КIэлэегъэджэ ныбжьыкIэхэм язэнэкъокъу
Республикэ зэнэкъокъоу «ЕджэпIакIэм — кIэлэегъэджакIэхэр» зыфиIорэр аублагъ.
Адыгэ кIэлэегъэджэ колледжэу Андырхъое Хъусен ыцIэ зыхьырэм мэфэкI шIыкIэм тетэу ар къыщызэIуахыгъ.
Зэнэкъокъум мэзитIум къыщегъэжьагъэу илъэсищым нэсэу Iоф зышIэрэ кIэлэегъэджэ 12 хэлажьэ. Мэфэ заулэм ахэм лъэныкъо зэфэшъхьафхэмкIэ заушэтыщт.
АР-м шIэныгъэмрэ гъэсэныгъэмрэкIэ иминистрэу Евгений Лебедевым ыцIэкIэ къэзэрэугъоигъэхэм шIуфэс къарихыгъ ащ игуадзэу Артем Журавель. Мы зэнэкъокъур анахь гъэшIэгъонхэм зэращыщыр, кIэлэегъаджэ пэпчъ IофшIэныр ныбжьыкIэу зэрэригъэжьагъэр къыIуагъ. НыбжьыкIэхэм яIофшIэнкIэ хэхъоныгъэхэр ашIынхэм, яшIэныгъэхэм ахагъэхъоным апае мыщ фэдэ зэнэкъокъухэм яшIуагъэ къызэрэкIорэр къыхигъэщыгъ.
— КIэлэегъэджэ сэнэхьатым мэхьанэшхо зэриIэр зэкIэми тэшIэ. А гъогум шъутехьагъ, хэхъоныгъэхэр шъушIыхэзэ шъуипшъэрылъхэр жъугъэцэкIэнхэу, гъэсэныгъэм исистемэ хэхъоныгъэхэр ышIынхэм шъуиIахьышIу хэшъулъхьанэу тышъущэгугъы. ШIэныгъэу шъуIэкIэлъыр къэжъугъэлъагъу, лъэныкъуакIэхэр зэжъугъашIэх. ШъуиIофшIэн ешъогъэжьэ къодый, шъуигъогу зэIухыгъ, гъэхъагъэхэр зэрэшъуиIэщтхэм тицыхьэ телъ, — къыIуагъ Артем Журавель.
Урысыем ипрофсоюзхэм я Адыгэ республикэ организацие гъэсэныгъэм иIофышIэхэмкIэ ясоюз ипащэу Сергей Кошкиныр, Адыгэ кIэлэегъэджэ колледжэу Андырхъое Хъусен ыцIэ зыхьырэм ипащэу Даниил Коржаковыр, 2024-рэ илъэсым «ЕджэпIакIэм — кIэлэегъэджакIэхэр» зыфиIорэ зэнэкъокъум текIоныгъэ къыщыдэзыхыгъэхэр Iофтхьабзэм хэлэжьагъэх, зэнэкъокъум хэлажьэхэрэм яшIэныгъэхэр зэрифэшъуашэу къагъэлъэгъонэу къафэлъэIуагъэх.
Зэнэкъокъум къыдыхэлъытагъэу «Здравствуйте, это я!» зыфиIорэ лъэныкъомкIэ кIэлэегъэджэ ныбжьыкIэхэм заушэтыгъ. Ащ ыуж нэбгырэ пэпчъ предметымкIэ егъэджэнхэр зэхищэщт, «Мыр дэгъоу къыздэхъу» зыфиIорэ лъэныкъомкIи заушэтынэу апэ илъ. Ащ пхырыкIыхэрэм общественнэ мэхьанэ зиIэ темэу ежьхэм къашIошIырэмкIэ зыкъагъэлъэгъощт. КIэухым хъугъэ-шIэгъэ зэфэшъхьафхэм хэкIыпIэу къафагъотыхэрэм уасэ афашIыщт. Тхьамафэм къыкIоцI республикэм икIэлэегъэджэ ныбжьыкIэхэр зэнэкъокъущтых. Тыгъэгъазэм и 12-м зэфэхьысыжьхэр къэнэфэщтых, анахь дэгъоу зыкъэзыгъэлъэгъуагъэхэр агъэшIощтых.
ДЕЛЭКЪО Анет.