КъумпIыл Мурат: «КIэлэцIыкIухэм амал дэгъухэр ядгъэгъотынхэ фае»
УФ-м и Президентэу Владимир Путиныр кIэщакIо зыфэхъугъэ лъэпкъ проектэу «Унагъом» къыдыхэлъытагъэу кIэлэцIыкIу IыгъыпIэхэм ягъэцэкIэжьынкIэ программэхэр гъэцэкIагъэ зэрэхъухэрэр Адыгеим и ЛIышъхьэу КъумпIыл Мурат ыуплъэкIугъ.
Мы илъэсым республикэм еджапIэм джыри мыкIорэ кIэлэцIыкIухэм гъэсэныгъэ зыщарагъэгъотырэ организациитIу программэм хэхьагъ: кIэлэцIыкIу IыгъыпIэу «Маленькая страна» зыфиIоу Мыекъуапэ дэтымрэ «Жъогъобын» зыцIэу Адыгэкъалэ щагъэпсыгъэмрэ.
Адыгеим и ЛIышъхьэ ежь ышъхьэкIэ ыуплъэкIугъ игъэкIотыгъэ гъэцэкIэжьынхэр зэрэкIохэрэр. ТапэкIэ Адыгэкъалэ дэт кIэлэцIыкIу IыгъыпIэм игъэцэкIэжьын КъумпIыл Мурат уасэ фишIыгъагъ. Джы республикэм ипащэ кIэлэцIыкIу IыгъыпIэу N 6-м IофшIэнхэр ыкIэм зэрэщыфакIохэрэр зэригъэлъэгъугъ.
Мыекъуапэ имэрэу Геннадий Митрофановым къызэриIуагъэмкIэ, гъэцэкIэжьын IофшIэнхэм ялъэхъан подрядчикым игъэкIотыгъэ гъэцэкIэжьыныр дэгъоу ухыгъэ хъуным пае джыри зэшIохыгъэн фэе Iофхэр къыхигъэщыгъэх. Ащ къыхэкIэу пIалъэр лъагъэкIотэгъагъ. Джы псэуалъэр 2026-рэ илъэсым щылэ мазэм къызэIуахынэу щыт.
КIэлэцIыкIу IыгъыпIэу «Маленькая страна» зыфиIорэм игъэцэкIэжьын сомэ миллион 72,2-рэ фэдиз пэIуагъэхьагъ, ащ ызыныкъо фэдизыр федеральнэ бюджетым къыхэкIыгъ. Ахъщэм ишIуагъэкIэ тIоу зэтет унэм ыгупэ зэтырагъэпсыхьагъ, ыкIоцI гъэцэкIэжьын IофшIэнхэр рашIылIагъэх, ахэм къахиубытагъэх пщэрыхьапIэр, зыщыгыкIэхэрэр. Псэуалъэм кIэу шъхьаныгъупчъэхэр, пчъэхэр халъхьагъэх, къекIолIэрэ гъогухэри агъэкIэжьыгъэх. Электричествэ рыкIуапIэхэр зэкIэ зэблахъугъэх, инженер коммуникациехэри кIэу хагъэуцуагъэх. Илъэсым ыкIэм ехъулIэу мэшIогъэкIосэ ыкIи псэуалъэм икъэухъумэнкIэ макъэ къэзыгъэIурэ пкъыгъохэр хагъэуцощтых.
Республикэм и ЛIышъхьэ анаIэ тыраригъэдзагъ гуетыныгъэ хэлъэу IофшIэнхэр зэкIэ икъоу гъэцэкIэгъэнхэ зэрэфаем. Щынэгъончъэу щыт Iэрыфэгъу псэуалъэм кIэлэцIыкIухэм къыфагъэзэжьын фае.
«Республикэм гъэсэныгъэмкIэ иинфраструктурэ зэтегъэпсыхьэгъэным ренэу Iоф дэтэшIэ. Джырэ уахътэм диштэрэ щынэгъончъэ амалхэр къалэми, къуаджэми кIэлэцIыкIухэм ащыряIэным мэхьанэшхо иI. Псэуалъэу зыпкъ идгъэуцожьырэ пэпчъ тикIэлэцIыкIухэм янеущрэ мафэ зыфэдэщтыр епхыгъ. Арышъ, а IофшIэныр лъыдгъэкIотэщт», — къыIуагъ Адыгеим и ЛIышъхьэ.
КIэлэцIыкIухэр зычIэс учреждениехэм ягъэкIэжьын ипрограммэ мы илъэсым республикэм ублагъэ щыхъугъ. КIэлэцIыкIу IыгъыпIитIу агъэцэкIэжьыгъ. Илъэсэу къихьащтым джыри 6 зэтырагъэпсыхьащт, 2007-рэ илъэсым – 8.