Адыгеим и ЛIышъхьэу КъумпIыл Мурат Херсон хэкум икъалэу Геническэ, республикэр зыдеIэрэ ыкIи ынаIэ зытыригъэтырэм, джырэблагъэ щыIагъ. Адыгеим икIыгъэ псэолъэшIхэм гъэцэкIэжьын IофшIэнхэр, кIымафэм изыфэгъэхьазырын епхыгъэ Iофтхьабзэхэр зыщызэшIуахыхэрэ псэуалъэхэу социальнэ мэхьанэ зиIэхэм ЛIышъхьэр ащыIагъ.

Iофхэр зыщыкIохэрэ чIыпIэхэм зыкIэ ащыщ Вольновскэ еджапIэу Нижнесерогозскэ муниципальнэ коим итыр. Тиреспубликэ икIыгъэ подряднэ организацием гъэсэныгъэ зыщарагъэгъотырэ учреждением ришIылIэрэ игъэ­кIотыгъэ гъэцэкIэжьыныр ыкIэм фэкIо. КъумпIыл Мурат IофшIэнхэм уасэ афишIыгъ ыкIи мы илъэсым ыкIэм ехъулIэу псэуалъэр атынэу пшъэрылъ афигъэуцугъ.
Унэу агъэцэкIэжьрэм изы Iахь джы­рэ уахътэм диштэрэ кIашъохэр фашIыгъэх, дэкIояпIэр, гъэпскIыпIэ-тхьэкIапIэхэр зэтырагъэпсыхьэх, пщэрыхьапIэр, спортзалыр агъэцэкIэжьыгъэх, унэ IэпыIэгъухэу хэтхэм яджэхашъохэр зэблахъугъэх. Ащ нэмыкIэу еджапIэм къыпэIулъ чIыпIэр зэтырагъэпсыхьагъ, джырэ уахътэм диштэрэ спорт гупчэ хагъэуцуагъ.

А пстэуми адакIоу «аварийнэ бригадэу» республикэм икIыгъэр Геническэ коим исоциальнэ псэуалъэхэр кIымафэм фэгъэхьазырыгъэнхэм хэлажьэ. Мы аужырэ мафэхэм Геническэ дэт еджапIэу N 4-м игъэфэбапIэ агъэцэкIэжьыгъ, кIэлэцIыкIу IыгъыпIэу «Пшысэм» инасос зэблахъугъ, еджэпIэ-интернатэу Геническэ дэтым къэз­гъэфэбэрэ псэуалъэу хэтыр агъэтэрэзыгъ, джы нэмыкI социальнэ псэуалъэ­хэр чэзыум къежэх.

Ащ нэмыкIэу врачхэр Херсон хэкум агъэкIуагъэх цIыфхэу ащ щыпсэухэрэм медицинэ IэпыIэгъу аратыным пае. Мыекъопэ къэлэ IэзапIэм иIофышIэхэу Виктор Чебыкинымрэ Аулъэ Нурдинрэ тхьамыкIагъохэм ахэфагъэхэр къэгъэнэ­жьыгъэнхэмкIэ федеральнэ Гупчэм хэтхэр ягъусэхэу Херсон хэкум Iоф къыщашIэщт.

БлэкIыгъэ илъэсищым къыкIоцI Адыгеим икIыгъэ псэолъэшIхэм Геническэ пшъэрылъыбэ зыгъэцэкIэрэ Гупчэ, физкультурэмрэ псауныгъэм игъэпытэнрэ атегъэпсыхьэгъэ псэолъи 4, спорт гупчи 4, кIэлэцIыкIу джэгупIэ 12 щашIыгъ, ахэм къапэIулъ чIыпIэхэр зэтырагъэ­псыхьагъэх, еджэпIи 4-мэ ыкIи кIэлэцIыкIу IыгъыпIи 2-мэ гъэцэкIэжьын Iоф­шIэнхэр арашIылIагъэх, краеведческэ музеири нахь агъэкIэжьыгъ. Партиеу «Единэ Россием» ыпкъ къикIэу, Народнэ фронтыр, Адыгеим ибизнес купхэр ыкIи щыпсэухэрэр хэлажьэхэзэ тичIыпIакIэхэм ыкIи тидзэкIолIхэм апае шIушIэ хьылъэ тонн мини 5-м ехъу къаугъоигъ ыкIи хэушъхьафыкIыгъэ дзэ операциер зыкIорэ илъэсхэм къакIоцI аIэкIагъэ­хьагъ. ИлъэсыкIэм ехъулIэу, Адыгеим ипэублэ классхэм арысхэм афэдэу, Геническэ районым иеджапIэхэм ачIэс­хэми IэшIу-IушIу шIухьафтынхэр аратых, мы илъэсми а хэбзэ шIагъор лъагъэ­кIотэщт.

«Тэ къыдгурэIо Украинэм ибоевикхэм илъэсыбэ хъугъэу хьазаб зэрагъэлъэгъу­рэ тихэгъэгогъухэр чIыпIэ къин зэритхэр. Арышъ, тызфэгъэзэгъэ, тынаIэ зытед­гъэ­­тырэ чIыпIэхэм лъэныкъо пстэумкIи тадеIэщт. Мэхьанэшхо зиIэ псэуалъэхэр тэшIых ыкIи тэгъэцэкIэжьых, Херсон хэкум щыщ кIэлэцIыкIухэр загъэпсэфы­нэу Адыгеим къэтэщэх, Херсон хэкум врачхэр ыкIи тхьамыкIагъо къызэхъу­лIэхэрэм IэпыIэгъу язытыщт купхэр тэгъа­кIох, а шъолъырым иныбжьыкIэ анахь чанхэр гъэсэныгъэм, культурэм ыкIи спортым япхыгъэ Iофтхьабзэу зэхатщэхэрэм къахэтэгъэлажьэх. ТапэкIи мамыр щыIакIэр шъолъырыкIэхэм зыпкъ ащигъэуцо­жьыгъэным тыдэлэ­жьэщт, социальнэ фэIо-фа­шIэхэр ыкIи къэралыгъо IэпыIэгъур ахэм ащыпсэухэ­рэм ядгъэгъотыщт», — къы­Iуагъ КъумпIыл Мурат.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.