Хабзэ зэрэхъугъэу, гъэ къэс рагъэкIокIырэ лъэпкъ фестиваль-зэнэкъокъоу «Си Хэгъэгу» зыфиIоу Шъачэ щызэхащэрэм мыгъи цIыфыбэ хэлэжьагъ.

Дунаим тет лъэпкъхэм ыкIи ахэм якультурэ шъхьэкIафэ фэшIыгъэным кIэлэцIыкIухэмрэ ныбжьыкIэхэмрэ афэзыгъэсэрэ гъэсэныгъэ проектыр Шъачэ щыпсэурэмэ агу рихьыгъ. Ащ фэдэ зэнэкъокъур муниципали­тетым иадминистрацие шIэны­гъэмрэ гъэсэныгъэмрэкIэ и Гъэ­IорышIапIэрэ гъэсэныгъэм хэ­хъо­ныгъэ егъэшIыгъэнымкIэ къэлэ Гупчэмрэ зэгъусэхэу апэ зы­зэ­хащэм дэгъоу хъугъагъэ, ащ ­къыщыублагъэу ар гъэ къэс рагъэкIокIызэ ашIынэу рахъухьагъ. Пшъэрылъ шъхьаIэу фестивалым ыгъэцакIэрэм, Урысыеу лъэп­къишъэ пчъагъэ зэзыпхыгъэм имэхьанэ къизыIотыкIырэ цIэу фа­шIыгъэ «Си Хэгъэгу» зыфиIо­рэм къызэригъэшъыпкъэжьырэм нэмыкIэу, кIэлэцIыкIу творчествэм хэхъоныгъэ егъэшIыгъэным, ныдэлъфыбзэхэм якъэухъумэн, театральнэ искусствэр шIу ягъэ­лъэгъугъэным ыкIи сэнаущыгъэ зыхэлъ ныбжьыкIэхэм якъыхэ­гъэщын ар дэлажьэ.

Лъэпкъ зэфэшъхьафхэм япшы­сэмэ ыкIи ялитературнэ произведениемэ ахэт лIыхъужъхэр псаухэу, лъэпкъ культурэ зэ­фэшъхьафхэр къагъэлъагъохэзэ, ахэм абзэкIэ къэгущыIэхэзэ сценэм закъыщашIы. Актер ныбжьыкIэмэ яIэпэIэсэныгъэ, декорацие гъэкIэрэкIагъэхэм, шъошэ дахэхэм, хъурэ-шIэрэмэ уахэтым фэдэу къыпщагъэхъу.
— Фестиваль-зэнэкъокъоу «Си Хэгъэгу» зыфиIорэр 2006-рэ илъэ­сым къыщыублагъэу Шъачэ щызэхащэ. Тэ тикъалэу лъэпкъ зэ­фэ­шъхьафыбэ зыщыпсэурэмкIэ ащ мэхьанэшхо иI. Зэгъунэгъу зэфыщытыкIэхэр, шъхьадж икультурэ, ишэн-хабзэхэр зыфэдэр ащ фэдэ шIыкIэмкIэ зэрядгъашIэрэм ишIуа­гъэ къакIоу сэлъытэ. ЕтIани, мы Iофтхьабзэм узыIэпещэ, кIэлэ­цIыкIухэри кIэлэегъаджэхэри ащ хэлэжьэнхэр ренэу ягуап, — ­къыкIегъэтхъы муниципалитетым иадминистрацие шIэны­гъэмрэ гъэсэныгъэмрэкIэ и Гъэ­IорышIапIэ ипащэу Ольга Медведевам.

Апэрэу фестивалыр мэфитIу шапхъэм илъэу кIуагъэ. Гимназиеу N 9-м щырагъэкIокIыгъэ гала-концертым театральнэ къэгъэлъэгъон 29-рэ хэтыгъ, ахэр адыгабзэкIэ, ермэлыбзэкIэ, бело­русыбзэкIэ, болгарыбзэкIэ, урымыбзэкIэ, грузиныбзэкIэ, езидыбзэкIэ, молдавыбзэкIэ, чэчэныбзэкIэ ыкIи чувашыбзэкIэ къатыгъэх, аныбжьхэмкIэ гощыгъэхэу купиплI хъущтыгъэх, «Театральнэ творчествэр» ыкIи «ГъэцэкIэн творчествэр» зыфиIорэ лъэны­къо­хэмкIэ зэнэкъокъугъэх.
КIэлэцIыкIу IыгъыпIэмэ ачIэс­хэр ыкIи еджапIэмэ яублэпIэ классмэ арыс кIэлэеджакIохэр зыхэхьэгъэхэ анахьыкIэ купым щыщхэу текIоныгъэ къыдэзыхыгъэхэр: кIэлэцIыкIу IыгъыпIэхэу NN 46-м, 67-м, 120-м, 136-м ащаIыгъхэр ыкIи ШэхэкIэй дэт гурыт еджапIэу N 90-м икIэлэ­еджакIохэр. Зэхэпхъэгъэ ыкIи на­хьыжъ купхэмкIэ атекIуагъэх гимназиехэу N 1-м ыкIи N 6-м, еджапIэхэу NN 31-м, 89-м ыкIи къуаджэу Хьаджыкъо иеджапIэу N 94-м икIэлэеджакIохэр.
Гала-концертым икIэухым те­кIоныгъэ къыдэзыхыгъэхэр мэ-фэкI шIыкIэм тетэу къыхагъэ­щыгъэх.
— Зэнэкъокъур гъэшIэгъонэу, имэхьанэ гъэ къэс зыкъиIэтэу гъэпсыгъэ. Театрализованнэ къэ­гъэлъэгъонхэм кIэлэцIыкIумэ ягу­къэкIхэм зарагъэушъомбгъу, гукъыдэчъхэр нахьыбэрэ къа­фегъакIо, ятворчествэ хегъахъо, искусствэм ишIуагъэкIэ ягупшы­сэхэри агу щышIэхэрэри къыра­IотыкIынхэу загъасэ, — къеIуатэ еджапIэу N 90-м икIэлэегъаджэу ЛIыф Мирэ. — Мэхьанэ иIэу джыри зы лъэныкъу — къахэщэу адыгабзэу аIулъым хахъо, яжабзэ тIупщыгъэу мэгущыIэшъух.
Ныбэ Анзор.