Фондэу «Хэгъэгум иухъумакIохэр» зыфиIорэм илъэс къэс творческэ IофшIэнхэм язэнэкъокъу кIэлэеджакIохэм азыфагу щызэхещэ. БэмышIэу ащ икIэуххэр зэфахьысыжьыгъэх ыкIи едзыгъоу «Авторская фотография» зыфиIорэм ятIонэрэ чIыпIэр къыщыдихыгъ Адыгеим щыщ Владимир Лемеш. ХэушъхьафыкIыгъэ дзэ операцием ипшъэрылъхэр щигъэцакIэзэ 2022-рэ илъэсым хэкIодэгъэ, «Урысыем и ЛIыхъужъ» зыфиIорэ цIэр зыфагъэшъошэгъэ Вадим Лемеш ар икIал.

— Владимир ышIыгъэ сурэтым зэреджагъэр «Сятэ-ЛIыхъужъым сыготэу!». Къэлэ дэхьэгъум щыт пкъэоу ятэ исурэт зытетым янэ ыкIи ыш готхэу ышIагъэр къыщигъэлъэгъуагъ. ЫшнахьыкIэ IэкIэ ыIыгъэу ятэ ядэжь къызэрэкIожьырэр, чIэнагъэу ашIыгъэм илыуз, шIулъэгъоу ятэ фыряIэр ыкIи зэрэрыгушхохэрэр сурэтым къыщыриIотыкIыгъ, — къыщаIуагъ фондым ишъолъыр къутамэ.
Фондэу «Хэгъэгум иухъумакIохэр» зыфиIорэм ишъо­лъыр къутамэ ипащэу ПIатIыкъо Аслъан зэрэхигъэ­унэфыкIыгъэмкIэ, зэнэкъокъоу «Памяти героев верны!» зыфиIорэр цIыфыбэм ашъхьэ къырыкIуагъэр зыщаугъоирэ чIыпIэ хъугъэ. Къэралыгъом ыпашъхьэкIэ пшъэдэкIыжьэу иIэр зыгъэцэкIагъэхэм яшIэжь къэтыухъумэным мы творческэ амалыр изы шапхъэу щыт.
ТекIоныгъэ къыдэзыхыгъэхэм Москва тыгъэгъазэм щафэгушIощтых. Илъэсищым мы зэнэкъокъум нэбгырэ мини 10-м ехъу хэлэжьагъ.