Хэгъэгум и ЛIыхъужъхэм я Мафэ фэгъэхьыгъэ зэхахьэ Мыекъуапэ игупчэ мемориал тыгъуасэ щыкIуагъ.

Iофтхьабзэм хэлэжьагъэх АР-м и Правительствэ, къулыкъу зэфэшъхьаф­хэм, общественнэ организациехэм ялIыкIохэр, депутатхэр, хэбзэухъумакIо­хэр, юнармейцэхэр, волонтерхэр.
— Непэрэ мэфэкIым лъэхъэнэ зэфэшъхьафхэм ялIыхъужъхэр зэрепхых. Зи Хэгъэгу къэзыухъу­мэрэ хэтрэ цIыфи сэркIэ ЛIы­хъужъ. Сыд фэдэрэ зэпэуцужьи зыпсэ щызыгъэтIылъыгъэхэм, непэ хэушъхьафыкIыгъэ дзэ операцием зипшъэрылъхэр щызы­гъэцакIэхэрэм шъхьащэ афэтэшIы, — къыIуагъ Урысыем и ЛIыхъужъэу, АР-м и Къэралыгъо Совет — Хасэм и Тхьаматэ игуадзэу Цэй Эдуард.
— Тикъэралыгъо итарихъкIэ анахь мэхьанэшхо зиIэ мафэхэм мыр зыкIэ ащыщ. Хэгъэгур къэ­ухъумэгъэным зигъашIэ езыпхыгъэхэм, лIыгъэ, лIыхъужъныгъэ, пытагъэ зезыхьэгъэ ЛIыхъужъ пстэуми шъхьащэ зыщафэт­шIы­рэ маф. Хэгъэгур къэзыу­хъумэнэу къыхэзыхыгъэхэм сэри сащыщ, ащкIэ сиунагъуи, сигупсэхэри къэсэухъумэх. ИлъэситIу хъугъэу хэушъхьафыкIыгъэ дзэ операцием сыхэлажьэ, — къыIуагъ я 227-рэ артиллерийскэ бригадэм хэт Ренат Гариповым.
Iофтхьабзэм хэлэжьагъэхэм ЕгъэшIэрэ машIом ыкIи Советскэ Союзым и ЛIыхъужъыцIэ къызфагъэшъошагъэхэм ясаугъэтэу «ШIэжьым и Тхылъ» зыфиIорэм къэгъэгъэ блэрхэр ыкIи къэгъэ­гъэ Iэрамхэр акIэралъхьагъэх.
Iэшъынэ Сусан.