Хэгъэгу зэошхом Адыгеим икIыгъэ нэбгырэ мин 80-м нахьыбэ хэлэжьагъ. Ахэм ащыщэу мин 30-м къагъэзэжьыгъэп, икIодыкIэ хъугъэр амышIэу тичIыпIэгъу нэбгырэ мин 18-м нахьыбэ щыфэхыгъ.

Мы пчъагъэр анахь къызынэфагъэр IофшIэгъэ инэу тиреспубликэкIэ автор купэу Валентин Дмитриковыр зипэщагъэм «ШIэжь тхылъыр» ыгъэхьазыры зэхъур ары.
Дзэ Плъыжьым хэтыгъэ тичIыпIэгъу дзэкIолIхэм ащыщэу, Пшызэ шъолъыр ыкIи Адыгеир 1942 – 1943-рэ илъэсхэм техакIохэм къаIэпыхыжьыгъэнхэм, шъхьа­фит шIыжьыгъэнхэм пае зыпсэ зыты­- гъэр бэдэд. Мыхэм ялъэуж зыфырэ лъыхъокIо отрядым ипащэу Р. Рахматулиным къызэриIуатэрэмкIэ, Адыгеим ыкIи Пшызэ шъолъыр зэо лъэхъаным ащыфэхыгъэхэм ащыщэу дзэкIолI нэбгыри 100 фэдизым яхьэдэ къупшъхьэхэр къагъотыгъэх, ау, гухэкIми, ахэм ацIэхэр агъэунэфыгъэхэп.
Джырэ уахътэм саугъэтэу, мыжъосынэу Хэгъэгу зэошхом фэгъэхьыгъэу Адыгэ Республикэм итыр 175-рэ мэхъу, мыхэм ахэхьэх къош къэхэлъэ 65-р ыкIи изакъоу зихьэдашъхьэ агъэтIылъы­жьыгъэу 16-р, ахэм ахэтых амышIэрэ дзэкIолI­хэри.
Тиреспубликэ культурнэ кIэныр ухъу­мэгъэнымкIэ и ГъэIорышIапIэ ипащэу Цыпынэ Рустем зэрэхигъэунэфыкIырэмкIэ, ЕгъэшIэрэ машIор саугъэт 37-мэ ащэблэ, чэщ-зымафэм ар зыщызэпымыурэр саугъэти 8-у район гупчэхэм ыкIи Мыекъуапэ адэтхэр ары.
АмышIэрэ ДзэкIолIым исаугъэт Адыгеим ирайон зэфэшъхьафхэм арыт, ар ащагъэуцугъ къуаджэхэу Псэйтыку, Пщыжъхьаблэ, нэмыкIхэми. Ахэр шэмбэт шIыхьаф мафэхэм еджакIохэм кIэлэегъаджэхэр ягъусэхэу агъэкъабзэх, агъалэх, агъэкIэжьых.
Уегупшысэмэ, сыдэу гухэкI дэда зыцIи, зылъэкъуацIи амышIэу зэо жъалымым цIыфыбэ зэрэхэкIодагъэр. Шъугу къэдгъэкIыжьын, тыгъэгъазэм и 3-р АмышIэрэ ДзэкIолIым и Мафэу Урысыем щыгъэнэфэгъэным лъапсэ фэхъу­гъэр тыгъэгъэзэ мазэм 1966-рэ илъэсым амышIэрэ дзэкIолIым ихьэдэ къупшъхьэ­хэр Кремлэ дэпкъым зэрэхалъхьагъэхэр ары.
АмышIэрэ дзэкIолIхэр адырэ нэбгырэ миллионыбэу Хэгъэгу зэошхом хэтыгъэ­хэу, щыфэхыгъэхэм ащыщхэу, гур афигъукIэу тщыгъупшэхэрэп, яшIэжь тэгъэлъапIэ.
Хабзэ зэрэхъугъэу, тыгъэгъазэм и 3-м, АмышIэрэ ДзэкIолIым и Мафэ, рес­публикэм ит саугъэтхэм къэгъагъэхэр акIэралъхьэх, еджапIэхэм зэIукIэгъухэу ветеранхэр зыхэлажьэхэрэр, шIэжь урокхэр, патриотическэ IупкIэ еджэнхэр ащэкIох. Мы зэкIэми яшIуагъэкIэ лIэужыкIэм тарихъыр нахь дэгъоу ышIэ мэхъу, игулъытэ къэущы.
Мамырыкъо Нуриет.