Быракъымрэ гимнымрэ къаратыжьых
Урысыем испортсменхэм ябыракъ чIэтхэу ыкIи ягимн къырагъаIозэ дунэе мэхьанэ зиIэ зэнэкъокъухэм ахэлэжьэнхэ амал яIэным тIэкIу-тIэкIузэ тыкъыфэкIожьы.
Спорт лъэпкъ зырызхэм, гущыIэм пае, дзюдом, ащ фэдэ лъэбэкъухэр ащашIыгъэх. АщкIэ зишIогъэшхо къэкIуагъэр дзюдомкIэ Дунэе федерациер спортсменхэм зэкIэми зэфэдэу, лъэпкъ зэхэдз имыIэу зэрафыщытыр ары.
Шъугу къэдгъэкIыжьын, 2022-рэ илъэсым къыщегъэжьагъэу дунэе федерациехэм ащыщыбэхэм тикъэралыгъо илIыкIохэр зэнэкъокъухэм ахэлэжьэнхэ, быракъыр къащагъэлъэгъон ыкIи гимныр къащаIон фимытхэу унашъохэр ашIыгъэх. Ау джырэ уахътэм мы лъэныкъом зэхъокIыныгъэхэр фэхъух. Дунэе олимпийскэ комитетым (МОК-м) Урысыем ыкIи Белоруссием яспортсменхэр дунэе мэхьанэ зиIэ зэнэкъокъухэм ахэлэжьэнхэ фимытхэу, нэужым «нейтральнэ статус» яIэу унэе дисциплинэхэм защаушэтын алъэкIынэу унашъо ышIыгъ. Ау федерацие зырызхэм ар тэрэзэу алъытагъэп. ГущыIэм пае, 2024-рэ илъэсым Париж щыкIогъэ Олимпиадэм тикъэралыгъо испортсмен 15 хэлэжьагъ, ау ахэм зы тыжьын медаль ныIэп къахьыгъэр. Дунэе олимпийскэ комитетым дыригъэштагъ 2026-рэ илъэсым зэхащэщт мыщ фэдэ зэнэкъокъум Урысыем илIыкIохэр хэлэжьэнхэ алъэкIынэу. Ау джырэ уахътэм ехъулIэу Олимпиадэм зыщызыушэтын амал зиIэу къыхахыгъэхэр фигурист нэбгырэ заулэрэ ски-альпинистрэ.
Непэрэ мафэм спорт лъэпкъи 6-мкIэ зэхащэрэ зэнэкъокъухэм тиспортсменхэм быракъыр ыкIи гимныр ащагъэфедэн алъэкIыщт. Ахэр: дзюдор, боксыр (IBA), экстремальнэ спорт лъэпкъхэр (X-Games), ММА-р, паделыр ыкIи бодибилдингыр.