АР-м и Къэралыгъо Совет — Хасэм я LI-рэ зэхэсыгъо тыгъуасэ иIагъ.

Ащ хэлэжьагъэх АР-м иминист­рэхэм я Кабинет хэтхэр, федеральнэ ыкIи республикэ къулыкъухэм япащэхэр, нэмыкIхэр. Зэхэсыгъор зэрищагъ Парламентым и Тхьаматэу Владимир Нарожнэм.
Мызыгъэгум упчIэ заул ныIэп депутатхэр зытегущыIагъэхэр. Ахэм апэ итыгъэр Тэхъутэмыкъое районым ихьыкум участкэу N 4-м изэгъэшIужь хьыкумышI игъэнэфэн.
Хэбзэгъэуцугъэм къызэрэдэ­лъытагъэмкIэ, мы IэнатIэм илъэсищ пIалъэкIэ Iуагъахьэх, ар имы­кIызэ икIэрыкIэу хадзыжьын фае. Ащ фэшI аужырэ илъэсищым мы участкэм изэгъэшIужь хьыкумышIыгъэу Денис Матвиенкэм икандидатурэ депутатхэр тегущы­Iэхи, зэдаштэу Iуагъэхьажьыгъ.
Нэужым депутатхэм АР-м ихэ­бзэгъэуцугъэу зыныбжь имыкъугъэхэм яIофхэмкIэ ыкIи ахэм яфитыныгъэхэм якъэухъумэнкIэ комиссиехэм афэгъэхьыгъэм зэ­хъокIыныгъэхэр фэшIыгъэнхэм фэгъэхьыгъэ законыр ятIонэрэ еджэгъумкIэ аштагъ. Комиссиехэм ягъэпсынкIэ фитыныгъэу чIыпIэ зыгъэIорышIэжьыпIэхэм араты­гъэхэр къыдэлъытагъэхэу рес­пуб­ликэ бюджетым къыхэхыгъэ субвенциехэр ахэм афэгъэкIо­гъэнхэу ащ къыщеIо.
Джащ фэдэу Урысыем инэмыкI шъолъырхэм яхэбзэихъухьэ къулыкъухэр кIэщакIо зыфэхъугъэ зэхъокIыныгъэу федеральнэ хэ­бзэ­гъэуцугъэхэм афэшIыгъэн фае­хэм язаконопроекти 8-мэ де­путатхэр ахэплъагъэх. Ахэм ащыщых зыпари алъымыплъэу былымхэр урамым къытезытIупщыхьэхэрэм административнэ пшъэдэкIыжь ягъэхьыгъэным, фэтэрыбэу зэхэт унэхэм ачIэсхэм псэушъхьэ пчъагъэу, зигугъу ашIы­рэр хьэхэмрэ чэтыухэмрэ, аIыгъыщтым гъунэпкъэ гъэнэфагъэ фэшIыгъэным, мэкъумэщ хъыз­мэтым щылажьэрэм предпринимателэу товархэр къыдэзгъэкIы­хэрэм, фэIо-фашIэхэр зыгъэца­кIэхэрэм IэпыIэгъу ятыгъэным афэгъэхьыгъэхэр, нэмыкIхэр.
Адыгеим и Парламент идепутатхэм зэкIэми адырагъэштагъ.
ХЪУТ Нэфсэт.