ЦIыфэу зипсауныгъэ амалхэр зыпкъ итыгъэм сэкъатныгъэ иIэ зыхъукIэ, а къиныгъор ежь ышъхьэкIэ зэрэзэпичыщтыр анахь хьылъэу щыт. Угу бгъэIэсэныр, укъэтэджыныр, узым утекIоныр — пстэуми къадэхъурэп.

ХэушъхьафыкIыгъэ дзэ операцием хэлэжьэрэ дзэкIолI пчъагъэхэм уIэгъэ хьылъэу атещагъэ­хэм апкъ къикIыкIэ аIэ, алъакъо апымытыжьэу къы­хэкIыжьыхэшъ, щыIэныгъэм икIэ­рыкIэу хэгъозэ­жьых, мамыр щы­IакIэм фытегъэпсы­хьагъэхэу псэунхэм падзэжьы. Ащ ищысэшIу ветера­нэу Эдуард Ба­раевыр. Мы лIым ылъакъо уIагъэу тещагъэ хъугъэм къыхэкIэу ылъап­шъэ нэсэу зэрэпахыгъэр спортым пыхьаным, текIоныгъэхэр къыдихынхэм пэрыохъу афэхъугъэп.
ХэушъхьафыкIыгъэ дзэ операциер зэрэрагъэжьагъэм тетэу апэу Адыгеим икIыгъэхэм Эдуард ащыщ. КIалэр бэмэ афэдэу щыIагъ: унагъор, IофшIэныр, гухэлъ чыжьэхэр. Ау къэралыгъом иIэпыIэгъу ищыкIагъэу, Хэгъэгур ыкIи иунагъо къыу­хъумэнхэр ипшъэрылъэу ащ ылъытагъ. ЫныбжьыкIэ къыте­фэрэ дзэ къулыкъум ар щыIагъ, младшэ сержантыгъ, щэрыоным фэIэпэIэсагъ.
Унашъоу кIалэм ышIыгъэм иунагъо лъэшэу ыгъэгумэкIыгъ, апэ мэсэмэркъэу ашIошIыгъ. Ау теубытэгъэ пытэ хэлъэу а лъэ­бэкъур ышIыгъ.

— 2022-рэ илъэсым мэлылъфэгъум Запорожскэ хэкум сыщыIэнэу хъугъэ, лъэсыдзэм къулыкъур щезгъэжьагъ. Мазэрэ ныкъорэ нахь темышIэу уIагъэ къыстещагъэ хъуи, госпиталым сычIэфагъ, сцэгэ зэхэтрэ сIэ­хъуамбэрэ фыкъогъагъэх. Бэрэ пэмылъэу зыпкъ сиуцожьыгъэу унэм сисызэ, частичнэ моби­лизациер бжыхьэм къежьагъ. ЕтIани зэзэгъыныгъэм сыкIатхи, артиллерийскэ гаубичнэ дивизионым сыхэтэу Херсон хэкум сихьанэу хъугъэ. Ащ ятIонэрэу сыкъыщауIагъ, слъапшъэ пахынэу хъугъэ, сымэджэщхэр, зыпкъ иуцожьыныр, бэщхэр, протезыр.., — къыIотагъ Эдуард Бараевым.
ТигущыIэгъу наркоз ужым зыкъызешIэжьым, анахь къин къыщыхъугъэр къехъулIагъэр ишъхьэгъусэ зэрэриIощтыр ары. Унагъом хьылъэ къыщыхъуным ар тещыныхьэщтыгъ. Ежь фэдэ кIалэу госпиталым къыдычIэ­лъыгъэхэм ащыщхэм къафэ­мыежьхэу къазэрараIорэр ытхьа­кIумэ итыгъ.
— ВидеозэпхыныгъэкIэ си­шъхьэгъусэ сыфытеуагъ. Шъхьан­тэм сытелъэу къызэрилъэгъоу къыгурыIуагъ, къысэхъулIагъэр зесэIом, «О упсаумэ, адрэр Iофэп, унэм укъифэжьымэ, зэкIэ дэгъу хъущт» къызысеIожьым, къызэрэсажэхэрэр зэхэсшIагъ, сыгукIэ лъэш сыкъэхъугъ, щы­Iэныгъэм сыфэзыщэрэ кIуачIэ къысхэхьагъ, — хигъэунэфыкIыгъ Эдуард.
ДзэкIолIыр Москва госпиталым чIэлъыгъ. Апэ мазэрэ курэжъыем исыгъ, мэзипшIырэ бэщхэм арызекIуагъ, унэм къы­зэкIожьым протезыр къежэ­щтыгъ. Апэрэ уахътэр къиныгъэ, икIэрыкIэу кIоным зыфигъэсэжьыгъ, ицыхьэ зытелъыжьэу джы ылъакъо тет.
Сыд фэдэрэ пэрыохъуи джы зэхишIэжьырэп, ары пакIошъ, спортым чанэу пылъ. Къэралыгъо фондэу «Хэгъэгум иухъума­кIохэр» зыфиIорэм ишъолъыр къутамэ зэхищэрэ Iофтхьабзэ-
хэм ар ахэлажьэ, ныбжьыкIэхэм япатриотическэ пIуныгъэ иIа­хьышIу хелъхьэ. Анахьэу зы­пылъыр щэбзэ щэрыоныр ары. Республикэм шIокIэу, федеральнэ зэнэкъокъухэми текIоны­гъэхэр къыщыдехых.
— ШэпхъэшIухэм адиштэрэ джырэ протезхэр уарыкIонкIэ псынкIэх ыкIи гупсэфых. Сыз­пылъ щэрыонми пэрыохъу фэ­хъурэп. Сэщ фэдэ ветераныбэ мамыр щыIакIэм къыфагъэзэ­жьыгъэу Адыгеим исых, зыхэм алъэкъуитIу пытыжьэп, протез­хэм атетых, адрэхэм — аIэхэр фыкъуагъэх, ау хэти гъэу щысэп, ешъуакIуи хъугъэхэп, зэрафэлъэкIэу мэпсэух. Тызэ­гъусэу спорт лъэпкъ зэфэ­шъхьафхэмкIэ зэнэкъокъухэм тазэдыхэлажьэ: теннис цIыкIур, пауэрлифтингыр, кIэпсэ зэпэ­къудыир, — къыIуагъ Эдуард Бараевым.
Сэкъатныгъэ зиIэхэм я Дунэе мафэ ипэгъокIэу зипсауныгъэ амалхэр зэщыкъуагъэхэм азыфагу спартакиадэ республикэм щызэхащагъ. Ащ фондыр зы­лъыплъэрэ ветеранхэу Эдуард Бараевыр, Игорь Гилевыр ыкIи Петр Извековыр хэлэжьагъэх, хагъэунэфыкIырэ чIыпIэхэр къа­хьыгъэх, тилIыхъужъхэр ыпэкIэ лъэкIуатэх.
КIэухым къыхэзгъэхъожьымэ сшIоигъу тигущыIэгъу ышIыгъэ лъэбэкъум зэрэкIэмыгъожьы-
рэр, и Хэгъэгу шIу зэрилъэ­гъурэр, зэригъэлъапIэрэр. ИщыкIагъэ зыхъукIэ, сэкъатныгъэ зэ­риIэзэ, джыри Iашэр къыштэнышъ, Хэгъэгур къыухъумэным фэхьазыр.
Iэшъынэ Сусан.