Тыгъэгъазэм и 11-м Адыгеим и ЛIышъхьэ зэIухыгъэ зэдэгущыIэгъу республикэм щыпсэухэрэм адыриIэщт.

Илъэсым изэфэхьысыжьхэр къызэришIыщтхэм ыкIи цIыфхэм зэдэ­гущыIэгъу зэрадишIыщтым афэгъэ­хьыгъэ къэбарыр КъумпIыл Мурат иинтернет нэкIубгъохэм къаригъэ­хьагъ. Тыгъэгъазэм и 11-м телеканалэу «Урысыер-24-рэ» зыфиIорэм ар занкIэу къихьащт цIыфхэм яуп­чIэхэм джэуапхэр къаритыжьынэу, мыгъэ правительствэм Iоф зэришIагъэм, джащ фэдэу 2026-рэ илъэсымкIэ зэшIуахынэу агъэнафэхэрэм къатегущыIэнэу.
«Илъэс къэс редгъэкIокIырэ зэдэгущыIэгъур — шъолъырымкIэ зэрэ­псаоу мэхьанэшхо зиIэ хъугъэ-шIагъ. ЗэIухыгъэ зэдэгущыIэгъу зэдэтшIынымкIэ ыкIи зигъо Iофыгъохэм язэшIохыкIэщтыр къызэдыхэтхынымкIэ ар амалышIу. Зыкъызэрэтфэжъугъэзэрэ Iофыгъо пэпчъ хэбзэ къулыкъу­хэм яIофшIэн шъхьэихыгъэнымкIэ ыкIи шIуагъэ къытынымкIэ IэпыIэгъу мэхъу», — къытхыгъ КъумпIыл Мурат.
Мы уахътэм къыщыублагъэуи шъуи­упчIэхэр жъугъэхьышъущтых. Ар шIыкIитIу къызэрыкIокIэ зэшIошъухы­шъущт:
Номерэу 122-мкIэ шъутеошъущт. Кол-гупчэм иIофышIэхэм мафэ къэс зыкъызэрафагъазэхэрэр атхых. Iоф­шIэгъу мафэхэм къулыкъум пчэдыжьым сыхьатыр 8-м къыщыублагъэу пчыхьэм 8-м нэс Iоф ешIэ, зыгъэпсэфыгъо мафэхэм — пчэдыжьым 8-м щегъэжьагъэу мафэм сыхьатыр 2-м нэс.
Мыщ фэдэ электроннэ почтэми упчIэхэр жъугъэхьышъущтых: kum­pilov-online@mail.ru.
ЗэIухыгъэ зэдэгущыIэгъур тыгъэ­гъазэм и 11-м пчыхьэм сыхьатыр 7-м телеканалэу «Урысыер-24-рэ» зыфиIорэмкIэ кIощт. Ащ КъТРК-у «Адыгеим» исайтрэ и Rutube-каналрэ, платформэу «Смотрим» зыфиIорэм шъущяплъышъущт, АР-м и ЛIышъхьэ иканалхэу МАХ-мрэ Telegram-мрэ, социальнэ хъытыухэу «Вконтакте» ыкIи «Одноклассники» зыфиIохэрэм нэкIубгъохэу щариIэхэми ащызэжъу­гъэлъэгъушъущт. Эфирым «Урысыем ирадио» (98.8 FM) ыкIи «Маякым» (104 FM) джащ фэдэу шъущядэIу­шъущт.