Адыгеим и ЛIышъхьэу КъумпIыл Мурат Урысые Федерацием илъэпкъ гвардие Къыблэ шъолъырымкIэ идзэхэм япащэ игуадзэу Игорь Петуниным Адыгэ Республикэм и Правительствэ зычIэт унэм зэIукIэгъу щыдыриIагъ.

Пащэм игуадзэ республикэм и ЛIышъхьэ нэIуасэ фишIыгъ полицием иполковникэу, Рос­гвардием Адыгэ РеспубликэмкIэ и ГъэIорышIапIэ ипащэу бэмышIэу агъэнэфэгъэ Дмитрий Зима. Дмит­рий Геннадий ыкъом Челябинскэ апшъэрэ дзэ училищыр къыухыгъ. Зыкъэу­хъу­мэжьы­нымкIэ Министерствэм, хэгъэгу кIоцI IофхэмкIэ Минис­терствэм, Госгвардием илъэс 20-м ехъу ащылэжьагъ. Курсан­тэу ригъажьи, полкым икомандир IэнатIэ нэсыгъ. ГъэIорышIапIэм ипащэу агъэнэфэным ыпэкIэ Росгвардием Свердловскэ хэкумкIэ и ГъэIорышIапIэ иштаб ипэщагъ, мы ГъэIоры­шIапIэм ипащэ игодзагъ.
«Дмитрий Зима а илъэсхэм къакIоцI пшъэрылъ къинхэр зы­гъэцэкIэн, къэралыгъом ифедэ­хэр шIуагъэ къытэу къэзыгъэгъунэн зылъэкIырэ пэщэ чанэу зыкъыгъэлъэгъуагъ», — къы­Iуагъ Игорь Петуниным.
Адыгеим ихэбзэухъумэкIо, игъэцэкIэкIо къулыкъухэм язэ­дэлэжьэныгъэ дэгъоу зэрэзэхэщагъэр республикэм и ЛIышъхьэ къыхигъэщыгъ. Ахэм яшIуагъэкIэ илъэсыбэ хъугъэу хэгъэгум ишъолъыр анахь рэхьатхэм ыкIи щынэгъончъэхэм зэращыщэу республикэр къэнэжьы. Лъэпкъ зэфэшъхьафхэм къахэкIыгъэ, дин зэфэмыдэхэр зылэжьырэ цIыфхэр зэгурыIохэу, рэхьатэу мыщ щэпсэух.
«Росгвардием ифедеральнэ пащэхэм IофшIакIохэмкIэ унашъоу аштэхэрэм адетэ­гъаштэ. Хабзэм, псэуалъэхэм якъэухъумэнкIэ, общественнэ щынэгъончъагъэмкIэ, терроризмэм пэуцужьыгъэнымкIэ пшъэрылъэу къэуцухэрэм язэшIохынкIэ тэ сыдигъуи къулыкъум IэпыIэгъу тыфэхъущтыгъ. ЫIэ къыралъхьэгъэ къулыкъур гъэхъагъэ хэлъэу ыпэкIэ зэрэлъыкIотэщтым пэщакIэр ишъыпкъэу дэлэжьэнэу, рес­публикэ ГъэIорышIапIэм иIофшIэн на­хьышIоу зэхищэнэу тыщэгугъы», — къыIуагъ КъумпIыл Мурат.