Хэушъхьа­фыкIыгъэ дзэ операцием иветеранхэу республикэм иобщественнэ щыIакIэ чанэу хэлажьэхэрэм ащыщхэр тын зэфэшъхьафхэмкIэ къыхэгъэщыгъэнхэм ыкIи Адыгэ республикэ общественнэ организациеу «ХэушъхьафыкIыгъэ дзэ операцием иветеранхэм я Ассоциацие» хэхьэгъакIэхэм тхылъхэр ятыжьыгъэнхэм фэгъэхьыгъэ мэфэкI Iофтхьабзэ Гупчэу «Адыгеим иныбжьыкIэхэр» зыфиIорэм щыкIуагъ.

Шъолъыр Ассоциациер 2023-рэ илъэ­сым къыщегъэжьагъэу мэлажьэ. Пшъэ­рылъ шъхьаIэу иIэхэр: дзэ операцием хэкIодагъэхэм яшIэжь гъэлъэпIэгъэным фэшI мыжъобгъухэр къафызэIухыгъэнхэр, уIагъэхэр зытещагъэхэм япсауныгъэ зыпкъ рагъэуцожьынымкIэ IэпыIэгъу афэхъугъэныр ыкIи кIэлэцIыкIухэм, ныбжьыкIэхэм патриотическэ пIуныгъэ тэрэз арагъэгъотыныр, къэкIожьырэ дзэкIолIхэр щыIэныгъэм хэгъэгъозэжьыгъэнхэр. А IофшIэнхэр зэхащэнхэмкIэ къэралыгъо хэбзэ къулыкъухэм, фондэу «Хэгъэгум иухъумакIохэм», Народнэ фронтым зэпхыныгъэ пытэ адыряIэу зэдэлажьэх.
ХэушъхьафыкIыгъэ дзэ операцием иветеранхэм я Ассоциацие итхьамэтэгъоу Илья Донцовым къызэриIуагъэмкIэ, мыщ хэтхэр зэкIэ мэхьанэ зиIэ къулыкъухэм, общественнэ советхэм, комиссиехэм ахэхьэх, зэпымыоу Iофтхьэбзэ зэфэшъхьафхэм ахэлажьэхэзэ, тишъо­лъыр федеральнэ гупчэм къыщагъэ­лъагъо.
— ХэушъхьафыкIыгъэ дзэ операцием иветеранхэм ящыкIэгъэ амалхэр ыкIи IофшIэпIэ чIыпIэхэр ягъэгъотыгъэнхэмкIэ УФ-м и Президент къыгъэуцугъэ пшъэрылъхэр зэшIохыгъэнхэмкIэ Адыгеим и ЛIышъхьэу КъумпIыл Мурат зэрихьэрэ IофшIэным тиветеранхэр чанэу хэлажьэх. ДзэкIолIхэм ыкIи ахэм яунагъохэм ящыкIэгъэ IэпыIэгъур тишъо­лъыр икъоу щарагъэгъоты. Ветеранхэм якIэлэцIыкIухэм хэушъхьафыкIыгъэу анаIэ атырагъэты. Джащ фэдэу тичIыгогъухэр зыхэт дзэ частьхэм зэпхыныгъэ адытиIэу ящыкIэгъэ IэпыIэгъур афэтэтIупщы. Патриотическэ Iофтхьабзэу республикэм щыкIохэрэм зэкIэми тахэ­лажьэ, — хигъэунэфыкIыгъ Илья Донцовым.
Ассоциацием IофшIэнэу зэрихьэрэм осэшIу къыфишIыгъ АР-м и Къэралыгъо Совет — Хасэм и Тхьаматэ игуадзэу, Урысыем и ЛIыхъужъэу Цэй Эдуард. Ветеран анахь чанэу алъытагъэхэм Къэралыгъо Советым — Хасэм ирэзэныгъэ тхылъхэр ыкIи бгъэхалъхьэу «За службу Родине» зыфиIорэр ащ аритыжьыгъэх.
Iофтхьабзэм къыщыгущыIагъ шъо­лъыр фондэу «Хэгъэгум иухъумакIохэр» зыфи­Iорэм ипащэу ПIатIыкъо Аслъан. Фон­дымрэ Асссоциациемрэ чанэу зэрэзэдэлажьэхэрэр ащ хигъэунэфыкIыгъ. Джащ фэдэу хэушъхьафыкIыгъэ дзэ операцием иветеранхэм афагъэцэкIэрэ фэIо-фашIэхэм игъэкIотыгъэу къащыуцугъ.
— Мы зэдэлэжьэныгъэм тэркIэ мэхьанэ иI. Сыда пIомэ тиухъумакIохэм ыкIи ахэм яунагъохэм IэпыIэгъу тафэхъу­нымкIэ къэралыгъомрэ обществэмрэ акIуачIэ зэхэлъ мэхъу. Ассоциацием хэт ветеранхэр патриотическэ Iофтхьабзэу, лIыхъужъныгъэм иурокхэу, мастер-классхэу зэхатщэхэрэм чанэу къахэлажьэх, яIэпэIэсэныгъэкIэ адэгуащэх. Непэ ехъулIэу лIыхъужъныгъэм иуроки 115-рэ редгъэкIокIыгъ, — хигъэунэфыкIыгъ ПIатIыкъо Аслъан.
Шъолъыр фондым иIофшIэн чанэу къыхэлэжьэрэ ветеранхэу Игорь Гилевым, Эдуард Бараевым, Александр Махневым, Андрей Васнецовым рэзэныгъэ тхылъхэр ащ аритыгъэх.
ЗэIукIэм икIэух Адыгэ республикэ общественнэ организациеу «ХэушъхьафыкIыгъэ дзэ операцием иветеранхэм я Ассоциацие» къыхэхьэгъакIэхэм ар къэзыушыхьатырэ тхылъхэр аратыгъэх.
Iэшъынэ Сусан.