Якъоджэгъухэм яшIэжь агъэлъапIэ
1918-рэ илъэсым Теуцожь районым ит къуаджэу Джэджэхьаблэ щыщхэу лажьэ зимыIэ нэбгыри 101-рэ аукIыгъагъэх.
Ахэм яшIэжь агъэлъапIэу джэджэхьаблэхэу Мыекъуапэ щыпсэурэмэ зэхащэгъэ хасэм хэтхэм ягукъэкIыкIэ илъэсипшIыкIэ узэкIэIэбэжьмэ саугъэт агъэуцугъ.
Джэджэхьаблэхэр зыщаукIыгъэгъэ чIыпIэу къуаджэу Гъобэкъуае дэжь къыщыхагъэщыжьыгъэм, Iэшъынэхьаблэмэ якъэхалъэ исэмэгубгъукIэ зы километрэ фэдиз узыкIокIэ щыIэм ар щагъэуцугъагъ. Джэджэхьаблэ щыщхэу Мыекъуапэ щыпсэурэмэ зэхащэгъэ Хасэм ипащэу Нэхэе Аслъан Анзаур ыкъор апэрэ мафэхэм къащегъэжьагъэу мы Iофым ыуж итыгъ, чылэм щыщхэми къалэм дэсхэми ахъщэу къаугъоигъэмкIэ саугъэтыр агъэпсыгъагъ. Непэ къызнэсыгъэми ащ игъэкIэжьын, игъэкъэбзэн, къыпэIулъ шъолъырыр къэшIыхьэгъэным япхыгъэ IофшIэнхэр кIалэмэ ямылъкукIэ ыкIи акIуачIэкIэ зэшIуахы.
Мары бэмышIэу саугъэтым екIурэ гъогоу зы километрэ фэдиз зикIыхьагъэр ашIыгъ, ар зыпшъэ дэкIыгъэр Джэджэхьаблэ щыщэу, сатыушIэу Мыгу Алик Якъубэ ыкъор ары. Аужырэ уахътэм Джэджэхьаблэ изэтегъэпсыхьан, ащ культурэм и Унэу дэтым ищагу игъэкIэрэкIэн, икъэшIыхьан Алик имылъкукIэ зэшIуихыгъ. НэмыкI IофшIэнышхохэри ыгъэцэкIагъэх.
Нэхэе Аслъан къызэриIуагъэмкIэ, Алик ышэу Мыгу Руслъан Якъубэ ыкъом мыжъосыныр зыдэтыщт чIыпIэм икъэшIыхьан имылъку хилъхьагъ, ишIын ыпшъэ дэкIыгъ.
— Мы зыцIэ къетIуагъэмэ афэшъхьафэу чылэм щыщхэу Тыгъужъ Валер, Зэрамыку Валер, Нэхэе Рэджэб, Хьашхъуанэкъо Аскэр, Хъут Адам, Хьашхъуанэкъо Илья, СтIашъу Аскэр, Джанхъот Ращыд, Хьашхъуанэкъо Ахьмэд ыкIи нэмыкIхэм яахъщэ ащ къыхалъхьагъ, шIыхьафхэм ахэлэжьагъэх, — къеIуатэ Нэхэе Аслъан. — Тятэжъ пIашъэхэу лажьэ зимыIэу а лъэхъанэ хьылъэм аукIыгъагъэхэр тыщэIэфэ тщыгъупшэщтхэп, нэбгыри 101-р чылэ цIыкIумкIэ бэдэд, ар тхьамыкIэгъошхуагъ, ащ фэдэ къин тикъуаджи тилъэпкъи рерэмыхьылIэжь. Саугъэтыр дгъэуцунэу тыгу къызэкIым, тэ тикъуаджэ щыщхэм язакъоп, Гъобэкъуае щыпсэухэрэм, нэмыкI псэупIэмэ ащыщхэм къыддырагъэштагъ, хэти иамал къызэрихьэу яшIуагъэ къытагъэкIыгъ, зэкIэхэми «Тхьашъуегъэпсэу» ятэIо. Тэ тыщэIэфэ ащ тыфэсакъыщт, ыуж титыщт, тэгугъэ тауж къикIырэ лIэужхэм тиIоф лъагъэкIотэнэу, а чIыпIэм фэсакъынхэу, хахъохэри фашIынхэу.