Аужырэ уахътэхэм къэлэ кIыбым щыIэ псэупIэхэр нахьыбэу къащэфыхэ хъугъэ. ЦIыфхэм унэ шIыгъахэхэм ямызакъоу, чIыгу Iахьхэри зэрагъэгъотых. Ащ фэшI псы Iушъом унэ IупшIыхьанэу ыкIи ябгъэтхынэу хэбзэгъэуцугъэм фитыныгъэ къетымэ бэрэ къыкIэупчIэх.

ПсыIушъо шъолъырэу, гурытымкIэ лъытагъэмэ, метрэ 20 нахьыбэ мыхъурэм псэуалъэ тебгъэуцун уфитэп. Ау ащ шъхьарыдзыгъэу къагъэгъунэрэ псы IушъокIэ алъытэрэм щыпшIын плъэкIыщт. ЧIыгу Iахь ащ къыщыпщэфэу унэ зытебгъэуцокIэ, ащ дакIоу псыр ушIоигъэ хъуным щызыухъумэщт псэуалъэхэр бгъэ­псынхэ фае. Ахэм ахэхьэх псы шIоим, ощх-ос псыхэм якIуапIэхэр, псынэхэр, нэмыкIхэр.
«Псы псэуалъэм цIыфхэр зэшъощтыр къыхащымэ, санитар шапхъэхэр зыщагъэцакIэрэ чIыпIэу агъэнэфагъэмэ, псэупIэ щыбгъэуцун уфитэп», — къыIуагъ Рос­реестрэм и ГъэIорышIапIэу АР-м щыIэм ипащэ иIэнатIэ зыгъэцакIэрэ ЕмыкI Марыет.
ЧIыгу Iахьыр къагъэгъунэрэ псыIушъо чIыпIэхэм ахахьэмэ зэбгъэшIэным пае кадастрэ картэр бгъэфедэн е амыгъэкощырэ мылъкум и ЗыкI къэралыгъо реестрэ къыхябгъэтхыкIын плъэкIыщт.