КъыкIэкIощтым щымы­гугъыхэу шIу зэра­шIэщтым, IэпыIэгъу зищыкIагъэхэм ара­гъэгъотыным пылъ­-хэм непэ ямафэ ха­гъэунэфыкIы. Гуфэ­кIо цIыфхэм ныбжь, сэнэхьат е гъэсэныгъэ гъэнэфагъэ яIэп, шIу зышIэрэ пстэури ахэм ясатырэ хэт.

Мы IофшIэным мэхьанэшхо зэриIэр хигъэунэфыкIыгъ ­Адыгеим и ЛIышъхьи. Респуб­ликэм зэгурыIожь волонтер куп зэхэт зэриIэр, ахэр чIыпIэ къин ифагъэм IэпыIэгъу фэхъунхэм зэрэфэхьазырхэр, гукIэгъу зэрахэлъыр къыхигъэщыгъ.
— Волонтерхэм япчъагъэ илъэс къэс зэрэхахъорэм тегъэ­гушIо. Ахэр зыхэхьэхэрэ ныбжьыкIэ организациехэу респуб­ликэм итхэм обществэм изе­гъэушъомбгъун яIахь хашIыхьэ. Джащ фэдэу Хэгъэгум иухъумакIохэм, ахэм яунагъохэм, нэжъ-Iужъхэм IэпыIэгъу ягъэ­гъотыгъэнымкIэ, пшъэрылъ гъэ­нэфагъэхэм ягъэцэкIэнкIэ волонтерхэм Iофышхо агъэцакIэ, — хигъэунэфыкIыгъ КъумпIыл Мурат.
МэфэкIым ипэгъокIэу Кощ­хьэблэ районым иволонтер дви­жение иIофшIэн зыщыдгъэгъозагъ. Гъэсэныгъэ тедзэм и Гупчэу ащ щыIэм ипащэ игуа­дзэу Мамыхъу Фаридэ гущы­Iэгъу тыфэхъугъ.
— Волонтер движениер зыдгъэпсыгъэр 2017-рэ илъэсыр ары, апэ нэбгыри 100-кIэ ед­гъэжьэгъагъ. КъыкIэлъыкIогъэ илъэсым мы IофшIэным нэбгырэ минитIум ехъу хэщагъэ хъу­гъагъ, нэужым фэдитIу хэ­хъуагъ. Мы уахътэм волонтер отряд 13 Кощхьэблэ районым иI. Адыгеим и ЛIышъхьэ къыгъэуцугъэ пшъэрылъым тытетэу тиIофшIэн зэхэтэщэ, — къыIуагъ Фаридэ.
Ащ къызэрэхигъэщыгъэмкIэ, гуфэкIо гупчэу «Адыгеим иволонтерхэр» зыфиIорэм зэпхыны­гъэ дыряIэу джырэ лъэхъаным диштэрэ шIыкIакIэхэм атетэу яIоф­шIэн агъэпсы. Урысые, рес­публикэ зэнэкъокъухэм, мэфэкI ыкIи патриотическэ Iофтхьабзэ­хэм, шэмбэт шIыхьафхэм ныбжьыкIэхэр ахэлажьэх. Нэжъ-Iужъхэу зилъэкI макIэхэм IэпыIэгъу афэхъух.
Фэдз иволонтерхэр
Кощхьэблэ районымкIэ волонтер IофшIэным анахьэу зызщиу­шъомбгъугъэр къуаджэу Фэдз. Ащ игурыт еджапIэу 11-м иволонтер отрядэу «Вместе мы сила» зыфиIорэм Хьамырзэ Лидэ ипащ.
— Тиотряд зызэхэтщагъэр 2018-рэ илъэсыр ары. Ащ ныбжьыкIэ 265-рэ хэхьэ. Ахэм сыхьат 38859-м ехъум шIушIэным епхыгъэ Iофтхьэбзи 108-рэ зэрахьагъ. Зыныбжь хэкIотагъэхэм тынаIэ атет, яунэхэр, ящагухэр афызэ­Iутэхых, ящыкIэгъэ Iэзэгъу уцхэр къафэтэхьых, — къыIуагъ Хьамырзэ Лидэ.
Мы волонтер отрядым анахь чанэу хэтхэм ащыщ Щако Даринэ. Ар я 10-рэ классым щеджэ, илъэ­ситф хъугъэ гуфэкIо IофшIэным зыпылъыр. А уахътэм щыIэны­гъэми, цIыфхэми еплъыкIэу афыриIэри нахьышIум ылъэныкъокIэ зэблихъугъ.

— Апэрэ мафэм къыщегъэжьагъэу сызпылъ IофшIэныр сыгу рехьы, сыда пIомэ ащ мэхьанэшхо зэриIэр къызгурэIо. IэпыIэгъу тызфэхъурэ нэжъ-Iужъхэр къызэ­рэтфэразэхэм кIуачIэ къытеты. Тикласс ис нэбгырэ 18-м зыч-­зыпчэгъоу тызэхэтэу тиамалхэм зятэгъэушъомбгъу. Патриотическэ, экологие Iофтхьабзэхэм, шIэжь мафэхэм тахэлажьэ, тэр-тэрэу зэ­хатщэхэрэми нэмыкI цIыфхэр нахьыбэу къахедгъэубытэнхэм тыпылъ. Волонтер IофшIэным сыхэтыфэ социальнэ Iофыгъуабэхэр зэрэщыIэр къызэрэзгуры­Iуагъэм дакIоу, лъэныкъуабэхэм осэшIу афэсшIы хъугъэ — унэгъо джэныкъом ифэбагъэ, къыспэ­благъэхэм ягукIэгъу. Сишэни нахь зызэблихъугъ, гукIэгъушIэу, сыгу зэIухыгъэу IэпыIэгъу сафэхъуным сыфэхьазыр. Хэти иIахьышIу мы Iофым зэрэхилъхьан ылъэкIыщтым сицыхьэ телъ, — хигъэунэфыкIыгъ Даринэ.
Пшъэшъэ ныбжьыкIэм волонтер Iофыр ищыIэныгъэ хэпчын умылъэкIынэу изы Iахь хъугъэшъ, IэпыIэгъу зищыкIагъэхэм тапэкIи ишIуагъэ зэраригъэкIыщтым щэч хэлъэп. ЕджапIэр къызиу­хыкIэ медицинэ сэнэхьатым зы­фигъэзэн гухэлъ иI.
Iэшъынэ Сусан.