Сэкъатныгъэ зиIэхэм ыкIи ветеранхэм яIофы­гъохэмкIэ Советэу Адыгэ Республикэм и ЛIы­шъхьэ дэжь щызэхэщагъэм зичэзыу зэхэсыгъо иIагъ. Ар зэрищагъ IофшIэнымкIэ ыкIи со­ци­альнэ хэхъоныгъэмкIэ АР-м иминистрэу Мырзэ Джанбэч.

Iофтхьабзэм хэлэжьагъэх къулыкъу зэфэшъхьафхэм, сэкъатныгъэ зиIэхэм яобщественнэ организациехэу республикэм итхэм ялIыкIохэр.
Министрэм пэублэ гущыIэ къышIызэ, сэкъатныгъэ зиIэхэр нэмыкI цIыфхэм афэдэу псэунхэ амал яIэныр, ахэм яфитыны­гъэхэр къэухъумэгъэнхэр анахь зылъыплъэхэрэ лъэныкъохэм зэращыщыр, Адыгеим и ЛIышъхьэу КъумпIыл Мурат ежь ышъхьэкIэ а Iофыгъохэм ынаIэ зэратыригъэтырэр къыхигъэщыгъ.
Iофыгъо зэфэшъхьафэу зэхэсыгъом зыщытегущыIагъэхэм ащыщых фэгъэкIотэныгъэ зиIэ цIыфхэм Iэзэгъу уцхэр аIэкIэгъэ­хьэгъэнхэмкIэ, сэкъатныгъэ зиIэу Адыгеим щыпсэухэрэм IофшIэпIэ чIыпIэхэр ягъэгъотыгъэнымкIэ Iофхэм язытет, зипсауныгъэ пыч фэхъугъэхэр культурнэ Iофтхьабзэхэм ахэгъэлэжьэгъэнхэмкIэ ыкIи обществэм ахэр хэгъэгъо­зэжьыгъэнхэмкIэ IофшIэныр зэ­рэзэхащэхэрэр, нэмыкIхэри.
Хэгъэгу зэошхом хэлэжьагъэ­хэм ыкIи зэо зэфэшъхьафхэм яветеранхэм Iэзэгъу уцхэр ягъэ­гъотыгъэнхэм фэгъэхьыгъэу къэ­гущыIагъ АР-м псауныгъэр къэухъумэгъэнымкIэ иминистрэ игуадзэу Хьагъэудж Марыет. Ащ къызэриIуагъэмкIэ, фэгъэкIотэны­гъэ зиIэхэм Iэзэгъу уц­­хэр аIэ­кIэгъэхьэгъэнхэр анахь гумэкIыгъоу щыIэхэм ыкIи министерст­вэм ынаIэ зытыригъэтыхэрэм ащыщ. Мы купым хэ­хьэрэ пэпчъ ищыкIэгъэ медицинэ IэпыIэгъу егъэгъотыгъэным фэшI гумэкIы­гъо­хэм ядэгъэзыжьын Iоф дашIэ.
ФэгъэкIотэныгъэ зиIэ купым хэхьэрэ цIыфхэм ярецептхэр республикэм имедицинэ организацие 23-мэ къащафыратхыкIых, уцщэпIэ 14-мэ къащаратыжьых.
2025-рэ илъэсым шэкIогъум и 26-м ехъулIэу ыпкIэ зыхэмылъ Iэзэгъу уц ратыным ифитыныгъэ зиIэ нэбгырэ 72,386-рэ респуб­ликэм щатхыгъ. Ахэм ащыщэу нэбгырэ мини 10-м ехъумэ программэу «Къэралыгъо социальнэ IэпыIэгъур» зыфиIорэм къызэрэщыдэлъытагъэу, ыпкIэ зыхэмылъ Iэзэгъу уц къызIэкIагъэхьаным фэшI ахъщэр федеральнэ бюджетым, нэбгырэ 62313-мэ республикэ бюджетым къафетIупщы.
2025-рэ илъэсым Iэзэгъу уц­хэм якъэщэфын сомэ милли­он 916,9-рэ пэIуагъэхьагъ. Ащ щыщэу миллиони 170,4-р феде­ральнэ, миллион 746,5-р рес­публикэ бюджетхэм къахахыгъ.
ЦIыфхэм IофшIапIэ ягъэгъотыгъэнымкIэ къэралыгъо къулыкъум АР-мкIэ и ГъэIорышIапIэ ипащэу Галина Цыганковам сэкъатныгъэ зиIэхэм IофшIэпIэ чIыпIэхэр ягъэгъотыгъэнхэмкIэ 2025-рэ илъэсым Iофэу ашIа­гъэм ыкIи тапэкIэ пшъэрылъэу яIэхэм зэхэсыгъом хэлажьэхэрэр щигъэгъозагъэх. Ащ къызэриIуагъэм­кIэ, сэкъатныгъэ зиIэхэр мыухъу­мэгъэ цIыфхэм ащыщых ыкIи ахэм зэрищыкIагъэу Iэпы­Iэгъу афэхъугъэным анаIэ тырагъэты.
Джащ фэдэу зэхэсыгъом зытегущыIагъэхэм ащыщ Урысые общественнэ организациеу «Сэкъатныгъэ зиIэ кIэлэцIыкIухэм ыкIи сэкъатхэу зыныбжь илъэс 18-м шъхьадэкIыгъэхэм янэ-ятэ­хэм я Урысые организацие» (ВОРДИ) ишъолъыр къутамэ иIофшIэн. Ащ ипащэу Анна Рауд къызэриIуагъэмкIэ, грант проектхэм яшIуагъэкIэ кIэлэцIыкIу­хэу зипсихикэ зэщыкъуагъэхэм ыпкIэ зыхэмылъ творческэ Iоф­тхьабзэхэр афызэхащэнхэ алъэ­кIы. Ахэр зэщапIурэ унагъохэм IэпыIэгъу афэхъугъэнымкIэ зэрахьэрэ Iофтхьабзэхэми ягугъу къашIыгъ.
Мыхэм ыкIи нэмыкI Iофыгъоу зыхэплъагъэхэм афэгъэхьыгъэу ищыкIэгъэ унашъохэр аштагъэх.
КIАРЭ Фатим.