Адыгеим и ЛIышъхьэу КъумпIыл Мурат республикэм и Правительствэ зычIэт унэм щызэхищэгъэ зэIукIэр зыфэгъэ­хьыгъагъэр Мыекъуапэ игупчэ урамхэмрэ иобщественнэ чIыпIэхэмрэ илъэсыкIэм ехъулIэу зэрэзэтырагъэпсыхьащтхэм иIофыгъохэр ары.

ЗэIукIэм хэлэжьагъэх АР-м иминистрэхэм я Кабинет и Тхьаматэ игуадзэу ЛIыхэсэ Махьмуд, Мыекъуа­пэ имэрэу Геннадий Митрофановыр, АР-м иминистрэхэм я Кабинет хэтхэр, предпринимательхэр, тучанхэм, банк­хэм, хьакIэщхэм ялIыкIохэр, кафехэр, ресторанхэр ыкIи нэмыкI шхапIэхэр зиунаехэр.
Мыекъуапэ имэрэу Геннадий Мит­рофановым къызэриIуагъэмкIэ, об­щественнэ чIыпIэхэр илъэсыкIэм ехъулIэу зэтегъэпсыхьэгъэнхэм фэгъэхьыгъэ Iофтхьабзэхэм язэшIохын къалэм щау­благъ. ГущыIэм пае, В. И. Лениным ыцIэкIэ щыт гупчэм илъэсы­кIэ чъыгыр щагъэуцунэу рагъэжьагъ, ащ ищыкIагъэхэр палъхьащтых ыкIи къэзгъэнэфыхэрэр пашIэщтых. ИлъэсыкIэ чъыгыр зэрагъэкIэракIэхэрэр, къэзгъэнэфырэ пкъыгъо цIыкIухэр зэкIэ агъэкIэжьыщтых. Хабзэм ишъо­лъыр къулыкъухэм, джащ фэдэу Хь. Шъэумэным ыцIэ зыхьырэ ШIушIэ фондым яIэпыIэгъу ишIуагъэкIэ мэфэкI теплъэ къалэм иIэ хъущт.
Мыекъуапэ ипащэ агу къыгъэкIы­жьыгъ 2024-рэ илъэсым тыгъэгъазэм нахь дахэу зытезгъэпсыхьэрэ организациехэм азыфагу зэнэкъокъу зэ­рэщызэхащэгъагъэр. Ащ предприятие 49-рэ хэлэжьэгъагъ. Апэрэ чIыпIэр зыубытырэм сомэ мин 50, ятIонэрэр — сомэ мин 40, ящэнэрэр — сомэ мин 30 аратынэу агъэнэфэгъагъ.
Зичэзыу зэнэкъокъур 2025-рэ илъэ­сым тыгъэгъазэм и 16-м къыщегъэ­жьагъэу и 25-м нэс кIощт. Лъэны­къуищ­кIэ зэнэкъокъущтых: «сатыумкIэ пред­приятие анахь дэгъур», «цIыфхэм ягъэшхэнкIэ предприятие анахь дэгъур», «фэIо-фашIэхэм ягъэцэкIэн анахь дэгъоу зыщызэшIуахырэ пред­прия­тиер». Мы илъэсым шIухьафтыным хагъэхъуагъ ыкIи чIыпIэу аубытырэм елъытыгъэу сомэ мин 60, мин 55-рэ ыкIи мин 50 аратыщт.
Илъэсэу икIыгъэм фэдэу джыри шIухьафтынэу «МэфэкI мафэхэм яхъу­лIэу сатыумрэ цIыфхэм яфэIо-фашIэ­хэм ягъэцэкIэнрэкIэ анахь дэгъоу Iоф­шIэнхэр зэхэзыщагъэхэр« зыфи­Iорэр агъэнэфагъ.

Республикэм и ЛIышъхьэ предприятиехэу зипсэуалъэхэм ягупэхэр нахь зыгъэкIэракIэхэрэм, мэфэкI теплъэ язы­тыхэрэм зэрафэразэр къыхигъэщыгъ, бизнесым илIыкIохэм къяджагъ сатыум-
рэ цIыфхэм ягъэшхэнрэ алъэныкъокIэ псэуалъэхэм яфэшъошэ теплъэ яIэным ренэу анаIэ тырагъэтынэу.
«Республикэм мылъкубэ ыкIи кIочIабэ апэIуегъахьэ къалэхэмрэ нэмыкI псэупIэхэмрэ нахь дэгъоу зэтегъэпсыхьэгъэнхэмкIэ, ятеплъэ нахьышIу шIыгъэнымкIэ, зекIохэм анаIэ нахь къатыра­дзэнымкIэ. ТапэкIи бизнесым пылъхэм а Iофыгъохэм анаIэ атырагъэтынэу, республикэм щыпсэухэрэм ыкIи ихьакIэхэм агу къаIэтыным пае зигугъу къэтшIыгъэ Iофыгъохэм адэлэжьэнхэу тащэгугъы. ЗэкIэми ткIуачIэ зэхэлъэу тиурамхэми ятеплъэ нахьышIум ылъэныкъокIэ зэхъокIыгъэным тынаIэ тед­гъэтын фае. Кафехэм, тучанхэм, хьакIэщ­хэм ыкIи ресторанхэм ячIэхьапIэхэр, къапэIулъ чIыпIэхэр къабзэхэу, гъэ­кIэ­рэкIагъэхэу, мэфэкI мафэхэм ямы­за­къоу, щытынхэ фае», — къы­Iуагъ Къум­пIыл Мурат.

ЗэIукIэм хэушъхьафыкIыгъэу зыща­тегущыIагъэхэр къэбзэныгъэм ишап­хъэхэм чIыпIэхэр адиштэнхэр, къалэм игупчэ урамхэмрэ цIыфхэр нахьыбэу къызэкIолIэхэрэ чIыпIэхэмрэ хэкIыр аIуащыныр, аукъэбзынхэр. Къалэм ипащэхэм ыкIи пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Экоцентр» зыфиIорэм къызэрэхагъэщыгъэмкIэ, къалэм игъогу шъхьаIэхэм хъызмэтым епхыгъэ псэолъэ 300 фэдиз атет. Ау къапэIулъ чIыпIэхэм якъэбзагъэ зэкIэхэри зэрищыкIагъэм тетэу лъэп­лъэх пIон плъэкIыщтэп. Псэолъэ чIэхьапIэхэм адэжь щыт хэкIитэкъупIэхэм арымыфэжьэу хэкIыр итэкъухьагъэу къыхэкIы.
КъумпIыл Мурат бизнесым пылъхэу хэкIыр дзыохэм ыкIи пакетхэм арылъэу лъэсрыкIо гъогухэм атезылъхьэхэрэм загъэтэрэзыжьынэу афигъэпытагъ. Компаниеу «Экоцентрэм» пшъэрылъ фи­-
шIыгъ хэкIыр зыщыIуащырэ мафэхэм зэхъокIыныгъэ афишIынэу: пчэдыжьым имызакъоу, пчыхьэми хэкIыр Iуащын фаеу афигъэпытагъ. ХэкIитэкъупIэхэу щагухэм адэтхэри нахь егугъухэзэ дезинфекцие ашIынхэм анаIэ тыраригъэ­дзагъ.
«Къэбзэныгъэм лъымыплъэхэрэм, псэолъэшIыным фэхъурэ пыдзафэхэр зэратакъо мыхъущт контейнерхэм арызытакъохэрэм пшъэдэкIыжь ядгъэхьын фае. Ащ фэдэ зекIуакIэр хэти фэтыдэщтэп», — къыIуагъ КъумпIыл Мурат.
ЗэIукIэгъум икIэухым кафехэмрэ ресторанхэмрэ яIофшIэн епхыгъэ Iофыгъохэм ахэплъагъэх. ЦIыфхэм ягъэшхэн фэгъэзагъэхэм КъумпIыл Мурат анаIэ тыраригъэдзагъ къалэм иархитектурэ диштэу ахэр щытынхэ зэрэфаем, куандэхэмрэ къэгъагъэхэмрэ зэдиштэхэу ащагъэтIысхьанхэ, унэ гупэхэр къэз­гъэнэфыхэрэр ыкIи нэмыкIхэр агъэ­фе­дэнхэ фае.
КъызэрэхигъэщыгъэмкIэ, архитектурэмрэ къэлэгъэпсынымрэ алъэныкъокIэ Мыекъуапэ идизайн-код ипроект агъэ­хьазырыгъах. Ар IофшIэн къызэрыкIоу щытэп, унэ гупэхэм, урамхэм, цIыфхэр жъугъэу зыщызэхэхьэхэрэ чIыпIэхэм ягъэкIэжьынкIэ шэпхъэ зыкI къыхэхыгъэным фытегъэпсыхьагъ.
АР-м и ЛIышъхьэ
ипресс-къулыкъу къытырэ къэбархэмкIэ Тхьаркъохъо Сафыет