Унагъохэм жъалымыгъэ ащызэрамыхьаным къызщыфэджэхэрэ Iофтхьабзэхэр Адыгеим ибзылъфыгъэхэм я Союз зэхещэх.

Проектэу «Жъалымыгъэ зыхэмылъ щыIэныгъэр — тхыдэжъэп!» зыфиIорэм къыдыхэлъытагъэу АР-м ибзылъфыгъэхэм я Союз шэкIогъум и 21-м къыщыублагъэу и 27-м нэс Iофтхьабзэуу «Умыушъэф» зыфиIорэр ригъэкIокIыгъ. Бзылъфыгъэхэм, сабыйхэм ыкIи Iэтахъохэм жъалымыгъэ хэлъэу зэрадэзекIохэрэм пэшIуекIогъэнымкIэ къашъхьэпэщт шIэныгъэхэр цIыфхэм ягъэгъотыгъэныр ащ къыдыхэлъытэгъагъ.
АР-м ибзылъфыгъэхэм я Союз къызэрэщытаIуагъэм­кIэ, район пэпчъ тренингхэр ыкIи мастер-класс­хэр ащызэхащагъэх, ахэм ахэтыгъэх зыкъэгъэгъунэ­жьы­гъэным фэгъэхьыгъэхэр, психологхэр зыхэлэжьэгъэхэ зэхахьэхэр, ухъумэкIо ыкIи социальнэ къулыкъухэм адашIыгъэ зэдэгущыIэгъухэр. Iофым фэгъэхьыгъэ игъэкIотыгъэ къэбархэр къызщиIотыкIыгъэ тхьапэхэр агощыгъэх, апшъэрэ классмэ ащеджэрэ кIэлэ­еджакIохэр зэхэгущыIэжь-зэIукIэхэм къахагъэлэ­жьагъэх.
— Iофтхьабзэм нэбгырэ 246-рэ хэлэжьагъ. Бзылъфыгъэхэм ыкIи сабыйхэм апае псэупIэу Натырбые «кризиснэ» гупчэ зэрэдэтыр цIыфмэ ашIагъ, ащ психологическэ, юридическэ IэпыIэгъухэр ыкIи пIэлъэ гъэнэфагъэкIэ IэпыIэгъур ащарагъэгъотын алъэкIыщт. Джащ фэдэу АР-м ибзылъфы­гъэхэм я Союз ыгъэнэфэгъэ телефон номерэу 8-800-700-89-32-м теонхэ алъэ­кIыщт, — къыщыхагъэщыгъ АР-м ибзылъфыгъэхэм я Союз.
Проектэу «Жъалымыгъэ зыхэмылъ щыIэныгъэр — тхыдэжъэп!» зыфиIорэр обществэм хэхъоныгъэ ышIыным фытегъэпсыхьэгъэ грантэу Адыгеим къы­раты­гъэм иIэпыIэгъукIэ агъэцакIэ.