Къэралыгъом ичъыг шъхьаIэ пай
Адыгеим инэпэеплъхэр зыщыхэдыкIыгъэ илъэсыкIэ джэгуалъэр Кремлым щагъэуцущт къэралыгъо мэфэкI пцыикъым пылъыщт.
Муниципалитетхэм я Совет и Ассоциациеу АР-м щызэхэщагъэм игукъэккIэ Адыгеим лъэпкъ IэшIагъэхэмкIэ иIэпэIасэхэм я Ассоциацие хэтхэм ар ашIыгъ. Сантиметрэ 18 джэгуалъэм ихъурэягъ. Тишъолъыр къызэрашIэжьырэ тамыгъэхэу, тикультурэрэ тишэ-хабзэхэмрэ къизгъэлъэгъукIыхэрэр ащ щызэхэугъоягъэх.
Ахэр адыгэ идагъэкIэ хэдыкIыгъэ быгъушъхьэр, мыIэрысэр, чъыгэе тхьапэр ыкIи тхьэпищ зэхэтыр. Джащ фэдэу, сантиметрэ 80 хъурэ дышъэ уагъэмкIэ джэгуалъэр гъэдэхагъэ. Ащ дэлэжьагъэхэм къызэраIуагъэмкIэ, къэралыгъом илъэпкъхэм ятворчествэ изыкIыныгъэрэ дэхагъэмрэ IофшIагъэр къафэджэ.
— Тамыгъэхэр тэр-тэрэу къыхэтхыгъэх. Ахэм узяплъыкIэ адыгэхэр угу къагъэкIы. Мэхьанэ зэфэшъхьафхэр ахэушъэфагъэх-унагъор къаухъумэ, мамырныгъэм, фэбэныгъэм къыфэджэх. Ащ фэдэ гупшысэхэр тэри тиIэхэу джэгуалъэм ишIын тыдэлэжьагъ. Тикъэралыгъошхо мамырныгъэрэ зэгурыIоныгъэрэ илъынэу тыфай. IэпэIасэхэм язырызыгъоу зэкIэ къагъэхьазыри, сэ джэгуалъэр сыугъоижьыгъ, — къыддэгощагъ АР-м лъэпкъ IэшIагъэхэмкIэ иIэпэIасэхэм я Ассоциацие итхьаматэу Гумэ Ларисэ.
Джэгуалъэм игъэхьазырын IэпэIэсэ нэбгырих хэлэжьагъ. Ахэр: Гумэ Ларис, Джарымэкъо Зурет, Битэ Аз, Мыгу Рузан ыкIи ТIэшъу зэшыпхъухэу Сафыетрэ Щамсэтрэ.
Анцокъо Ирин.