Ным и Мафэ къызыщыблагъэрэм ехъулIэу республикэ филармонием мэфэкI Iофтхьабзэ щыкIуагъ. ЯмэфэкIкIэ бзылъфыгъэхэм къафэгушIонэу АР-м и ЛIышъхьэу КъумпIыл Мурат ащ къэкIуагъ.

Джащ фэдэу мэфэкI Iофтхьабзэм хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, министрэхэм я Кабинет и Тхьаматэ игуадзэу, финансхэмкIэ министрэу Виктор Орловыр, АР-м IофшIэнымрэ социальнэ хэхъоныгъэм­рэкIэ иминистрэу Мырзэ Джанбэч, хабзэм ифедеральнэ, иреспубликэ къулыкъухэм япащэхэр, муниципальнэ образованиехэм, общественнэ организациехэм ялIыкIохэр.
Iофтхьабзэм хэлажьэхэрэм зафигъа­зэзэ, республикэм и ЛIышъхьэ къызэрэхигъэщыгъэмкIэ, ныхэм лъытэныгъэшхоу, шIулъэгъоу афыряIэр къиIотыкIыгъэнымкIэ ным и Мафэ амалышIоу щыт. Къум­пIыл Мурат зэрэхигъэунэфыкIыгъэмкIэ, Хэгъэгум иухъумакIо и Илъэс ухъумэкIо шъыпкъэхэр зыпIурэ ным ищытхъу тэIо. Ахэм якIалэхэм Iашэр аIыгъэу непэ Урысыем ифедэхэр хэушъхьафыкIыгъэ дзэ операцием къыщагъэгъунэх. Джащ фэдэу сабыибэ зиIэ ныхэми, ны-тыхэр зышъхьарымытыжь кIэлэцIыкIухэр зыпIурэ бзылъфыгъэхэми лъытэныгъэшхо къалэжьыгъ.
«Ренэу зицыхьэ къыттелъ ныр ныбджэгъу шъыпкъэу, ушъыякIоу зэрэтиIэм нэмыкIэу, пшъэ­дэкIы­жьышхо зыхьырэ цIыф. Сабый­хэм цIыфыгъэу ахэлъыщтыр зэлъы­тыгъэр ным пIуныгъэу аригъэгъотырэр ары: шIум, зэфа­гъэм, зэдэIэпыIэжьыныгъэм ясабыйхэр зэрэфапIурэмкIэ обществэм изэкъогъэуцон ныхэм яIахьышхо хашIыхьэ. Ныхэмрэ кIэ­лэцIыкIухэмрэ IэпыIэгъу ягъэгъотыгъэныр къэралыгъом ап­шъэрэ мэхьанэ зэритырэ лъэныкъомэ ащыщ. Президентэу Владимир Путиным шъолъырхэм игъо афелъэгъу ныхэм лъэныкъо пстэумкIи яIофыгъохэм язэшIо­хын, унагъохэм ягъэпытэн зэра­фэлъэкIэу анаIэ тырагъэтынэу», — къыIуагъ КъумпIыл Мурат.

Адыгеим щыпсэурэ ныхэмрэ кIэлэцIыкIухэр зэрыс унагъохэмрэ IэпыIэгъу зэфэшъхьафхэу арагъэгъотыхэрэм, мы илъэсым къыщыублагъэу лъэпкъ проектыкIэу «Унагъу» зыфиIоу пхыращырэм диштэу IэпыIэгъукIэхэу арагъэгъотыхэрэм афэгъэхьыгъэу республикэм и ЛIышъхьэ къафиIотагъ. ГущыIэм пае, кIэлэцIыкIу­хэр зэрыс унагъохэм нахьыбэрэ ящыкIэгъэ пкъыгъохэр охътэ гъэнэфагъэкIэ къызщаIахын алъэкIыщт чIыпIэхэр рес­публикэм къыщызэIуахыгъэх, ны-ты хъущтхэм IэпыIэгъу афэхъурэ къулыкъу­хэр бзылъфыгъэ консультациехэм ащызэхэщагъэх. Зыныбжь илъэс 26-м нэмысыгъэ ныхэу апэрэ е ятIонэрэ сабыир 2025-рэ илъэсым щылэ мазэм и 1-м ыуж къызыфэхъухэрэм сомэ мин 25-рэ, бзылъфыгъэ ныбжьыкIэхэу очнэу еджэ­хэрэм сомэ мини 100 зэтыгъоу къараты. ХэушъхьафыкIыгъэ дзэ операцием хэлажьэхэрэм яунагъохэм арысхэм апаи республикэм Iофтхьэбзэ зэфэшъхьафхэр щызэрахьэх. Ащ фэдэ унагъохэм арыс кIэлэцIыкIухэм апэрэ чэзыоу санаториехэмрэ курортхэмрэ къащяIазэх, гъэмэфэ лагерьхэм защарагъэгъэпсэфы, ып­кIэ хэмылъэу еджапIэхэмрэ колледжхэмрэ ащагъашхэх, кружокхэмрэ секциехэмрэ ыпкIэ амытэу ахэлажьэх.
«КIэлэцIыкIухэр гъэхъагъэ хэ­лъэу еджэнхэмкIэ, ахэм язэчый зыкъызэIуегъэхыгъэнымкIэ ищыкIэгъэ амалхэр зетэхьэх. Сэнэхьатэу зэрагъэгъотыгъэмкIэ ныхэм Iоф ашIэнымкIэ хэкIыпIэхэм талъэхъу. КIуачIэу тиIэр зэтхьылIэрэр ны, унагъо пэпчъ ищыIэкIэ-псэукIэ зыкъегъэIэтыгъэныр ары», — къыIуагъ АР-м и ЛIышъхьэ.
Сабыибэ зэрыс унагъохэм лъэшэу гъунэ алъафы. Джыдэдэм сабыибэ зэрыс унэгъо 9375-рэ Адыгеим щэпсэу. Ахэм ащыщэу 5000-мэ социальнэ IэпыIэгъу зэфэшъхьафхэр аIокIэ. ПсэупIэ-коммунальнэ фэIо-фашIэхэм атефэрэ ахъщэр ахэм къафалъэгъужьы, кIэлэцIыкIухэм ыпкIэ хэмылъэу Iэзэгъу уцхэр арагъэгъоты, кIэлэеджакIохэмрэ студентхэмрэ ыпкIэ лъамытэу транспортымкIэ зекIонхэу амал яI. Мыщ фэдэ унагъохэм ыпкIэ хэмылъэу чIыгу Iахьхэр къафыхагъэкIы, сабый нахьыжъым ыныбжь екъуфэ къэралыгъо IэпыIэгъу къыIокIэ. Мы илъэсым къыщегъэжьагъэу сабыибэ зиIэ унагъохэу ипотекэ чIыфэхэр зыштэхэрэм субсидиеу аратырэр фэдитIукIэ нахьыбэ хъугъэ, сомэ миллионым ар нэсыгъ. Ящэнэрэ ыкIи ащ къы­кIэлъыкIорэ кIэлэцIыкIухэм ателъытэгъэ республикэ ны мылъкур фэдитIукIэ нахьыбэ хъугъэ, сом мини 100-м нэ­сыгъ. Унэгъо ныбжьыкIэхэм ящэнэрэ ыкIи ащ къыкIэлъыкIорэ сабыир къазыфэхъукIэ, зэтыгъоу сомэ мин 300 араты.
Сабыибэ зиIэ, кIэлэцIыкIуитф ыкIи ащ ехъу зыпIугъэ ни 10-мэ лъэшэу зэрафэразэр Адыгеим и ЛIышъхьэ къы­Iуагъ, дипломэу «Материнская слава» зыфиIорэмрэ Адыгэ Республикэм ишIухьафтынхэмрэ ахэм аритыжьыгъэх. 2020-рэ илъэсым къыщегъэжьагъэу мыщ фэдэ шIухьафтыныр афагъэшъуашэ. А уахътэм къыщегъэжьагъэу сабыибэ зиIэ ны 60-мэ ар аратыгъ. Мы илъэсым шIухьафтыным къыхэхъуагъ, джы ар сомэ мин 400-м нэсы. ШIухьафтынхэмрэ дипломэу «Материнская слава» зыфиIорэмрэ аратыгъэх Олеся Тишинам, Наталья Христофоровам (Мыекъуапэ), Мыекъопэ районым щыщ Людмила Брагинам, Шэуджэн районымкIэ Ирина Калайдинамрэ Iэшъхьэмэфэ Зуретрэ, Теуцожь районым къикIыгъэ СтIашъу Светланэ, Красногвардейскэ районым щыщ Ольга Гладуновам, Кощхьэблэ районым къикIыгъэ Ансалый ФатIимэт, Адыгэкъалэ щыщ ЖэнэлI Асиет, Джэджэ районымкIэ Валентина Дудко.
Iофтхьабзэм икIэух Адыгеим и ЛIышъхьэ республикэм ис ны пстэуми мэфэкIымкIэ къафэгушIуагъ. КъумпIыл Мурат зэрэхигъэунэфыкIыгъэмкIэ, мафэ къэс ныхэм ашIэрэр ежьхэм ашъхьэкIэ ягъэхъэгъэ закъоп, ахэр унагъомрэ обществэмрэ халэлэу зэрафэлажьэ­хэрэм ишыхьат.
АР-м и ЛIышъхьэ ипресс-къулыкъу къытырэ къэбархэмкIэ
ЛIышэ Саныет.