Хэбзэгъэуцугъэм диштэу Iашэр, щэ-гынхэр, къэорэ пкъыгъохэр ежь-ежьырэу цIыфхэм атыжьынхэм фэ­гъэхьыгъэ брифинг мы ма­фэхэм зэхащагъ.

АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет Iоф­тхьабзэм кIэщакIо фэхъугъ. АР-м хэ-­
гъэгу кIоцI IофхэмкIэ и Министерствэ, хэбзэ къулыкъу зэфэшъхьафхэм ялIыкIохэр ащ хэлэжьагъэх.
Iашэр хэбзэнчъэу аIэкIэлъмэ, ар агъэ­федэмэ, пшъэдэкIыжь арагъэхьын зэри­лъэкIыщтыр, ежь-ежьырэу ар къулыкъу­шIэхэм аратыжьмэ ахъщэ къызэрэкIэ­кIощтыр цIыфхэм арагъэшIэныр ары пшъэ­рылъэу зэхэщакIохэм яIагъэр.
— ЦIыфхэм аIыгъ Iашэм сыдигъокIи щынагъо пылъ. Ащ къыхэкIыкIэ, респуб­ликэ хэбзэихъухьэ къулыкъу шъхьаIэм шапхъэхэм адиштэу ар зэрэптыжьыщтыр ыгъэнэфагъ. Ащ епхыгъэ Iофыгъохэм язэшIохын тикомитет ыуж ит. АР-м хэгъэгу кIоцI IофхэмкIэ и Министерствэ ыкIи Росгвардием и ГъэIорышIапIэу Адыгеим щыIэр тиIэпыIэгъух, — къы­Iуагъ Константин Щербаковым.
Зигъо къэсыгъэ Iофыгъоу мыр зэ­рэщытыр къыхигъэщыгъ АР-м хэгъэгу кIоцI IофхэмкIэ и Министерствэ участковэ уполномоченнэ къулыкъухэм ыкIи зыныбжь имыкъугъэхэм яIофхэмкIэ иподразделение иотдел ипащэ игуадзэу Мэлгощ Рэмэзан.
— Хэбзэнчъэу Iашэхэр къыращэхэу, агъэфедэхэу, хэбзэгъэуцугъэм диштэу ахэр къаIахэу бэрэ къыхэкIы. Ащ уголовнэ пшъэдэкIыжь пылъ. Джащ фэдэу зыгорэм Iашэр къыгъотын е нахьыжъхэм яягъэу къыфэнэжьын ылъэкIыщт. Ащ бырсыр къыпымыкIыным пае игъом полициер щыбгъэгъозэн фае, сыда пIомэ, илъэситф хьапс къыптыралъхьан алъэ­кIыщт, — къыIуагъ Мэлгощ Рэмэзан.
Непэ хэушъхьафыкIыгъэ дзэ операциеу кIорэм Iашэ ящыкIэгъэ зэпыт. ЦIыфхэм къатыжьыхэрэр тикъулыкъу­шIэхэмкIэ IэпыIэгъу зэрэхъурэр Росгвардием АР-мкIэ и ГъэIорышIапIэ ­икъулыкъушIэу Павел Никифоровым къыхи­гъэщыгъ.
Мы илъэсым республикэм щыпсэухэ­рэм Iэши 163-рэ къатыжьыгъ. Хэбзэнчъэу ахэр зиунэ илъхэри къулыкъушIэхэм агъэунэфы. ГъэрекIо Iэши 7-рэ щэ-­гыни 165-рэ хэбзэгъэуцугъэм диштэу къаIахыгъ.
Мыщ епхыгъэ игъэкIотыгъэ къэбарыр Адыгэ Республикэм хэгъэгу кIоцI Iоф­хэмкIэ и Министерствэ ыкIи Росгвардием и ГъэIорышIапIэу Адыгэ Респуб­ликэм щыIэм ясайтхэм арыт.