Щытхъу тхылъхэмкIэ къыхагъэщыгъэх
Социальнэ хъытыухэм Iоф адэзышIэрэ спорт администратор анахь дэгъухэм шъолъыр гъэIорышIэнымкIэ Гупчэм ищытхъу тхылъхэр афагъэшъошагъэх. Ятфэнэрэ республикэ форумэу «Къэралыгъо пабликхэр. Хабзэмрэ обществэмрэ язэдэгущыIэгъу зэхэщагъэ зэрэхъурэр» зыфиIорэм ахэр къыщыхагъэщыгъэх.
Джырэ уахътэм ехъулIэу хэбзэ къулыкъухэр ыкIи къэралыгъо учреждениехэр социальнэ хъытыухэм къащызыгъэлъэгъохэрэ официальнэ сообществэ 650-м ехъу Адыгэ Республикэм иI. Администратор анахь дэгъухэр зыщызэрэугъоигъэхэ форумыр гъэшIэгъонэу рекIокIыгъ, IэпэIэсэныгъэу аIэкIэлъымкIэ ахэр зэхъожьыгъэх, тапэкIэ анахьэу анаIэ зытырагъэтыщт лъэныкъохэр агъэнэфагъэх.
Щытхъу тхылъхэмкIэ къыхагъэщыгъэхэм ащыщых Мыекъуапэ физическэ культурэмкIэ ыкIи спортымкIэ и Комитет иметодистэу Бзаго Рустамрэ олимпийскэ резервым испорт еджапIэ ипащэ игуадзэу Тамирлан Кадыровымрэ. Мы нэбгыритIум яIофшIэн хэшIыкI зэрэфыряIэр, япшъэрылъхэр дэгъоу зэрагъэцакIэхэрэр зэхэщакIохэм хагъэунэфыкIыгъ.