ЗипсауныгъэкIэ пыч зиIэхэм Адыгэ Респуб­ликэм ишIухьафтынхэр Правительствэм и Унэ щаритыжьыгъэх Адыгеим и ЛIышъхьэу КъумпIыл Мурат.

ЗэIукIэгъум иублэгъум къалэжьыгъэ шIухьафтынхэм апае къэзэрэугъоигъэхэм республикэм и ЛIышъхьэ афэгушIуагъ ыкIи къыхигъэщыгъ нэбгырэ пэпчъ гуетыныгъэмрэ пытагъэмрэ ящысэу зэрэщытыр.
«Шъо шъушъхьэкIэ къы­шъорыкIуагъэм гушхуагъэ къыпхелъхьэ. ЦIыфым ицыхьэ зытелъыжьэу, сыд фэдэрэ къиныгъохэми за­къы­римы­гъащтэ зыхъукIэ, бэ зэ­шIуихын зэрилъэкIыщтыр ащ къе­гъэлъагъо. НыбжьыкIэ­хэри шIухьафтын зэратыхэрэм зэ­ращыщхэри тигуап. Шъо чанэу творчествэм, спортым, еджэным ыкIи общественнэ щыIакIэм шъуахэлажьэ. Шъуи­гуетыныгъэрэ гъэхъагъэу шъу­шIыхэрэмрэ апае лъытэныгъэ ин къэшъулэжьыгъ. ШъуишIэныгъэхэм, шъуиамал­хэм, шъуигуетыныгъэ нахь ахэжъугъахъозэ федэ къэ­шъухьыным шъунаIэ зэрэтежъугъэтырэм пае сышъу­фэраз», — къыIуагъ АР-м и ЛIышъхьэ.
КъумпIыл Мурат къызэ­рэхигъэщыгъэмкIэ, цIыфым ышъхьэкIэ гуетыныгъэ хэлъы­ным имызакъоу ежь амалэу иIэхэм атетэу щыIэныгъэм хэгъозэнымкIи ищыкIагъэхэр егъэгъотыгъэнхэ фае. Респуб­ликэм ипащэхэм Адыгеим щыпсэурэ пэпчъ, ахэм ахэ­хьэх сэкъатныгъэ зиIэхэри, IэпыIэгъу афэхъунхэм анаIэ тырагъэты. «НепэкIэ Адыгеим зипсауныгъэкIэ пыч зиIэ нэб­гырэ мин 30,6-м ехъу ис. ЩыIэныгъэр нахь Iэрыфэгъу ахэм афэшIыгъэным ренэу тыдэлажьэ. НепэкIэ анахь мэхьанэ зиIэ псэуалъэхэм янахьыбэхэр: IэзапIэхэр, куль­турэм, спортым ыкIи гъэ­сэныгъэм яучреждениехэр ахэм афытегъэпсыхьагъэх. Джы анахьэу тынаIэ зытедгъэтыхэрэм ащыщ урамхэм пэрыохъу щымыIэу ащызекIонхэу ыкIи транспортым итIысхьанхэм иамал яIэнэу. «Социальнэ таксикIэ» заджэхэрэри рай­он пстэуми ащагъэфедэх. Ахъщэу къафатIупщырэр игъом алъыIэсыным, Iэзэгъу уцхэр ыкIи путевкэхэр аIэкIэгъэхьэгъэнхэм лъэшэу тынаIэ атетэгъэты. Анахь шъхьаIэхэм зыкIэ ащыщ IофшIэн къагъотынымкIэ IэпыIэгъу афэхъугъэныр. Мы аужырэ илъэси 4-м сэкъатныгъэ зиIэу республикэм щыпсэухэрэм ащыщхэу IофшIэн зыгъотыхэрэм япчъагъэ нахьыбэ хъугъэ, непэкIэ ар процент 30 фэдиз», — къыIуагъ республикэм ипащэ.
Адыгеим и ЛIышъхьэ IофшIэным ылъэ­ныкъокIэ анахь мэхьанэ зэратыхэрэм ащыщэу зигугъу къышIыгъэр хэушъхьафыкIыгъэ дзэ операцием иветеранхэу сэкъатныгъэ зиIэ хъугъэхэм медицинэ ыкIи социальнэ IэпыIэгъоу ящыкIагъэр аIэкIэгъэхьэгъэнымкIэ амал тэрэз ягъэ­гъотыгъэныр ары. НепэкIэ ахэм ящыкIагъэр зэкIэ аIэкIагъахьэ.
«ТицыхьэшIэгъу гъусэгъухэр — общественнэ организациехэр къыддемыIэщтыгъэхэмэ, а IофшIэныр зэшIохыгъэныр нахь къин хъущтыгъ. Чанэу зиIахь ащ къыхэзышIыхьэхэрэм сызэрафэразэр къэсэIо. Тэри общественнэ организа­циехэм ренэу тадеIэщт. Ащ пае илъэс къэс ахэм яIофшIэн пэIухьащт мылъкур къафыхэтэгъэкIы. Ащ нэмыкIэу социальнэ мэхьанэ зиIэ пшъэрылъхэм язэшIо­хынкIэ президент грантхэм я Фонд къызфэдгъэфедэзэ, илъэс къэс зэнэ­къокъухэр зэхэтэщэх. ТапэкIи тиIофшIэн зэрэзэхэтщэщтым, тынаIэ нахь зытедгъэтыщтым лъэпсэшIу фэхъух шъо шъуи­гъэхъагъэхэр. Хэтрэ цIыфи иамалхэр нахь къызэIуихынхэм, щыIэкIэшIу иIэным пае тызэгъусэу хэкIыпIэхэр къызэдэдгъотыщтых. Урысыем и Президент къыт­фигъэуцугъэ пшъэрылъхэм анахь шъхьа­Iэхэм ар зыкIэ ащыщ», — къыIуагъ Адыгеим и ЛIышъхьэ.
КъумпIыл Мурат ахэм анаIэ атез­гъэ­тыхэрэм, кIэлэегъаджэхэм, социальнэ лъэныкъомкIэ Iоф зышIэхэрэм, унагъохэм ыкIи непэ шIухьафтынхэр зыфагъэшъошагъэхэм ягупсэхэм щэIагъэу ыкIи гукIэгъоу ахэлъым пае зэрафэразэр къыхигъэщыгъ.
Ащ нэужым Адыгэ Республикэм ишIухьафтынэу сомэ мини 150-рэ хъурэмрэ дипломхэмрэ афагъэшъошагъэх. Лъэныкъоу «Гъэсэныгъэмрэ шIэныгъэмрэ япхыгъэ гъэхъагъэу иIэхэм апае» зыфиIорэмкIэ къыхагъэщыгъэх Адыгэ къэралыгъо университетым истудентэу Александр Галкинымрэ Мыекъопэ къэралыгъо технологическэ университетым истуденткэу Елизавета Текучевамрэ; «Литературэмрэ искусствэмрэ алъэныкъокIэ гъэхъагъэу иIэхэм апае» зыфи­IорэмкIэ къыхагъэщыгъэхэм ащыщых пенсионерэу Борис Лесиковыр, Мые­къопэ къэралыгъо технологическэ университетым иIофышIэу Николай Соколовыр, культурэм и Унэу «Гигантым» орэдкъэIонымкIэ ипащэу Владимир Хурс; лъэныкъоу «физическэ культурэмрэ спортымрэ гъэхъагъэу ащашIыгъэхэм апае» зыфиIорэмкIэ къыхагъэщыгъэх дэеу зэхэзыхыхэрэмрэ зымылъэгъухэ­рэмрэ зычIэсхэ еджэпIэ-интернатым икIэлэеджакIохэу Арсен Зенинымрэ Илья Кошелевымрэ; «Общественнэ IофшIэным гъэхъагъэу щашIыгъэхэм апае» зыфи­Iо­рэмкIэ хагъэунэфыкIыгъэх мысатыу организациеу «Мастерская ЛОВЗ» зы­фиIорэм ипащэу, модельнэ студиеу «Ин­сайт Моделс» зыфиIорэм иIэшъхьэтетэу Ирина Воллинам, лъэпкъ хорэу «Русская песня» зыфиIорэмрэ студиеу «Сувенирымрэ» ахэлажьэу Татьяна Хорс.
Ащ нэужым республикэм и ЛIышъхьэ шIухьафтынхэр къэзылэжьыгъэхэм гущы­Iэгъу афэхъугъ, яфэныкъоныгъэхэм за­щигъэгъозагъ, зипсауныгъэкIэ пыч зиIэ цIыфхэм социальнэ лъэныкъомкIэ ящыкIагъэхэр ягъэгъотыгъэнхэмкIэ общественностыр кIэщакIо зыфэхъурэ Iофтхьабзэхэм зэрадыригъэштэщтыр къыIуагъ. А лъэныкъохэмкIэ Iофэу ашIэрэм фэгъэхьыгъэу къэгущыIагъэх АР-м ивице-премьерэу Виктор Орловымрэ Адыгэ Республикэм IофшIэнымрэ социальнэ хэхъоныгъэмрэкIэ иминистрэу Мырзэ Джанбэч.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.