чIэхьагъ. Iофтхьабзэм икIэух патриотическэ пIуныгъэмкIэ классым лIыхъужъхэм япартэхэр ачIагъэуцуагъэх. Гурыт еджапIэм икIэлэеджэкIо анахь дэгъухэр: олимпиадэхэм текIоныгъэ къащыдэзыхыхэрэр, дэгъоу еджэхэрэр, еджапIэм ищыIэныгъэ чанэу хэлажьэхэрэр ары ащ фэдэ партэхэм адэсыщтхэр.