БзэджашIэхэм зэрар къарамы­хыным пае транспорт зиIэ­хэм Iофтхьэбзэ гъэнэфагъэхэр зэшIуахынхэ фае.

Адыгэ Республикэм хэгъэгу кIоцI IофхэмкIэ и Министерствэ къызэри­ты­рэмкIэ, апэрапшIэу мэ­къэ лъэш къыгъэIузэ ар къэзыгъэгъунэрэ пкъыгъор хэбгъэуцонэу щыт. Лые хъущтэп рулымрэ нэмыкI пкъыгъоу машинэ кIоцIым итхэмрэ умыгъэфедэшъун зышIырэ гъэпытапIэхэр.
Мы Iэмэ-псымэхэр транспортым хэтхэу, Iоф ашIэу, ау пчъэхэр къы­зэ­рэIукIыхэрэм гу лъыптагъэмэ, ахэм яIофшIэн бзэджашIэ горэм къызэтыригъэуцонэу пылъынкIи мэхъу. Арышъ, джащ лъы­пытэу ахэр псынкIэу зыгъэтэрэзыщт IофышIэхэм зафэбгъэзэн фае.
Джащ фэдэу «шъэф» системэу автомобиль пчъэ­хэр къыIупхынхэ е ар зэкIэбгъэнэн умылъэкIын зышIырэр агъэфедэ.
Амал щыIэу щытмэ, спутникым епхыгъэ пкъыгъо ащ хэбгъэуцоми ­хъущт, мыщ ыпкъ къикIэу транспортыр зыдэщыIэм ренэу улъыплъэн плъэкIыщт.
Машинэр зычIэтын щымыIэмэ, чэщ мэзахэм ар хэбгъэуцоу, къэрэгъулэ зиIэ гъэуцупIэ чIыпIэ гъэ­нэ­­фагъэм дэбгъэхьажьымэ нахьышIу.
Тучанхэм ыкIи хъыз­мэтшIапIэхэр зычIэт унэ­хэм атет видеокамерэхэм уащыгугъынэу щытэп, сыда пIомэ нахьыбэрэмкIэ ахэр чIэхьэгъу къодыер ары зыфэгъэзагъэхэр.
Iоф шъуиIэу шъуIукIын фаемэ, автомобилыр зэ­хэгъэнагъэу къэбгъэнэнэу щытэп, ащ IункIыбзэр къипхын фае. Джащ фэдэу ащ ыкIоцI къыранэхэ­рэп уасэ зиIэ хьап-щып­хэмрэ документ зэфэшъхьафхэмрэ.
Автомобилыр бзэджа­шIэхэм рафыжьагъэмэ, джащ лъыпытэу, уздэщыIэ чIыпIэм емылъытыгъэу, полицием телефонэу 02-мкIэ макъэ ебгъэIун е Адыгэ Респуб­ликэм хэ­гъэгу кIоцI Iоф­хэмкIэ и Министерствэ идежурнэ часть мы телефонхэмкIэ утеоми хъущт: 8(8772) 52-57-27, 8(8772) 57-17-27.
Гъомлэшк Байзэт.