Мылъкум шIуагъэ къырагъэтызэ
2024-рэ илъэсым шъолъыр мылъкур зэрагъэфедагъэмкIэ Урысые Федерацием финансхэмкIэ и Министерствэ зэраухэсыгъэ шIыкIэм тетэу уплъэкIунхэр зэхищагъэх. Ахэм якIэуххэм атетэу мылъкур нахь шIогъэшхо къытэу зыгъэфедэгъэ шъолъыр 23-мэ Адыгеир ахагъэхьагъ. 2024-рэ илъэсым шъолъыр 41-мэ мылъкур уезэгъынэу агъэфедагъэу, шъолъыр 21-мэ дэеу агъэзекIуагъэу алъытагъ.
Мыгъэрэ уплъэкIунхэм нахь лъэныкъуабэ къызэлъырагъэубытыгъ, бюджет политикэмкIэ анахьэу анаIэ зытырагъэтын фаехэр ащ къыщыдалъытагъэх. Бюджет планированиер зэрэзэхащэрэр, бюджетыр зэрагъэцакIэрэр, къэралыгъо чIыфэр, мылъкур зэрагъэфедэрэр, муниципалитетхэм финанс зэфыщытыкIэу зэдыряIэхэр зэфахьысыжьыгъэх. Анахьэу анаIэ зытырагъэтыгъэр чIыфэхэр зытегъэкIыжьыгъэнхэмкIэ планхэр гъэхьазырыгъэнхэр, Урысыем финансхэмкIэ и Министерствэ дашIыгъэ зэзэгъыныгъэхэмкIэ пшъэрылъхэр гъэцэкIэгъэнхэр, ахэм афэгъэхьыгъэ отчетхэр игъом аIэкIэгъэхьэгъэнхэр ары.
Урысыем финансхэмкIэ и Министерствэ ирейтинг шъолъыр мылъкум игъэIорышIэнкIэ хэбзэ къулыкъухэм Iофышхо зэрэзэшIуахырэр къыушыхьатыгъ. Адыгэ Республикэм мыщкIэ гъэхъагъэ езыгъэшIыгъэр республикэм ифинансистхэм шIуагъэ къытэу яIофшIэн зэрэзэхащагъэр ары.
Шъугу къэтэгъэкIыжьы 2024-рэ илъэсым Адыгеим изэхэугъоегъэ бюджет идотацие зэрэмэкIагъэр, процент 13,9-рэ ар зэрэхъугъэр. 2024-рэ илъэсым республикэм икъэралыгъо чIыфэ къеIыхыгъ, къахалъхьагъэм нахьи целевой федеральнэ чIыфэу зытырагъэкIыжьыгъэр нахьыб. Мы аужырэ илъэсхэм АР-м ибюджет социальнэ Iофтхьабзэхэм афытегъэпсыхьагъэу щытыгъ. 2026 — 2028-рэ илъэсхэми Iофхэр зытетыгъэм тетэу къэнэжьыщтых. Къихьащт илъэсым социальнэ лъэныкъомкIэ сомэ миллиард 29-рэ хъурэ хъарджхэр ашIыщтых.
АР-м финансхэмкIэ и Министерствэ къызэритыгъэмкIэ, бюджет Iофхэр Адыгэ Республикэм нахьышIоу щызэхэщэгъэнхэм пае уплъэкIунхэм якIэуххэр къызфагъэфедэщтых.