Илъэсыр къызихьагъэм къыщыублагъэу УФ-м и Социальнэ фонд и Къутамэу АР-м щыIэм нэбгырэ мин 24,6-мэ къэсымэ­джагъэхэу охътэ гъэнэфагъэм Iоф ашIэн амал зэрямыIагъэм фэшI пособие аритыгъ. Ащ пстэумкIи сомэ миллион 594-рэ пэIу­хьагъ.

«Мы пособиер зыфэдизыщытыр цIыфым Iоф­шIэгъэ илъэс пчъагъэу иIэм ыкIи аужырэ илъэситIум, гурытымкIэ лъытагъэу, лэ­жьап­кIэу къы­ратыгъэм япхыгъ. Илъэси 8-м ехъу IофшIагъэ зиIэхэм «больничнэхэр» лэжьапкIэм ипроценти 100 фэдизэу къараты, илъэси 5-м къыщегъэ­жьагъэу 8-м нэс изгъэкъугъэхэм ипроцент 80-м, мэзи 6-м къы­ще­гъэжьагъэу илъэси 5-м нэсэу Iоф­шIагъэ зиIэхэм процент 60-м афэдиз къафалъытэ», — къыIуагъ УФ-м и Социальнэ фонд и Къутамэу АР-м щыIэм ипащэу МэщлIэкъо Хьамидэ.

КIэлэцIыкIоу джыри еджапIэм чIэмыхьагъэр къэсымэджагъэмэ, ащ лъыплъэрэм, IофшIэгъэ илъэсэу иIэр зыфэдизым емылъытыгъэу, илэжьапкIэ ипроценти 100 къыраты.
Апэрэ мэфищым пае пособиер IофшIэпIэ чIыпIэр къэзытырэм къыфелъытэ, адрэ мафэхэр УФ-м и Социальнэ фонд и Къутамэу АР-м щыIэм къыреты. Iоф­шIапIэм тхылъэу ищыкIагъэхэр къызигъахьыгъэхэм ыуж IофшIэгъу мэфи 10-м къыкIоцI ахъщэр къыфалъытэ.
«Больничнэм» къэбарэу пылъыр, къалъытагъэр зыфэдизыр къэралыгъо фэIо-фашIэхэм япортал «унэе кабинет» щызиIэм рилъэгъощт.
УпчIэ зиIэр мы телефонымкIэ къытеон ылъэкIыщт: 8(800)100-00-01 (ыпкIэ хэлъэп), блыпэ-мэфэку мафэхэм пчэдыжьым сыхьатыр 9-м къыщыублагъэу пчыхьэм 6-м нэс, бэрэскэшхом сыхьатыр 9-м щыублагъэу 5-м нэс Iоф ашIэ.
Социальнэ хъытыуми тарыт: https://vk.com/sfr.respublikaadigeya, https://ok.ru/group/70000001891168, https://t.me/osfrrespublikaadigeya.