Обществэм иеплъыкIэхэм апэшIуекIорэ гупшысэхэм ыкIи радикализацием апэуцужьыгъэнымкIэ ныбжьыкIэхэм Iоф адэшIэгъэн зэрэфаем фэгъэхьыгъэ шъолъыр конференцие Мыекъопэ къэралыгъо технологическэ университетым щыкIуагъ.

Зэхэсыгъом хэлэжьагъэх Адыгеим лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Долэ Долэтбый, АР-м гъэсэныгъэмрэ шIэныгъэмрэкIэ и Министерствэ иIофышIэу Хьалэщтэ Казбек, АР-м терроризмэм пэуцужьыгъэнымкIэ икомиссие и Аппарат ипащэу ЛIый Азэмат, шIэныгъэлэжьхэр, хэбзэухъумэкIо къулыкъухэм, общественнэ ыкIи дин организациехэм ялIыкIохэр, студентхэр.
Iофтхьабзэм ипшъэрылъ шъхьаIэр Уры­сые Федерациер гумэкIыгъо лъэхъан зыщыхэтым лъэпкъ щынэгъончъагъэр гъэпытэгъэным тегущыIэгъэныр, екIо­лIа­кIэхэр къыхэхыгъэнхэр ары.
Апшъэрэ еджапIэм ипроректорэу БрантI Мурат Iофтхьабзэр зэрищагъ. Ащ ипэублэ псалъэ къыщыхигъэщыгъ ныбжьыкIэхэр къэбар нэпцIхэм ащыухъу­мэгъэнхэмкIэ зэIукIэгъум мэхьанэшхо зэриIэр..

Адыгеим лъэпкъ IофхэмкIэ, IэкIыб къэ­ралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Долэ Долэтбый къекIо­лIагъэхэм анаIэ тыраригъэдзагъ об­ществэм иеплъы­кIэхэм апэшIуекIорэ гупшысэхэм ыкIи радикализацием апэуцужьыгъэнымкIэ ныбжьыкIэхэм Iоф адэшIэгъэным фэIорышIэрэ Iофтхьа­бзэхэр Адыгеим ихэбзэ къулыкъухэмрэ шъолъырым щы­лэжьэрэ дин ыкIи об­щественнэ организациехэмрэ зэрэзэхащэхэрэм.
— ЗэщыхъокIо кIуачIэхэм ныбжьыкIэхэр амыгъэплъэхъунхэм, дин ыкIи лъэпкъ зэгурымыIоныгъэхэм ахэщагъэ мыхъунхэм мэхьанэшхо яI. Тарихъым, Хэгъэгу зэошхом афэгъэхьыгъэ къэбар нэпцIэу IэкIыб къэралхэм агъэIухэрэр ныбжьыкIэхэм ашIошъ мыхъуным пае шъыпкъэр ашIэн, патриотэу къэтэджынхэ, тинахьыжъхэм лIыхъужъныгъэу зэрахьагъэр икъоу алъыгъэIэсыгъэн фае. IэкIыб къэралхэм Урысыем лъэпкъ зэ­гурымыIоныгъэ илъыным пае афэ­лъэ­кIырэр ашIэ, телефоныр, дунэе
хъы­тыур къызфагъэфедэхэзэ агъэIорышIэщт, агъэ­федэщт цIыфхэр къагъотых. ГумэкIыгъор дэгъэзыжьыгъэным пае тызэкъотэу ащ тыпэшIуекIон фае, — къыIуагъ Долэ Долэтбый.
Зигъо къэсыгъэ Iофыгъоу мыр зэрэщытыр, зэщыхъокIо кIуачIэу къыкъо­кIы­хэрэм ныбжьыкIэхэр зэрагъэплъэ­хъу­хэрэр, дунэе хъытыур къызфагъэфедэзэ къэбар нэпцIыхэр ашIошъ зэрагъэхъу­хэрэр, ащ къыхэкIыкIэ террористи­ческэ ыкIи экстремизмэ нэшанэ зиIэ мыхъо-­мышIагъэхэм ахэщагъэхэ зэрэхъухэрэр АР-м терроризмэм пэуцужьыгъэнымкIэ икомиссие и Аппарат ипащэу ЛIый Азэ­мат къыIуагъ.
Нэужым дин ыкIи лъэпкъ зэгурымы­Iоныгъэхэм япхыгъэ зекIуакIэхэм ныбжьыкIэхэр ахэщагъэ мыхъунхэм фэIорышIэрэ Iофтхьабзэхэм ар къатегущы­Iагъ. Къэбар нэпцIыхэр аIэкIагъахьэхэзэ цIыфхэм психологическэу зэратеIун­кIэ­хэрэм пэуцужьыгъэн, шъыпкъагъэр зы­лъэпсэ къэбархэр алъыгъэIэсыгъэнхэмкIэ амал тедзэхэр зехьэгъэнхэ зэрэфаер къыхигъэщыгъ.
— Дин ыкIи лъэпкъ зэгурымыIоныгъэ тикъэралыгъо къыралъхьаным мафэ къэс къытпыщыт къэралыгъохэр дэлажьэх. Ахэм апэуцужьыгъэнымкIэ Iофышхо тихэгъэгу щэкIо. БэмышIэу къуа­джэу Козэт дэт мэщытым икъэлапчъэ къом ышъхьэ зэрэпалъхьагъэр зэкIэми зэхахыгъэн фае. Сыхьати 6-кIэ бзэджашIэр къагъотыгъ. Ар Анапэ щыщ хъулъфыгъэу къычIэкIыгъ. Ахъщэ къы­лэжьыным пае Украинэм ихэушъхьа­фыкIыгъэ къулыкъухэм япшъэрылъ ыгъэ­цэкIагъ. Джы ащ пшъэдэкIыжь ыхьыщт. Ащ фэдэу бэ хъурэр. Ау сыдми ахъщэ къыпIэкIэхьан зэрэмылъэ­кIыщтыр зэкIэми къагурыIон фае, — къыIуагъ ЛIый Азэмат.
Нэужым мы лъэныкъомкIэ Мыекъопэ къэралыгъо технологическэ университетым IофшIэнэу ыгъэцакIэрэм БрантI Мурат къытегущыIагъ. Iофыгъоу къаIэтыгъэм фэгъэхьыгъэу шIэныгъэлэжьхэр, хэбзэухъумакIохэр, динлэжьхэр кон­ференцием къыщыгущыIагъэх, кIэух зэфэхьысыжьхэр ашIыгъэх.