Тыгъэгъазэр зыфэдэщтыр
КIымафэм иапэрэ мазэу тыгъэгъазэр къихьагъ. Ар зыфэдэщтым тыщигъэгъозагъ Адыгеим гидрометеорологиемкIэ и Гупчэ.
Хабзэ зэрэхъугъэу, тыгъэгъазэм зыпкъитыныгъэ иIэщтэп, пщагъор къебэкIыщт ыкIи ощх-ос цIынэ зэхэлъыр щыIэщт. Ау бэп ащ фэдэ мафэу къыхэкIыщтыр. Мэхьанэшхо зиIэ мафэу тыгъэгъазэм и 22-р илъэсымкIэ зэкIэмэ анахь кIаку ыкIи чэщыр анахь кIыхь.
— УплъэкIунэу тшIыгъэхэм язэфэхьысыжьхэм къызэрагъэлъэгъуагъэмкIэ, АдыгеимкIэ 1999-рэ илъэсым тыгъэгъэзэ мазэм фабэр градус 26-м нэсыгъагъ. Анахь чъыIэу градус 23-рэ зыщагъэунэфыгъагъэр 1964-рэ илъэсыр ары. Тыгъэгъазэм чъыIэр градус 15 — 20-м нэсэу, ащ дакIоу фабэри градус 15 — 20-м ехъоу къыхэкIыщт, — къыIуагъ гидрометеорологиемкIэ ыкIи тыкъэзыуцухьэрэ дунаим лъыплъэгъэнымкIэ Гупчэм ипащэу Александр Митровым.
ГурытымкIэ мы мазэм температурэр ыкIи ощх-осэу къехыщтыр шапхъэхэм ашIокIыщтэп. КъызыщыучъыIырэ уахътэм мылыр чъыгхэм ыкIи электричествэм ирыкIуапIэхэм апишIыхьащт.
Апэрэ мэфипшIыр. Чэщым фабэр градуси 2 — 3-м фэдизыщт, къыхэкIыщт чъыIэр градуси 6-м зыщынэсыщтхэри. Мафэм фабэу градуси 7 — 12 щыIэщт.
ЯтIонэрэ мэфипшIыр. Чэщхэр градус 0 — 5-м нэсэу чъыIэщтых, къыхэкIыщт чъыIэр градуси 10-м зыщынэсыщтхэри. Мафэм фабэр градуси 10-м кIэхьащт.
Ящэнэрэ мэфипшIыр. Тыгъэгъазэм икIэухым чэщым чъыIэу градуси 4 — 9 щыIэщт, мафэм чъыIэр градуси 5-м, фабэр градуси 5-м анэсыщт.
Мазэм иапэрэ мэфипшIым бжыхьасэхэм макIэу ахэхъощт. Мэкъумэщ культурэхэм чъыIэр къягоощтэп. Псыхъохэм адэт псыр шапхъэхэм атетыщт, къызщигъэжъурэ уахътэм ыкIи лъэшэу къызещхырэм, къыдэкIоещт.
КIАРЭ Фатим.