Росреестрэм ипащэу Олег Скуфинскэмрэ Адыгеим и ЛIышъхьэу КъумпIыл Муратрэ ­Москва зэIукIэгъу щы­зэдыряIагъ.

Адыгеим ихэбзэ къулы­къухэм япащэхэмрэ Росреестрэм Адыгэ Республи­кэмкIэ и ГъэIорышIапIэрэ рес­публикэм ихэхъоныгъэкIэ зэ­рэзэдэлажьэхэрэм ахэр тегущыIагъэх. Джащ фэдэу амыгъэкощырэ мылъкумкIэ къэралыгъо реестрэ зыкIым къэбар икъухэр игъэхьэгъэнхэм иIофыгъуи ахэр къы­щыу­цугъэх. Административнэ-­чIыпIэ организациехэм ягъу­напкъэхэм ягъэнэфэнкIи, нэ­мыкI лъэныкъохэмкIи рес­публикэ къулыкъум дэгъоу Iоф зэришIагъэр Реестрэм ипащэ къыхигъэщыгъ.
«Мы аужырэ илъэсхэм лъэныкъо заулэхэмкIэ Iоф­шIэныр дэгъоу зэхэтщэн тлъэкIыгъ.
Кадастрэ учетымкIэ ыкIи фитыныгъэ къязытырэ ­тхылъхэм ятхынкIэ пIалъэхэр нахь агъэкIэкIыгъэх. Унэхэр зытыра­шIыхьащт чIыгу Iахьхэм якъыхэгъэщын фэгъэхьыгъэ проектэу «ПсэолъэшIыным тегъэ­псыхьэгъэ чIыгур» зыфиIорэр гъэ­хъагъэ хэлъэу пхыращы. Ащ фэдэ чIыгу гектар 98,4-рэ агъэфедэхэрэм ахагъэхьагъ. НепэкIэ анахьэу анаIэ зытырагъэтырэр цифрэ платформэу «Национальная система пространственных данных» зыфиIорэр республикэм щы­гъэфедэгъэным зыфэгъэхьазырыгъэныр ары. 2026-рэ илъэсым ащ техьанхэу рахъухьэ», — къыIуагъ Росреестрэм ипащэ.
Адыгеим и ЛIышъхьэ зэрэхигъэунэфыкIыгъэмкIэ, Росреестрэм ипроектхэу чIыгу Iахьхэр агъэфедэхэрэр ахэгъэхьэгъэнхэмкIэ зишIуагъэ къакIохэрэм мэхьанэшхо яI. Ахэм ахэхьэх псэуалъэхэр ащыгъэпсыгъэнхэм къекIурэ чIыгухэри. Ащ фэдэ чIыгу Iахьхэр агъэфедэхэрэм зэрахигъахьэхэрэм дакIоу псэупIэ 225-мэ (псэупIэхэм япроцент 97-мэ) ягъунапкъэхэм яхьылIэгъэ къэбархэри Гъэ­IорышIапIэм аIэкIигъэхьагъэх. ПсэолъэшIыным республикэм лъэшэу зызэрэщиушъомбгъурэм епхыгъэу ащ фэдэ IофшIэным мэхьанэшхо раты.
Росреестрэм цифрэ технологиехэр зэригъэфедэхэрэм кIэухышIу къызэритырэм КъмпIыл Мурат анаIэ тыраригъэ­дзагъ. Джыдэдэм регистрацием Адыгеим щыпэIуагъахьэрэр зы мафэм щегъэ­жьагъэу мфи 3-м нэсы. Проектэу «Зы мафэкIэ электрон ипотекэр» зыфиIорэр гъэхъагъэ хэлъэу агъэцакIэ. Банкхэм адэлэжьэгъэнымкIэ цифрэ технологиехэр жъугъэу къызыфагъэфедэх. ИпотекэмкIэ лъэIу тхылъхэм япроцент 88-р электронкэкIэ къаIэкIагъахьэх, псэолъэшIыным ямылъку зэрэхалъхьащтымкIэ зэзэгъныгъэхэм япроценти 100-р электрон зэзэгъыныгъэх. Росреестрэр апэрэ чэ­зыоу зыдэлэжьэщтхэм ащыщ къэралыгъо программэу «Национальная система пространственных данных» зыфиIорэм ипхырыщын. Ар зыфытегъэ­псыхьагъэр республикэ къэбар сис-­
те­мэхэр IэубытыпIэ къызыфашIыхэзэ, цифрэ технологиехэр къызфэгъэфедэгъэнхэр ары.
«Росреестрэм АдыгеимкIэ и ГъэIорышIапIэ цIыфхэм яфэIо-фашIэхэр на­хьышIоу гъэцэкIэгъэнхэмкIэ, агъэфедэ­хэрэм чIыгу гъэнэфагъэхэр ахэгъэхьэгъэнхэмкIэ, амыгъэкощырэ мылъкумкIэ къэралыгъо реестрэ зыкIым къэбар икъухэр игъэхьэгъэнхэмкIэ республикэм ихэбзэ къулыкъухэм зэпхыныгъэ пытэ адыриI. Росреестрэм зэдэлэжьэныгъэу дытиIэр тапэкIи лъыдгъэкIотэщт. ЧIыпIэхэм зэдиштэу хэхъоныгъэ ягъэшIыгъэнымкIэ, инвестициехэр нахьыбэу республикэм къыхалъхьанхэмкIэ Президентэу Владимир Путиным пшъэрылъэу къыгъэуцугъэхэм ягъэцэкIэн фэIорышIэх Iофэу зэдызэшIотхыхэрэр. Къэралыгъо программэхэмрэ лъэпкъ проектхэмрэ япхырыщынкIэ Росреестрэм къэбарэу аIэкIигъахьэхэрэм мэхьанэшхо яI. Хэбзэ къулыкъухэми, бизнесменхэми, цIыф къызэрыкIохэми ахэр ящыкIагъэх», — къыIуагъ республикэм и ЛIышъхьэ.