Урысыем и ЛIыхъужъэу, хэушъхьафыкIыгъэ дзэ операцием щыфэхыгъэ Вадим Лемеш имыжъосын икъызэIухын тегъэпсыхьэгъэ Iофтхьабзэм хэлэжьэгъэ КъумпIыл Мурат еджапIэу N 2-м гъэцэкIэжьынэу рашIылIагъэхэм защигъэгъозагъ.

Лъэпкъ проектэу «НыбжьыкIэхэмрэ кIэлэцIыкIухэмрэ» зыфиIорэм къыдыхэлъытэгъэ федеральнэ проектэу «ШIоу щыIэр зэкIэ кIэлэцIыкIухэм апай» зыфиIорэм диштэу 1976-рэ илъэсым агъэ­псыгъэгъэ унэр уахътэм диштэу зэтегъэпсыхьажьыгъэнымкIэ IофшIэн гъэнэфагъэхэр агъэцэкIагъэх. 2024-рэ илъэсым икIэух ахэр рагъажьи, 2025-рэ илъэсым Iоныгъом и 1-м ехъулIэу аухыгъэх.

Гурыт еджапIэм ипащэу Бэсный Саидэ республикэм ипащэ къыфиIотагъ зэхъокIыныгъэу афэхъугъэхэм, классхэр, кабинетхэр, спортзалыр зэрэзэтыра­гъэпсыхьагъэхэм, видеохэр зэрагъэу­цугъэм, кIэлэеджакIохэмрэ кIэлэегъа­джэхэмрэ ящыкIэгъэ амалхэр зэрафызэрахьагъэхэм, еджапIэм ищагу зэрэзэтырагъэпсыхьагъэм ыкIи спорт джэгупIэ къызэрэзэIуахыгъэм афэгъэхьы­гъэу.
Адыгеим и ЛIышъхьэ Iофэу ашIагъэхэм якIэуххэм защигъэгъозагъ, подряднэ организацием илIыкIохэмрэ кIэлэеджа­кIохэмрэ адэгущыIагъ. ПстэумкIи гъэцэкIэжьын IофшIэнхэм сомэ миллиони 130-рэ фэдиз апэIухьагъ. Унашъхьэм изэблэхъун, унэ кIоцIымрэ ащ ыгупэрэ ягъэдэхэн, инженер IофшIэнхэр псэ­олъэшIхэм графикым диштэу аухыгъэх. Муниципальнэ бюджетым имылъкукIэ гурыт еджапIэм ищагу зэтырагъэпсы­хьагъ, остыгъэхэр ащ дагъэуцуагъэх, футбол ешIапIэрэ тренажерхэр зыдэт спорт джэгупIакIэрэ агъэпсыгъэх.

КъумпIыл Мурат СДЮШОР-у N 1-у С. Джэнчатэм ыцIэ зыхьырэм игандболисткэ ныбжьыкIэхэу гурыт еджа­пIэу N 2-м зыщызыгъасэхэ­рэм мыщ щаIу­кIагъ. Тренер шъхьа­Iэу-кIэлэ­егъаджэу Валерий Гончар рес­публикэми еджапIэми япащэхэм «тхьашъуегъэ­псэу» ариIуагъ амалышIухэр мыщ зэрэщызэхащагъэхэм апае ыкIи командэм тапэкIэ гухэлъэу иIэхэм къатегущыIагъ.
«ЕджапIэхэр, спортеджа­пIэхэри ахэм зэрахэтхэу, мылъкукIи, техникэкIи нахьышIоу зэтегъэпсыхьэгъэнхэмкIэ тиамал къыхьырэр зэкIэ тэшIэ. КIэлэцIыкIухэр ашIогъэшIэгъонэу, щынэгъончъэу еджапIэхэм ащыIэнхэм тэркIэ мэхьанэшхо иI. КIэлэегъаджэхэм яп­шъэрылъхэр дэгъоу агъэцэ­кIэнэу, гъэсэныгъэм зыкъегъэIэтыгъэным ткIуачIэ зэретхьылIэрэм къыдырагъэштэнэу тащэгугъы», — къыIуагъ КъумпIыл Мурат.
АР-м и ЛIышъхьэ ипресс-къулыкъу къытырэ къэбархэмкIэ
ЛIышэ Саныет.