Ныдэлъфыбзэр языгъашIэхэрэм я Урысые зэхахьэ мы мафэхэм Москва щыкIуагъ.

Тикъэралыгъо щыпсэурэ цIыф лъэпкъ зэфэшъхьафхэм абзэхэр къы­зэтегъэнэжьыгъэнхэм ыкIи хэхъо­ныгъэхэр ягъэшIыгъэнхэм апае шIэгъэн фаехэм ащ щытегущыIагъэх. Урысыем ичIыпIэ зэфэшъхьафхэм къарыкIыгъэ нэбгырэ 300 фэдиз Iоф­тхьабзэм хэлэжьагъ. Ахэм ахэтыгъэх гурыт ыкIи апшъэрэ еджапIэхэм якIэ­лэегъаджэхэр, шIэныгъэлэжьхэр, хэ­бзэ къулыкъухэм ялIыкIохэр. Адыгеим икIыгъэхэри ащ хэлэжьагъэх, адыгабзэм изэгъэшIэнкIэ тишъолъыр щагъэцакIэрэр къыщагъэлъэгъуагъ.
Урысые Федерацием просвеще­ниемкIэ и Министерствэрэ ныдэлъфы­бзэхэмкIэ Федеральнэ институтымрэ зэхахьэм кIэщакIо фэхъугъэх.
АР-м гъэсэныгъэмрэ шIэны­гъэм­рэкIэ и Министерствэ испециалист-­эксперт шъхьаIэу Мамый Мариет къызэрэтиIуагъэмкIэ, ныдэлъфыбзэм икъызэтегъэнэжьынкIэ мыщ фэдэ Iоф­тхьабзэхэм мэхьанэшхо яI. Лъэныкъоу «Ныдэлъфыбзэр ягъэшIэ­гъэнымкIэ шIыкIакIэхэр: теорием къыщегъэжьагъэу практикэм нэс» зыфиIорэм «Адыгабзэр: азбукэм къы­щегъэжьагъэу мультфильмэхэм нэс шIыкIакIэхэр» зыцIэр Мариет къы­щигъэлъэгъуагъ. ЗэкIэмкIи шъолъыр 15-мэ ястендхэр щагъэпсыгъагъэх.
Джащ фэдэу Адыгеим ишIэны­гъэлэжьэу, гуманитар ушэтынхэмкIэ Адыгэ республикэ институтым иотдел ипащэу, филологие шIэныгъэхэмкIэ докторэу Анцокъо Сурэт адыгабзэм икъызэтегъэнэжьынкIэ ыкIи хэхъоныгъэхэр егъэшIыгъэнхэмкIэ институтым зэшIуихыхэрэм къатегущыIагъ.
Урысые Федерацием ишъолъырхэм якъэралыгъуабзэхэм ыкIи яны­дэлъфыбзэхэм япхыгъэ егъэджэн­методическэ комплексхэм язэхэ­гъэуцон ятIонэрэ мафэр фэгъэхьы­гъагъ. Эксперт площадки 6-мэ Iоф ашIагъ. Анцокъо Сурэт «Урысые Фе­дерацием иреспубликэхэм якъэралыгъуабзэхэр «Егъэджэн пред­метхэм яконцепцие» зыфиIорэм хэлэжьагъ ыкIи доклад къыщишIыгъ. Ныдэлъфыбзэхэм язэгъэшIэнкIэ екIо­лIакIэу щыIэхэм, тхылъхэм язэхэ­гъэуцон Iофыгъоу пылъхэм, кIэлэ­цIыкIу IыгъыпIэхэм мы лъэныкъомкIэ Iоф зэрашIэрэм хэхъоныгъэ егъэ­шIыгъэнымкIэ шIэгъэн фаехэм ыкIи нэмыкIхэм къэзэрэугъоигъэхэр атегущыIагъэх.
Адыгэ къэралыгъо университетым ипрофессорэу, кIэлэегъэджэ шIэныгъэхэмкIэ докторэу Бэгъушъэ Мирэ ныбжьыкIэхэм шIэныгъэ-методикэ шапхъэхэм алъэныкъокIэ хэхъоныгъэ ашIыным фэгъэхьыгъэу къэгущыIагъ.
ДЕЛЭКЪО Анет.