Урысые зэнэкъокъоу «Большая перемена» зыфиIорэм анахь дэгъоу зыкъыщызгъэлъэгъуагъэхэм нэIуасэ шъуафэтэшIы.

Ахэм ащыщ къуаджэу Нэчэрэзые щыщ Бэрэтэрэ Бислъан. Ащ апэрэ шъуашэ зиIэ шIухьафтын ыкIи сомэ миллион къыфагъэшъошагъ.
АР-м и ЛIышъхьэу КъумпIыл Мурат ренэу къызэриIоу, сэнаущыгъэ зыхэлъ ныбжьыкIэу ыкIи кIэлэцIыкIоу Адыгеим исыр макIэп, ахэр къыхэгъэщыгъэнхэм ыкIи IэпыIэгъу афэхъунхэм мэхьанэшхо раты. Федеральнэ, шъолъыр ыкIи муниципальнэ хэбзэ къулыкъухэр зэкъотхэу еджапIэхэм, колледжхэм, университетхэм ащеджэхэрэм яшIэныгъэхэм, ягъэхъагъэ­хэм ахагъэхъоным пае ищыкIагъэр зэкIэ арагъэгъоты.

«Большая перемена» зыфиIорэр «Апэ­рэхэм ядвижение» ипроект. Росмолодежыр, Урысыем просвещениемкIэ и Министерствэ, Урысыем гъэсэныгъэмкIэ и Министерствэ яIэпыIэгъоу а зэнэ­къо­къур зэхащэ. Мы илъэсым къыщегъэжьагъэу лъэпкъ проектэу «НыбжьыкIэхэмрэ кIэлэцIыкIухэмрэ» зыцIэм ар щыщ хъугъэ.

Мы мафэхэм Урысые зэнэкъокъум я lV-рэ чэзыу иаужырэ уцугъо Нижний Новгород щыкIуагъ. Гурыт сэнэхьат зэзыгъэгъотырэ студентхэр ары ащ хэлэжьагъэхэр. ТекIоныгъэ къыдэзыхыгъэ­хэм ащыщ Андырхъое Хъусен ыцIэ зыхьырэ кIэлэегъэджэ колледжым иятIо­нэрэ курс щеджэрэ Кира Овчинниковар. Ащ а I-рэ шъуашэ зиIэ шIухьафтын ыкIи сомэ мин 200 къыфагъэшъошагъ.
Кирэ гъэрекIо жъоныгъокIэ мазэм къыщегъэжьагъэу зэнэкъокъум зыфигъэ­хьазырыгъ. АщкIэ IэпыIэгъу къыфэхъугъэх пащэм гъэсэныгъэ IофхэмкIэ игуа­дзэу Фарида Мстоевар. Зэгъусэхэу ахэр уцугъохэм апхырыкIыгъэх, апэрэ уцу­гъом пэIудзыгъэ шIыкIэм тетэу портфолиор къагъэлъэгъуагъ, видеовизиткэ ашIыгъ, кейсыр зэрифэшъуашэу агъэпсыгъ. Финалныкъор Налщык щыкIуагъ.
Фарида Мстоевам Кирэ ятIонэрэ уцугъом дэгъу дэдэу фигъэхьазырыгъ. Финалныкъом ыкIи кIэух едзыгъом Кирэ зыкъызэращигъэлъэгъуагъэм осэ ин къыфашIыгъ. ТекIоныгъэ къыдихыгъ.
Мыекъопэ къэралыгъо технологическэ университетым иполитехническэ колледж истудентэу ЦIыкIушъо Руслъан ятIонэрэ шъуашъэ зиIэ шIухьафтыныр къылэжьыгъ. «ЧIыопсыр къызэтегъан» зыфи­Iорэ лъэныкъом ар хэлэжьагъ.
Руслъан зэрифэшъуашэу кейсовэ Iоф­шIэнхэр ыгъэцэкIагъэх, ипроект къыгъэ­шъыпкъэжьыгъ, шIэныгъэ дэгъоу IэкIэлъым дакIоу пэщэныгъэ нэшанэхэр зэриIэр къыгъэлъэгъуагъ.
ТекIоныгъэ къыдэзыхыгъэхэм тафэгушIо, тапэкIи ягъэхъагъэхэм ахагъэ­хъонэу тафэлъаIо.