АдыгабзэмкIэ Советэу АР-м и ЛIышъхьэ дэжь щызэхэщагъэм изэхэсыгъо Правительствэр зычIэт унэм щыкIуагъ. Адыгеим и ЛIышъхьэу КъумпIыл Мурат пшъэрылъ зэрэфишIыгъэм тетэу АР-м иминистрэхэм я Кабинет и Тхьаматэ игуадзэу, финансхэмкIэ министрэу Виктор Орловым Iофтхьабзэр зэри­щагъ.

Зэхэсыгъом хэлэжьагъэх АР-м гъэсэныгъэмрэ шIэныгъэмрэкIэ иминистрэ иапэрэ гуадзэу Пэрэныкъо Сусаннэ, культурэмкIэ министрэм игуадзэу Кушъу Светланэ, гуманитар ушэтынхэмкIэ Адыгэ республикэ институтэу Т. М. КIэращэм ыцIэ зыхьырэм, адыгабзэм икъэухъумэнрэ изэгъэшIэнрэ лъэныкъуабэ къызэлъызыубытырэ екIолIакIэ къыфэзыгъотырэ Проектнэ офисым япащэу ЛIыIужъу Адам, Къэралыгъо Советым — Хасэм, телерадиокомпаниеу «Адыгеим», гъэзетэу «Адыгэ макъэм» ялIыкIохэр, гъэсэныгъэмкIэ район гъэIорышIапIэхэм япащэхэр, нэмыкIхэри.
АР-м иминистрэхэм я Кабинет и Тхьаматэ игуадзэ къызэрэхигъэщыгъэмкIэ, адыгабзэм изэгъэшIэн, зэреджэщтхэ тхылъхэу джырэ шапхъэхэм адиштэхэрэм ягъэфедэн, кIэлэегъаджэхэм IэпыIэгъу ягъэгъотыгъэным япхыгъэ пшъэрылъхэм язэшIохынкIэ а уахътэм бэ ашIагъэр.
«Проектнэ офисым тыригъусэу а Iофыгъо пстэуми язэшIохын тыдэлажьэ. Шъугу къэсэгъэкIыжьы илъэсихым ехъугъэу гъэхъагъэ хэлъэу офисым Iоф зэришIэрэр. Ар зыфытегъэпсыхьагъэр адыгабзэм икъэухъумэнкIэ ыкIи изэгъэшIэнкIэ научнэ лъапсэ зиIэ хэкIыпIэхэр къэгъотыгъэнхэр ары. А Iофэу зэдэдгъэцакIэрэм федэ къызэритырэр тинэрылъэгъу», — къыIуагъ Виктор Орловым.
А 1 – 11-рэ классхэм арыс кIэлэеджакIохэу адыгабзэ зыIумылъхэм апае предметыкIэу «къэралыгъуабзэр (адыгабзэр)» зэрарагъэхьыщт тхылъхэр зэрагъэхьазыр­хэрэм фэгъэхьыгъэу сэнэхьат IэпэIэсэныгъэм зыкъе­гъэIэтыгъэнымкIэ Адыгэ республикэ институтым ипащэу Тхьагъу Фатимэ къафиIотагъ. Гурыт еджапIэу N 1-м икIэлэегъаджэу Уджыхъу Саидэрэ гуманитар ушэтынхэмкIэ Адыгэ республикэ институтым инаучнэ IофышIэ шъхьаIэу Анцокъо Сурэтрэ проектыкIэр зэрэпхыращыщт шIыкIэм къытегущыIагъэх. ПредметыкIэм дакIоу адыгабзэмрэ литературэмрэ нахь куоу зэгъэшIэгъэнхэм тегъэпсыхьэгъэ предметэу «ныдэлъфыбзэри» еджэпIэ программэм къыхагъэнэжьыщт.
АР-м культурэмкIэ иминистрэ игуадзэу Кушъу Светланэ адыгабзэм изэгъэшIэнкIэ культурэм иучреждениехэм Iофэу ашIэрэм къытегущыIагъ. Илъэс къэс нэбгырэ мин 60 фэдиз зыхэлэжьэрэ Iофтхьэбзэ 700-м ехъу Министерствэм зэрэзэхищэрэр ащ къыхигъэщыгъ.
Адыгабзэмрэ литературэмрэ язэгъэшIэнкIэ ыкIи якъэухъумэнкIэ гуманитар ушэтынхэмкIэ Адыгэ респуб­ликэ институтым Iофэу зэшIуихыхэрэми шъхьафэу атегущыIагъэх. Проектнэ офисым зэрихьэрэ Iофтхьабзэ­хэу глобализацием илъэхъан адыгабзэр къэухъумэгъэ­ным ыкIи хэхъоныгъэ егъэшIыгъэным, шъолъыр гъунэгъухэм IофшIэкIэ амалышIоу яIэхэр зэгъэшIэгъэнхэм, бзэм епхыгъэ программэхэр ыкIи зэрэрагъэджэрэ тхылъхэр гъэхьазырыгъэнхэм, аудио-видео шIыкIэхэр гъэфедэгъэнхэм, проектэу «Къалэу Мыекъуапэ зекIонымкIэ икод» зыфиIорэм ыкIи нэмыкIхэм япхыгъэхэм учреждением ипащэу ЛIыIужъу Адам анаIэ тыраригъэ­дзагъ. Мобильнэ гуадзэу «адыгабз» зыфиIоу бэмышIэу агъэфедэ хъугъэм, адыгабзэкIэ къафаIуатэзэ Мыекъуа­пэ зекIохэр къызэрэщыращэкIыхэрэм афэгъэхьыгъэу офисым ипащэ къафиIотагъ.
Зэхэсыгъом икIэух предметэу «Адыгэ Республикэм икъэралыгъуабз (адыгабз)» зыфиIорэмкIэ зэрэрагъэ­джэщтхэ, нэрылъэгъу IэпыIэгъу тхылъхэм язэхэгъэуцон ыкIи федеральнэ тхылъхэм ахэр ахэгъэхьэгъэнхэм атегъэпсыхьэгъэ унашъохэр аштагъэх. КIэлэцIыкIу IыгъыпIэу N 9-у «Жъогъобыным» бзэ заулэ щагъэфедэнэу игъо афалъэгъугъ. Темыр Осетиемрэ Къалмыкъымрэ щысэ атырахызэ, республикэ гимназием иублэпIэ классхэм бзэ заулэкIэ ащырагъэджэнхэу пшъэрылъ афашIыгъ.
Мультфильмхэу зэрадзэкIыжьыгъэхэр, мобильнэ гуадзэхэр, кIэлэцIыкIухэм атегъэпсыхьэгъэ пшысэхэр ыкIи нэмыкIхэр жъугъэу алъыгъэIэсыгъэн зэрэфаер зэхэсыгъом анахьэу къыщыхагъэщыгъ. ЕджапIэм щарагъэхьыщт предметыкIэу «къэралыгъуабзэр (адыгабзэр)» зыфиIорэм пае гъогу картэ зэхагъэуцонэу, чэзыу пэпчъ загъэцэкIэщт пIалъэхэр агъэнэфэнхэу пшъэрылъ афашIыгъ.