Лъэпкъ проектэу «ЩыIэныгъэм пае инфраструктурэр» зыфиIорэм ипхырыщын къыдыхэлъытагъэу общественнэ транспортыкIэ Адыгеим джыри къыIэкIэхьагъ. Тыгъуасэ республикэм и ЛIышъхьэу КъумпIыл Мурат хэлажьэзэ автобуси 10 Мыекъопэ троллейбус гъэIорышIапIэм ратыгъ. ФэгъэкIотэныгъэ зыхэлъ лизинг программэм тетэу сомэ миллиони 108-м ехъу ахэм атефагъ.

Iофтхьабзэм хэлэжьагъэх АР-м иминистрэхэм я Кабинет и Тхьаматэ игуа­дзэу Хъоткъо Хъызыр, Адыгеим псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ иминистрэу Валерий Картамышевымрэ ащ игуадзэу Лафышъэ Рэмэзанрэ, Мые­къуапэ имэрэу Геннадий Митрофановыр, Мыекъопэ троллейбус гъэIорышIапIэм ипащэу Хьао Анзор.
Хэгъэгум къыщыдагъэкIыгъэ автобусыкIэхэр Адыгеим и ЛIышъхьэ къыплъы­хьагъэх, Iэрыфэгъоу зэрэщытхэм имызакъоу, ахэр щынэгъончъэх ыкIи шапхъэ­хэм адештэх. Автобусхэр къащэфынхэ зэхъум ыпэкIэ СИМАЗ-м къыдигъэкIыгъэ автобусхэу зэрагъэгъотыгъагъэхэм уасэ афэзышIыгъэ цIыфхэм яеплъыкIэхэри къыдалъытагъэх. Анахьэу анаIэ зытырагъэтыгъэр нэбгырэ пчъагъэу ифэщтымрэ автобус кIоцIым изытетрэ. АвтобусыкIэхэм арыфэрэр нэбгырэ 77-м нэсэу нахьыбэ ашIыгъ. ЗипсауныгъэкIэ пыч зиIэ цIыфхэми ахэр афытегъэпсыхьа­гъэх, джэхашъор Iэтыгъэп, ыкIоцI къэзыгъэфабэхэрэр ыкIи къэзыгъэучъыIыхэрэр хэтых.
2026-рэ илъэсым щылэ мазэм къыщегъэжьагъэу автобусхэр къэлэ маршрутэу N 47-мкIэ зекIохэу рагъэжьэщт, Министочникымрэ вокзалымрэ ащ зэрипхыщтых ыкIи урамхэу Шоссейнэм, Пролетарскэм, Юннатхэм, Привокзальнэм ыкIи нэмыкIхэм апхырыкIыщт.
Гъогум техьаным ыпэкIэ IофшIэн гъэ­нэфагъэ агъэцакIэ техникэр гъэхьазырыгъэнымкIэ, ГИБДД-м иучет хагъэуцох, страховкэ ашIых. ПэIудзыгъэ шIыкIэм тетэу алъыплъэнхэмкIэ камерэхэр ахэм ахэтых, электрон табло яI, ГЛОНАСС-м исистеми ахэт. Ащ нэмыкIэу автобусхэм ахэтых Iэрылъхьэу ахъщэр амытыным пае пкъыгъо гъэнэфагъэхэр.
Урысыем и Банк Адыгэ РеспубликэмкIэ и Къутамэ къызэрэщатыгъэмкIэ, цIыфхэм, транспортым зитIысхьэхэкIэ, Iэрылъхьэу ахъщэр атыным нахьи терминалхэр агъэфедэнхэр къыхахы. 2025-рэ илъэсым ия 3-рэ квартал сомэ миллионым ехъу ащ фэдэ шIыкIэм тетэу зэрашIыгъэм къыкIэкIуагъ. НепэкIэ автобус ыкIи троллейбус 350-рэ электрон терминалхэмкIэ зэтегъэпсыхьагъэх. ЦIыф­хэу зэращэхэрэм япроцент 84-мэ ахэр къызфагъэфедэх. Къулыкъу гъэнэфагъэ­хэм пшъэрылъ афашIыгъ Адыгеим иобщественнэ транспорт Iэрылъхьэу ахъщэ зытыхэрэм япчъагъэ къыщыгъэкIэгъэным епхыгъэ Iофтхьабзэхэр зэрахьанхэу.
Адыгеим и ЛIышъхьэ водительхэм гущыIэгъу зафэхъум общественнэ транспортым иIофшIэн нахьышIоу зэхэщэгъэным, цIыфхэмкIэ Iэрыфэгъоу ыкIи щынэгъончъэу ахэр щытынхэм мэхьанэшхо зэриIэр къыхигъэщыгъ. Транспорт фэIо-фашIэхэм язытет нахьышIу хъунымкIэ графикыр укъуагъэ мыхъуным, цIыфхэм язещэнкIэ шапхъэхэм адэмыхынхэм анаIэ атырагъэтынэу пшъэрылъ къафишIыгъ.
Лъэпкъ проектэу «ЩыIэныгъэм пае инфраструктурэр» зыфиIорэм диштэу автопаркыр гъэкIэжьыгъэнымкIэ федеральнэ IэпыIэгъум ишIуагъэкIэ IофшIэныр лъыдгъэкIотэщт. АщкIэ лъэныкъо заулэ къыдэтэлъытэ: машинэхэр къэтэщэфых, гъогукIэхэр тэгъэпсых, джащ фэдэу инфраструктурэми ренэу тынаIэ тетэгъэты. Ахэм яшIуагъэ къэкIо къалэм итеплъэ нахь дахэ хъуным имызакъоу, цIыф­хэр Iэрыфэгъоу ыкIи щынэгъончъэу зещэгъэнхэмкIи», — къыхигъэщыгъ КъумпIыл Мурат.
Шъугу къэтэгъэкIыжьы: Мыекъопэ троллейбус гъэIорышIапIэм ипарк иигъэ­кIотыгъэ гъэкIэжьын 2023-рэ илъэсым ублагъэ хъугъэ, непэкIэ СИМАЗ-м иавтобус 50-у къащэфыгъэхэм линием Iоф щашIэ (ахэм маршрутхэу N 1-м, 2-м, 3а-м, 4а-м, 6а-м, 7а-м, 8-м, 9а-м, 21-м, 26а-м, 32-м атетэу Iоф ашIэ). АР-м псэолъэшIынымкIэ и Министерствэ къызэритыгъэмкIэ, 2028-рэ илъэсым нэс джыри кIэу автобус 35-рэ къащэфынэу рахъухьагъ.
АР-м и ЛIышъхьэ ипресс-къулыкъу къытырэ
къэбархэмкIэ
Тхьаркъохъо Сафыет.